أيه كذا
ايه الجمال ما شاء الله

جميل جدا .... غريبه انهم خلوك تمسك سرا عشان تغير تذاكر عين لندن ... انا طمروني السرا ووصلوني الشباك على طول لاني دافع اون لاين ومخلص بس ابدل ... وفعلا مثل ماقالت اختنا لو ماشي قدام بتلقى اشكال والوان مطاعم وكافيهات وفيه اكشاك لذيذه ورخيصه ... وماشاء الله الجو معكم تمام ... صورك حلوه ليش موزيها عننا ...
الله يعطيك العافيه على مجهودك في التقرير ... متابع معاك

الفطور جاهز ؟ يتسائل الأب

نبغى نلحق على ( متحف مدام توسو للشمع ) موعدنا الساعه (11) ص

فقالت المدام مقترحة / واالله ودنا اليوم بفطور انجليزي .. نبي نغير عن البيض والجبنه والكورن فليكس .

الشارع مليان كوفيهات .. دخلت العائلة أحدها ..

English breakfast please

بيض !! فاصوليا !! شرائح لحم خنزير !! سجق خنزير !!

نظر الأب لزوجته

في النهاية كان الفطور برضوا بيض !! وساندوتش جبنة حلوم مع الطماطم والخس .



وجهة العائلة لهذا اليوم متحف الشمع .. ولحسن الحظ فهو قريب من شارع العرب .. (20) دقيقه سيراً على الأقدام .. وضلنا تقريباً على الموعد .. ومعانا التذاكر من النت .

ويا لطيف الطف !!!!!

طابووووووور طويل !! يمين ويسار !! شمال وجنوب !!

ما تعرف أوله من اخره !! بوابات عديده !!

باب لشراء التذاكر وباب لتذاكر الشباك .. وباب لتذاكر النت العاديه .. وباب لتذاكر النت المستعجله اللي دافع أكثر

وقفت العائلة مع طابور تذاكر النت العاديه .. (45) دقيقه !! ساعه الا ربع !! طبعاً مافي مشكله مع الغيوم والجو الزين , لو نوقف كمان ساعه على قلبي زي العسل , لكنها متعبه للاطفال !!

وصلنا , اخذوا عربية الطفل عند المدخل , دخلنا

المتحف يضم شخصيات من كل الفئات .. وبالفعل أشكالهم كأنها حقيقي

تضايق الأب / حاطين رونالدو !! وأحسن لاعب في العالم لخمس مرات ميسي مو في !!!!!

فرحت البنت الوسطى بفرقة ( ون دايركشن ) وهي فرقة موسيقية بريطانيه , وهاتك يا سناب وتصوير مع الفرقة.

رأى الاب الرئيس الامريكي اوباما فقال كلها شهرين ويحطون هيلاري كلينتون بدالك .. جلس الاب على مكتب اوباما وقال لنفسه / اممممم ماذا كنت سأفعل ؟

سوريا !! العراق !! اليمن !! مصر !! تونس !! ليبيا !!!!

فقام الاب وهو يقول / اللهم اصلح أحوال المسلمين .

المتحف به عرض سينمائي رباعي الابعاد لمدة عشرة دقائق , روووووعه جداً , وكأنك بوسط الفيلم

كما يوجد لفه بالقطار على مجسمات لندن القديمه , وتؤخذ لك صورة بالقطار , ذكرى جميله .

قضينا به ساعتين

خرجنا .. وكان المطر الخفيف يتساقط

قال الاب / الجماعه مضبوطين في توقعاتهم , مو زي ربعنا !! هاتوا المظلات .. عائلة حريصه ماخذه احتياطها , ومطلعه على مواقع المناخ .

توجهنا نحو الهدف الثاني حديقة ( ريجنت بارك )

الحديقة تقع خلف المتحف .. عشر دقائق تقريباً وصلنا .. وتستقبلك بحيره جميله بها البط والوز والحمام من فوقها .









ويحيط بها كراسي للاسترخاء والاستمتاع , ومن خلفك الاشجار والورود أشكال والوان .









نصف ساعه ونحن نلاعب البط والوز والمطر من فوقنا ونحن مستمتعين ولا كأنه في مطر .

توغلنا في الحديقة وإذ ببساط أخضر كبير يشرح الخاطر ..





وفي اخره تل وفوق التل كافيه ومطعم يطل على كامل الحديقة ( يا عيني يا عيني )



الاب / ممكن نأخذ كم كرسي بره ؟

فتعجب عامل الكافي من طلب الاب , فالمطر مستمر , والمنطق أن تجلس داخل المحل لا خارجه !! فوافق .

ما يدري الاخ أن المطر والخضار ذا نشوفه بالافلام فقط !!

ساعه كامله من السواليف .. والمتعه .. منظر يرد الروح

سناكات .. كافي لاتيه .. ايس كريم .. عصيرات



بعدها توجهنا إلى الهدف الثالث ( حديقة الحيوانات )

وهي تعتبر داخل الحديقة ولكن باب الدخول من خارج الحديقة .. ربع ساعه وصلنا ..

الموظف / الحديقة تحتاج ساعتين على الأقل عشان تخلصونها !! وأنتم جايين بوقت متأخر !! واحتمال ما تشوفون الحيوانات , لانها بتكون داخل بيتها بسبب المطر .

قالت المدام / خلينا نلحق باقي البرنامج , لا يقفل علينا السوق كمان .

رجعنا مخترقين الحديقة وبدأنا بشارع ( ريجنت )

شارع طوووويل والمطر لا يزال يتساقط بين الحين والاخر , رأينا العديد من السفارات الاجنبية . محطة bbc المعروفه وكان عندها ستار بكس ريحنا فيه , ما اتعودنا على المشي الكثير

وصلنا الساعة السابعة مساء للهدف الرابع ( شارع اكسفورد )

شارع التسوق المشهور .. كانت أغلب المحلات على وشك الاغلاق , والبعض منها أغلق ..

كملنا المسير مع وعد بالرجوع .

الاب يكلم زوجته بصوت منخفض / لا تطالعين يسار !!

فتعجبت المدام وقالت / ايش فيه !!

فرد الاب / على يسارك محل (هامليز ) أكبر محل ألعاب في لندن , لو يشوفه ولدك الصغير ذا والله ننشب في المحل ما نطلع الا بكره !!



توجهنا نحو الهدف الخامس ( ساحة البيكادلي )




ملتقى عدة شوارع .. عروض فنية في الساحه

الساحة تكون بالمساء أجمل مع الأضواء والشاشات الكبيره

جلسنا حول الساعه

بلغ بنا التعب والجوع .. أعتقد مشينا خمسين كيلو هذا اليوم !!

رجعنا الشقه بالمترو .. كان يوجد اللي ما يتسمى ( ماك ) جنب الشقه .. تعشينا .

يا بنات ناموا !!

انتظر يابابا .. نحمل السنابات !!

يادي السنابات !!

يابنات بكره بنروح استوديوهات ( هاري بوتر ) وتراها خارج لندن .

ناموا .

يتبع ..

البرنامج /

متحف الشمع + حديقة ريجنت بارك + حديقة الحيوانات +

شارع ريجنت + شارع اكسفورد + ساحة البيكاديلي .

..................

بعض الصور من النت للتوضيح

برنامج حلو و مرتب و اللي حلاه أكثر
طريقة السرد الرائعة

أحياناً أعتقد أن اللي يشغل ماكدونالدز هو المواقع اللي يختارها

الجو بوقتكم كان جميل جداً و دايم جو لندن مايحتاج

متابعين يا عسل

تسلم
مو مصدق أننا ننتظر الأمطار أسال الله أن يغيثنا
متحف مدام دائما زحمه وطابور علشان ما يدخل الكل دفعه وحده داخل

ماشاءالله جدولكم مرتب وممتاز

ريجنت بارك من احلى الحدايق

بس مره ثانيه لوتقول للمره لاتشوفين اهناك لان عادي تنفضح والكل يدري انك قلت لها لاتلفين ويهج [emoji23] بس الحمدلله ردت عليك شوي شوي


Sent from my iPhone using Tapatalk

لندن ما تخلص كل مكان احلى من الثاني
وودك ترجع له مره ومرتين وثلاث
الجوله النهريه حلوه ولندن آي حسافه ما بدلتهم كان خليتهم واقفين بالطابور بره وانت تبدل التذاكر
على ما يجي دورهم الا انت واصل

اما جولاتكم سيراا على الاقدام عليكم بالعافيه والصحة يارب
اهو حلو انك تشوف كل شي بالشارع
بس تعب والله
الباص سهل ليش ما جربتوه بالتنقل وتلحقون على كل شي

والريوق البيض والجبن والله لذيذ عوافي على قلوبكم

احنا الحريم اذا قلت لنا لا تلتفتون نلتفت اول شي قبل لا نسأل ليش لأ هههه

وليش ما تحب ماك والله لذيذ
بالعافيه على البنات وخلهم يستانسون بهالسنابات

متابعين معاك هاري بوتر
يعطيك العافيه

2 / 8

الثلاثاء ..

فتح الأب ستارة الغرفه .. دخل ضوء الشمس الخفيف

السماء بها بعض الغيوم

أيقظ زوجته وسابقها على الحمام الوحيد الذي بالشقه !!

كان هدف اليوم / استوديوهات ( واونر اخوان ) الموجودة خارج لندن والتي تم انشائها خصيصاً لعمل فلم ( هاري بوتر )

كان موعد الدخول الساعه ( 12.30 ) الظهر ..

انطلقت العائلة من محطة ( euston ) إلى محطة ( Watford Junction ) بتكلفة (62) باوند لستة أشخاص , استغرقت الرحله نصف ساعه ..

ثم باص تابع للاستوديو عليه شعار الفلم وصوره ( غير مجاني الشخص رايح جاي 4 باوند ) .





ربع ساعه المشوار ..

وصلنا الساعه (12) تقريباً .. العائلة معها تذاكر الدخول مطبوعه جاهزة من النت .. توجهنا نحو شباك التذاكر وبدلنا تذاكر النت بتذاكر اخرى ,

كان عدد الحضور قليل جداً لا يتجاوز العشرة أشخاص !!

تعجب الاب وقال لزوجته غريبه وين السواح !! ماحد يحب هاري بوتر !!

دخلنا المبنى وكان الجميع في شوق لمعرفة ما بداخل هذي الاستوديوهات

ويا لطيف الطف !!

400 شخص وجدناهم أمامنا !! سرى طوووووويل !!

الناس جايه من بدري !!

كان الدخول على دفعات وحسب الموعد .. ولكثرة الناس دخلنا تقريباً الساعه الواحده والربع !!







هذي غرفة هاري بوتر , وهذا مكتب الساحر (دمبلدور ) وهذي وهذي ..

وهذا شفناه بالجزء الاول , وهذا فاكره من الجزء الثالث , وغيره وغيره ..













الصورة الاخيره / للقصر الرئيسي الذي تدور أحداث الفلم فيه , وتلاحظون أن حجمه صغير !!

والكمبيوتر والتقنية الحديثة تكفلت بالباقي !!

بابا ابغى العب بالعصا السحريه .. فين ؟
يوجد ركن لتعليم الاطفال كيفية تحريك العصا السحريه , وهاتك يا تصوير وسنابات .

كل اللي شفته بالاجزاء الثمانيه للفلم تراه امامك .. السيارات والسيوف والحيوانات والوحوش

حتى لعبة الشطرنج بحجمها الكبير موجوده !!

كل شئ كل شئ ..

في بداية الجوله قال أحد المشرفين ان الوقت المتوقع للجوله 3 ساعات !!

تعجب الاب ومعه عائلته من ذلك

معقوله 3 ساعات !! ساعه بالكثير ونخلص .. ايش حنشوف يعني !!

3 ساعات ويا دوب خلصنا

3 ساعات من السحر والخيال

انبهار بالتقنية والمعرفه .. وكيفية تأثير الكمبيوتر وتطبيقاته ..

انبهار بعدد الاشخاص اللذين نفذوا الفلم ..

انبهار بكمية المواد المستخدمه في صناعة الفلم ..

انبهار بكيفية صناعته واخراجه !!

في نهاية الجولة توجد غرف بها المكنسة السحريه الطائرة ,, يجلس عليها الشخص وتتمايل به يمين ويسار .. تطلع له صوره أو فيديو ولها خلفية سماء وبحر وقصر وكله بسعره , ذكرى جميله جداً .

جولة عائليه جميله .. تجربه جديده مميزه ..

ختام الجوله مطعم كبير ومحل هدايا وتذكارات بشعار هاري بوتر وشخصيات الفلم ..

خرجنا وكانت السماء تمطر هتاناً جميلاً .

وجدنا الياص أمامنا رجعنا للمحطة ومنها الى محطة (ايستون) بالقطار وطول الطريق مناظر جميله وغيوم وزخات من المطر .

من محطة ايستون إلى محطة ميترو ( ليستر سكوير )

وصلنا الساعه السادسه مساء ..

عالم ثاني وكثافة بشريه أخرى .. عرض فني في الساحه .. مطاعم وسينما



توجهنا نحو هدفنا الثاني ( m & m )

محل الحلاوه المشهوره ..



الام / انتبهوا للولد ..
الام / لا يضيع الولد !!
الام / يا بنت أخوك معاكي ؟

الولد مسيكين مو عارف وين يوقف !! عين على الحلاوه .. وعين على الألعاب .. وعين على الملابس والتي شيرت بشعار الحلاوه

طالع الدور الثاني !! نازل البدروم !!

وامسك الولد وجيب الولد !!












نظر الاب لابنته الصغرى وجدها تقلب في علب الحلويات

اممم اخذ المثلثه ولا المدوره ؟؟

بطعم اللوز ولا الشكولاته ؟؟

أما الكبرى قالت يابابا / أنا صديقتي جابت لي من تركيا حلاوة , ايش رأيك اخذ لها حلاوه زيها ولا تي شيرت ؟؟



ساعتين واحنا طالعين ونازلين !!!!

وبالعافيه طلع الولد والبنات محملين بحلاوه تكفينا عام كامل !!



اجتمعت العائلة في ساحة ليستر سكوير وهم مرهقين من الطلعه والنزله ..

نظرت البنت لأبيها نظرة حنية وقالت بصوت منخفض / بابا شوف السينما أمامنا .. ودنا بفلم .

نظر الأب في ساعته وجدها الساعه الثامنه مساء !! والفيلم سينتهي في حدود الساعة العاشره !! أحس بقلق .. التفت حوله ..

الساحه مليئة بالسواح .. المحلات والمطاعم تعمل .. الموسيقى والغناء على أعلى صوت .. حتى الأمن لا يوجد سوى عسكري واحد .. مما يدل على أن المكان آمن .

وافق الاب .. ذهبت البنت الكبرى للسينما التي أمامهم ثم رجعت وقالت / لقينا فلم يبدأ الان الساعه ثمانية وربع , هيا يابابا خلينا نلحق .

قال الاب / يا بنتي روحي انتي واختك , أنا وأمك بنتفرج على ها العالم الرايح والجاي , وبنعشي اخوك واختك

ذهب البنات , وجد الاب والام عرض فني في الساحه .. موسبقى ورقص .. شاركوهم التصفيق

لفه في الساحه على المطاعم واستقر الامر على مطعم هندي .. برضوا الفاتورة (70) باوند >>> والله ما أمزح (70) باوند لليوم الثالث على التوالي .. لكن عددنا أقل .. السعر غالي باعتبار انك في قلب ليستر سكوير .. ( بالمناسبة أكل المطعم كان عادي ) .

الساعه 10 م خرجن البنات من السينما ..

ها كيف الفلم ؟

فقالت الوسطى / مره حلو يابابا .. فضحك الاب وقال / الفلم مو مترجم

فردت على استحياء / يعني افهم شوي واختي تشرح لي الباقي .

طيب جيعانين ؟

مو مره الفشار والكولا في السينما سدوا نفسنا .. شوفوا برجر كنج أمامنا ..

تعبانين منهكين بعد يوم في المترو والقطار والباص والمشي .. خلاص رجعنا ..

في المترو أمسك الاب بيد زوجته وقال / شوفي الساعه ( 11 ونص ) كم مره جلسنا في اوروبا لهذا الوقت خارج الشقه !!

فاجابت / فعلاً ولا مره .. كان حدنا الساعه 8 و القلق يصيبنا..

فعلا ً لندن غير .

يتبع ..