بلادكم حلووة .. حلووة ... بس الوطن ماله مثيل - الصفحة 22

توبليرون · 25-03-2015, 06:49 PM

اقتباس : المشاركة الأصلية كتبت بواسطة |القحطاني|

والله يا ام حسين ما ينلام لما طلع من البيت تخيلي الدقيقة 28 سجلوا هدف

والبايرن معروف انه فريق قوي هجوم ووسط ودفاع حتى حارس اقوى من بعض الفرق مو بس اللاعبين

فيصل .. والله تشجيع فريق اوروبي افضل من فريق سعودي
لانه سبحانه لما تتابع الاوروبي وينهزم فريقك تقدر تتقبل الخسارة
اما عندنا لازم نرجع الخسارة للحكم او المدرب او رئيس النادي وما فيه اي تقبل ولا انا احب الكورة كثير لانه تقلب مزاج اي واحد بسرعة

تقرير جميل يا ام حسين والله يعطيك العافية

اي والله دايما جذيه
واعصابه بس حواليه ما يتكلم ولا يصرخ ولا شي تلاقيه ساكت
عكس ابوه يهز البيت بالصريخ وتوجيه اللاعبين عبر الاثير اللي يقول بيسمعونه
صح الدوري الاوربي حضرنا المباراة ماكر خسران والا فايز بس كأنهم حاضرين فيلم
تابعوه واطلعوا بهدوء
اما التحليل للمباريات مادري عنهم عاد عقب
والاحلى مشاركاتكم ومناقشاتكم اللي تهبل
شكراا لك

فيصل · 25-03-2015, 04:20 PM

كل الأثنين

توبليرون · 26-03-2015, 12:59 AM

السلام عليكم

الجزء الثالث والعشرون

اليوم السابع وال قبل الاخير

بهذا اليوم اتفقنا انا وبنتي انا نصحى مبجر ونروح السوق وخاصة للمحلات اللي

شرينا منها ونسوي التاكس فري لهم

مع ان في محلات بعيدة او نعرف ان ما راح نرجع لها ثاني نسوي التاكس فري بنفس الوقت بعد الشراء

بس اول شي بتريق واكل من بريت لاني ما استغني عنه وبنودع لندن بعد

ركبنا الباص وسيدا للماربل آرش

وبرت اللي عند الكمبرلاند

ريوقي وبنتي

احلى كرواسووونه
وعصير برتقال فريش

واول محل بريمارك ......تاكس فري

وهل نخلص منه ؟؟ ما نشتري بعد التاكس فري ؟؟

ودخلت مع بنتي وماسكة نفسي ما شريت

وبعد وقفة الطابور ....والا يطلع مو مكان التاكس فري

مكانه غير
اي لحظة تذكرت ....قبلها بيوم وقفت دانه بالطابور وقلت لها قولي لهم ابي التاكس فري

وانا انتظرك وظليت واقفة قريب يمها

ووقفت دانه بطابور عند قسم الاطفال بالزاوية بعد البيجامات والاكسسوارات

وبعد تعب الوقفة لي ولها ويوم يوصل دورها قالو لها لازم واحد كبير

ما يصير اقل من 18 سنة

وبعدين خذوا دور اللي وراها وانا الصراحة خلاص

ظهري انقص من الوقفة وما اقدر اوقف بالطابور مرة ثانية وكل ماله يزيد الطابور

قلت لها خاص باجر نروح

نرجع لبنتي الكبيرة لما وقفت احنا خابرين هالمكان تاكس فري قبل سنتين

وماندري انه بس اللي وقفت فيه دانه

المهم بعد ما راحت هي توقف هناك انا قلت لها بقعد بره لان ماله داعي وقفتي

ولا تنسين بعدنا باول محل ورانا مشي

قعدت بره على دكات بريماك اللي تلاقي الناس دايماا قاعدين عندها

وبعدها لمحلات اكسسفورد

سيلفردج خالصين منهم باخر مرة كنا فيه

وبعدين رحنا لمحل ما اذكر اسمه وهو يكون موجود داخل مكان

خلف الاسواق باي شارع ما اذكر بس بنتي بتذكر وتقول لي ان شاءالله

الحيين نايمين....لحظه بنتي قاعدة

ارسلت لها واتس اب وجاني الجواب هههههههههه

المحل اسمه

A&F

والشارع هو دواعيس ريجنت ستريت

المهم رحنا لان ولدي موصينا نشتري له غرشتين عطر خاص بالمحل

المهم بعد ما خلصنا من التاكس فري والمشترى وطابور المحل اللي هالمرة انا وقفت وبنتي انتظرتني بره ههههه

كنا مستعيلين لان التلفونات اشتغلت علينا ينتظرونا بالمطعم عازمنا بعد

بوحسين...........وشفت علم بلادي مرفوع رغماا عن الانوف

ودق قلبي قلت بصوره وشوووفوا اول صورة له

والله كنت بصور الشبه عمود النور لانه عجبني شكله ومو منتبه على العلم

وطلعت بهالصورة المعبرة............اللي ما انتبهت لها الا بالانستغرام

كان في موجه تربية فنية يصور دائما الشبات واطراف منها وانا كنت اصور الشبات واحطهم ويعلق

وبهذه الصورة قال احلى شبة لانها حاضنة علم بلادي .....انا تعجبت من تعليقه وشفت الصورة

والا صج رووعه

وهذه اللي صورتها انا للعلم بعد ما شفته وبعد ما صورت الصورة السابقة

قلت لكم كنا مستعيلين وانا اوقف اصور وبنتي تقول لي يما يلا

وتلاحظون الصور من الايفون بس.....وشوية صور للجوله الصباحية واللي كانت لعمل التاكس فري

ووركبنا الباص والى شارع الكوينز واي

وونزلنا ابد عند المطعم بالضبط .....

مطعم خان الهندي وهو من افضل مطاعم ابوحسين المفضله بلندن لان يذكره

من السبيعينات

وهذا مكانه ما غيره وشوفوا الطبق وشوفوا من متى هذا المطعم موجود

منذ عام 1977

ايبوونه لكم بغنشة صغيرة وبعدين انتو وكيفك

وهذا بعد ما انتهينااا

نظفنا ايدينا بعد ما نظفنا الصحن........تكرمون ما لي خلق انزل للمغاسل والحمامات لانها

درج يتعب على قولة بنتي ولا تقول بنتي ان تحت

شافت غرفة مكتوب عليها خطبة الجمعه....وبرة كانت توج نعل واحذية وانتو بكرامة

وهذا ديكور المطعم ذكرني بمطار دبي

طلعنا من المطعم حسين رجع للاجور رود ربعه هناك ...واحنا رحنا يمين ولفينا طبعاا احنا نعرف وين بنروح

لداخل الكوينز واي وبالاخص لمول الوايت ليز

قلت لغنومة ودانه مااشتريتوا بكرتكم قصدي كرت البنك

والا غنومة تقول صح وينه اهم يحسبون اني مو جايبته معاي ....قلت لهم كاهو بس لا تسحبوون وايد

كل وحدة بس خمسين باوند لان اخر يوم خلاص وشريتوا كل شي بس

وهني راحوا يجربون يسحبون من بنك قريب من المصبغه تعرفونها اللي نروح لها

ويووو ضايق خلقهم لانه مو راضي يسحب

بعدين دخلنا للوايت ليز والا في جهاز سحب الي ...قالوا خل نجرب نسحب

والحمدلله طبعا استانسووا لما سحب وشرووا لهم

كلونيات من محل باكستاني موجود بالوايت ليز وهذا واايد رخيص مع ان عنده عطور جديدة

المهم شرينا وطلعنا وركبنا تاكسي كبير نفس الفان يحمل 6 اشخاص

ورحنا الى.....وهني عند بوابة الوايت ليز والمباني له

ورحنا للريجنت بارك اول مرة ادخلهااا

وقلنا لصاحب التاكسي نزلنا عند افضل مكان يتجمع عنده الناس

قطنا عند بوابة ونزلنا ورحنا يسار مع الناس وشفنا هالورد وما شاءالله ما خلينا وردة وما صورناها

كل نوع ورد مكتوب عندها رقم واسمها

والنافورة رووعه

وسوالف العيال تحدي.......صورني واصورك

وقعدنا ناكل مكسرات هني وفستق......يوسف بدال ما يعطي الحمامه شي مفيد

عطاها قشر الفستق وبلعته وهي تقصص فيه ......حرام يا يوسف لا الحمامه بلعته رااح

وشفنا هالسنجاب اللي قام يلحق البنات يبي أكل وعطوه مكسرات

الى اللقاء

توبليرون · 26-03-2015, 01:07 AM

ورحنا للبحيرة

النورس ووالبطة
يلعبون

ولسان حالهم يقول

الماء والخضرة .....والوجه الحسن

شلال حليوووو

جسر خشبي صغير

طبعا ما نقدر نمشي كل الحديقة ويمكن اللي شفناه شوية

وانا اعرف ان لندن زوو في نفس الريجنت بارك او تابعه لها

المهم ردينا لجهة البوابة ونبي نقعد على الكراسي نريح شوي

شايفين البوابة هذه اللي دخلنا منها ورحنا يسار وبعدين رجعنا رحنا يمين وردينا عندها

وهذا مقابلها ساحة جميله وممرات راائعه وهاادئة .....تهقون لو هالحديقة يم بيتي

مو كان انا الحين اتمشى فيها رياضة الصباح خخخخخخ خلف الله علينا ويرزقنا الجنة ونعيمها يارب

اشجار متنوعة

رحت الكافية الموجود بالحديقة ...وشوقني كيكهم والقعدة بالحديقة

اتصلت على ابوحسين والعيال قلت لهم تعالووو الكافية

وهذا طلبنا انا وابوحسين......ترى الحليب كله من ابو حسين كتته بالصينية

وهذا ورد عند طاولتنا

وهذا الورد من سياج الحديقة طالع

شبعنا من الحديقة وبعدها قال بوحسين يلا بروح الاجور رود قلنا له لا احنا مانبي الاجور رود نبي

الاكسفورد

وهني ركبنا تاكسيين لان الشوارع مو مثل الكوينز واي فيها كل انواع التكاسي

ركبنا احنا خمسة وابوحسين راح بروحه

يا جماعه بس حبيت اذكركم ان الوقت المكتوب على الصورة

توقيت الكويت نقصوا منه ساعتين هو توقيت لندن

وهذه حصيلة يوسف تي شيرتات بالدرزن ههههههه

قاعد يصفطهم بعد ما نشق الكيس

وقلت لهم روحوا يبوووا شنطة لان لازم الشنط امتلات ويبيلكم لاغراض اليوم بس شنطة

طبعااا لا تشترون من المحلات اللي مقابل الكنتاكي بالاكسفورد لا

اسعارها خيالية وما تسوى يا ريت ماركة بعد .............مسكينة بنتي قالت انا اييب لكم

وراحت اهي ويوسف بسرعه للبريماك وجابو شنطة بنص سعر الشنط اللي بره

وعلى ماراحووا ويااابوا الجنطة

قعدت اصور هالولد اللي قاعد يلعب يتزحلق بهالطريقة على سلم الماكدونالد

صبي كويتي الله يهداااه بس يشوف اي سيكورتي يمر او عامل بالمطعم يصير عاقل

وقمنا نخرعه نقول له يااك الريال يقوم يتأكد مافي شي يرد يتزحلق

خخخخخخخ يوسف وجياسه قبل يوم

توبليرون · 26-03-2015, 01:10 AM

الحدائق
- حدائق الهايد بارك

يسمع الزائر العربي بحدائق الهايد بارك قبل أن يصل إلى لندن، وذلك لشهرتها، خاصة الهايد بارك كورنر، الذي يسمح فيه لأي شخص للتحدث بحرية في عطلة نهاية الأسبوع، لأنها أيضا قريبة من المناطق التي يسكنها او يلتقي فيها العرب )كوينز واي( و )ادجورد رود( و )اكسفورد ستريت( و)نايتس بريدج(.

تقع هذه الحدائق في وسط لندن، وهي من أكبر الحدائق في وسط العاصمة البريطانية، ويقسم الشارع الذي يمر وسطها إلى قسمين، الأول يسمى الهايد بارك، والثاني يطلق عليه تسمية كنزنجتون، حيث يقع قصر الأميرة الراحلة ديانا )قصر كنزنجتون( في هذا القسم.

يمكن الوصول لهذه الحدائق بواسطة قطار الانفاق )الاندر غراوند(، وأقرب المحطات لها هايد بارك كورنر، وماربل آرش، وكوينز واي، وساوث كنزنجتون.

• حديقة ريجنت بارك

في جانب من هذه الحدائق يقع مسجد ريجنت بارك، الذي يعد واحداً من أكبر مساجد لندن. وهذه الحدائق عبارة عن مجموعة حدائق جميلة للغاية، وأجملها حديقة أزهار الروز، التي تتفتح بعشرات الألوان والأنواع من زهور الروز في الصيف إلى جانب بحيراتها التي تزدحم بأنواع نادرة من الطيور المائية.

تقع حدائق ريجنت بارك خلف متحف مدام توسو وهي تضم في قسم منها حديقة حيوانات لندن الشهيرة، وأقرب محطات قطار الانفاق لها هي بيكر ستريت، وريجنت بارك، وغريت بورت لاند .

• حديقة سانت جيمس بارك

الزائر للندن يفضل زيارة قصر بكنجهام، وهو القصر الذي تعيش فيه الملكة اليزابيث الثانية، ملكة انجلترا، بجانب هذا القصر تقع حديقة سانت جيمس بارك، التي تعد واحدة من اجمل حدائق لندن، حيث تحتل وسطها بحيرة تسبح فيها أنواع رائعة من الطيور.

ما يميز هذه الحديقة هي أنها تبقى مفتوحة طوال الليل والنهار على العكس من حديقتي الهايد بارك وريجنت بارك اللتين تغلقان ليلاً. للوصول إلى حديقة سانت جيمس بارك يستقل القطار تحت الانفاق إلى محطة سانت جيمس بارك.

• حديقة هولاند بارك

تقع هذه الحديقة بجانب الشارع التجاري الشهير هاي ستريت كنزنجتون، وأقرب محطة قطار اندر غراوند لها هي هاي ستريت كنزنجتون

حديقة حيوانات لندن

وهي واحدة من أشهر حدائق الحيوانات في العالم، لما تضمه من حيوانات متنوعة ونادرة وتجتذب اهتمام الزائرين للعاصمة البريطانية. تقع هذه الحديقة في جانب من ريجنت بارك وأقرب محطة قطار تحت الانفاق لها هي محطة سانت جونز وود .

طوق الياسمين · 26-03-2015, 03:43 AM

مااروعك

<<<نبيل شعيل

طيب بسألك عن افضل 3 مولات بلندن رتبيهم لي

يعني لو مارحتهم خسارة كبيرة

مممم طبعا سيلفردج و الهارودز خارج المنافسة

توبليرون · 26-03-2015, 04:54 PM

اقتباس : المشاركة الأصلية كتبت بواسطة طوق الياسمين

مااروعك

<<<نبيل شعيل

طيب بسألك عن افضل 3 مولات بلندن رتبيهم لي

يعني لو مارحتهم خسارة كبيرة

مممم طبعا سيلفردج و الهارودز خارج المنافسة

مولات ما رحت الا الوست فيلد في المنطقتين
ووالوايت ليدز وهومافي شي كثير الا سوبر ماركت مارك وسبنسر اهو الحلو فيه بس
اما المحلات في شارع اكسفورد تلاقين المحل من كذا طابق وحلووين

في مجمع ماركات ناسيه اسمه نفس الهارودز وسيلفردج

وفي شارع الريجنت محلات ماركات

وان شاءالله الي يعرف بلندن ومولاتها يرد يجاوبج افضل

شكراا للمتابعه الجميله

PjlgcJl · 26-03-2015, 05:05 PM

ياسلام اختي توني واصل من لندن ياحلوووو الديره

متابع معاج

توبليرون · 27-03-2015, 12:08 AM

اقتباس : المشاركة الأصلية كتبت بواسطة PjlgcJl

ياسلام اختي توني واصل من لندن ياحلوووو الديره

متابع معاج

حياك اخوي ياولد عطا
اي والله لندن حلووة وديرتنا احلى
شكراا لمرورك العطر

وجهات أوروبية · 29-03-2015, 01:32 AM

اقتباس : المشاركة الأصلية كتبت بواسطة طوق الياسمين

مااروعك

<<<نبيل شعيل

طيب بسألك عن افضل 3 مولات بلندن رتبيهم لي

يعني لو مارحتهم خسارة كبيرة

مممم طبعا سيلفردج و الهارودز خارج المنافسة

ههههههه حلوه تعتبر خساره كبيره

اختي طوق اهم شي هالمولات المذكوره
الهارودز وسلفردج و مجمع ويستفيلد بفرعيه الي صوب شبربوش والثاني في سترافورد

بس في مجمعين اذا عندكم وقت ممكن تزورينهم

1- King's Mall Shopping Centre
هذا موقعه بعد مستشفى كروومل وكأنكم رايحين بأتجاه الهاوي وي الي يروح هيثرو بتكون على اليمين
يعني تقريبا من كروومل اقل من عشر دقايق

عنوانه :

Kings Mall,
King Street,
Hammersmith,
London, W6 9HW

اقرب محطه مترو Hammersmith
الخطوط اللون الوردي والاصفر يوصلونكم

ارقام الباصات :

N11/H91/ 27 /N9/ 190/ 266/ 267/ 391
اسم محطه الباص الي تنزلين منها (Kings Mall Shopping Centre (Stop U

2- مجمع One New Change

محطه المترو St. Paul's
الخط الاحمر

ارقام الباصات 4/100/172/521
اسم محطه الباصات الي تنزلين منها (New Change Cannon Street (SM

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
باسم الله أبدأ ترتيب رحلتي الثانية إلى تركيا ، نستفيد من خبراتكم.	ابن بطوطة	تركيا	19	27-07-2015 08:19 AM
10 صور لن تصدق أنها في الوطن العربي !!!	أبوعبدالله (الاسفار )	البوابة السياحية	13	31-03-2015 03:17 AM