بسألك عن البحرين كيف أهل المنامة عادهم يذكروني (2019 )

هاوية الاسفار · 12-12-2019, 12:44 AM

المسبح كان واحد و كبير ما عندهم مسبح للأطفال للأسف و ولدي الصغير خاف يدخل

و هني على اليسار مواقف السيارات اللي من اليوم صارت مزدحمه

و طلعنا قبل المغرب باتجاه المحرق لكن قبلها مرينا البسيتين أختي تبغي محل للأسف طلع مسكر

و قعدنا نلف و ندور نلف و ندور أبغي سوق المحرق و دخلت السكيك و بالغصب طلعت

أدخل و أطلع من سكة لسكة دار راسي و ما عرفت أوصل السوق و شغلت قوقل ما عطاني

الموقع الصح تعبت و آخر شي قلت خلاص بنمر سوق الذهب لأنه كلموني و قالوا الطلب جاهز

سرت السوق و نزلنا أنا و أختي لأنه يوم الجمعه مستحيل نحصل موقف و قلنا ما بنتأخر

و حصلنا خياط و شفت فستان علم الامارات لليوم الوطني جاهز

صورت سناب و كل شوي حد يقول ابغي هالمقاس و شوفيلي هالمقاس بس الحمدلله

طلع لازم خياطه و الا ما فيني اقعد ادور قياسات

و عقبها دخلنا مجمع الذهب بس للأسف المحل فيه زحمه و طلعنا

تمشينا في كم محل و عجبنا شي ثاني قلنا بنرجعلك

و رجعت خذت الطقم اللي أبغيه و اللي عجبني بموظفين المحل خبروني

عن التاكس فري و قالولي اذا شفتي الستيكر الاخضر مكتوب عليه VAT اطلبي

منهم الفاتوره و خبريهم انج زايره و تبغين ترجعين التاكس في المطار ب

س للاسف تشرينا و خلصنا و محد خبرنا

و المحل الثاني قال اذا بتدفعين بالبطاقة باخذ عمولة زايده الافضل كاش و قلت له عن التاكس

فري قال ما عندنا بس اذا انتوا زوار ما بحسب لكم السعر مع الضريبه قلناله مشكور

بس طلعت برع السوق أدور مكينة سحب و زحمه فضيعه حتى عند الصراف

و خليت راعي المحل يمشي ويايه عشان اعطيه الفلوس و آخذ الطقم

ما أبغي أرجع داخل السوق

الحين وصل اليوع حده و أخترنا مطعم أوليفيتوا ايطالي و مشينا عل القارمن

هذيل كانوا في نفس مكان المطعم وصلنا و الا طلع لازم حجز و زحمه

و المكان لغير المدخنين محجوز بالكامل قال جربوا المكان الثاني اذا ما بتتأخرون

بس للأسف ما قدرنا نتحمل الريحه أصلا المدخل من دخلناه كله ريحة سجاير

و طلعنا ندور في نفس المنطقة و حصلنا هالمطعم

دخلنا طلع صيني و طلعنا منه بعدين حصلنا هذا ماما مايا سألنا عندكم مكان قال تفضلوا

شفنا المطعم فاضي قلنا شكلنا توهقنا بس يوم شفنا المنيو عجبونا الاصناف

المطعم مكون من 3 أدوار الدور الارضي قعدنا فيه الأول قال مختلط و شيشه

الدور الثاني عوايل قلنا نقعد في المكان الفاضي و شوي نشوف ناس داشه و ناس طالعه

و بعدها نسمع أصوات موسيقى و طرب و تشجيع

اخترنا هالطاولة في الزاويه

وصلت أولى الطلبات ورق عنب

فتوش

ناجتس للصغير

أصابع موزاريلا

سلطة يونانية

صحن مقبلات مشكلة

ريزوتو بالمشروم لي أنا وايد احبه

باستا ربيان لولد أختي

جيكن بتر مع العيش لأختي و ولدي

طبعا الطلب وايد لأن أختي تحب التبذير متعوده عليها دايما في المطاعم

الحمدلله شبعنا و الأكل كان لذيذ و طبعا خذنا الزايد و عطيناه عمال الفندق

و الأهم انه السعر كان وايد رخيص بصراحه ما توقعت هالمبلغ على كثر الطلب

و بين ما كنا قاعدين ناكل و نسمع أصوات الغناء و الطرب سألت العامل عندكم مطرب فوق

قال هيه و قمنا نطالع بعض و نقول وين احنا وين يايين المكان مشبوه

خلصنا و طلعنا برع و الشارع مزدحم و أشوف الناس يطالعون مستغربين و خاصة

إني أنا بنقابي و أقول الحين بيشكون فينا و قعدنا نضحك و نسولف بس ما قدرنا نطلع

من الشارع زحمة فضيعه كملنا يمكن نص ساعة و بعدنا ما مشينا كم خطوة

و أكتشفنا انه هذا مثل ممشى الجي بي آر عندنا بس الصراحة قلة أدب البنات و الشباب

يمشون وسط السيايير مع أنه في رصيف يقدرون يمشون عليه و جدام المطاعم في أماكن

مسببين زحمة عل الفاضي و في الأخير طلع المكان ورا فندقنا و مرينا من جدام

المطعم اللي تريقنا فيه الصبح بس خذنا تقريبا 45 دقيقة عشان نطلع من الزحمة

و على طول رجعنا الفندق كانت الساعه تقريبا 11

بس قلتلهم آخر يوم خلونا نسهر شوي و عيالي رقدوا بس طلعتهم و قلت لازم أرجع

سوق المحرق عشان أشوف المكان و نقدر نمر الصبح و نتشرى

الحمدلله عرفت المكان و وصلت بالضبط وين كنت أبغي بس طبعا كل مكان مسكر

و بعدين الأهل موصيني على التكة البحرينية فلازم أسوي الاوردر الحين

و مريت تكة بو شنب في المحرق و اتفقت وياه يجهزه الصبح و يغلفه عدل و يحطه

في الفريزر و خذنا صحنين ياكلون منه في السيارة

أعتقد طلبت دينارين بس طبعا الكمية كبيره بالنسبة لباقي الدول

و تذكرت اسكريم أميره كنا لازم ناخذه اذا يينا البحرين و نزل ولدي الدكان ( البقاله )

و الحمدلله حصلته و ما تم في خاطري و طعمه على ورد

و رجعنا الفندق الساعة وحده تقريبا ورانا قومه الصبح و مشاوير مهمة

مشيت لآخر الممر اكتشفت حوض السباحه في الدور الأول

و خلص يومنا اللي ضاع نصه في الشارع و في اللفلفه في المحرق

و نشوفكم في اليوم الأخير يوم السفر و العودة للوطن

دمتم بود

q8ya metnaqla, توبليرون و الايمان معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أين تذهب في البحرين في 2019	أم ريمه	بوابة البحرين	40	10-05-2024 04:04 PM
حبيبتي البحرين 2019	توبليرون	بوابة البحرين	87	02-12-2021 10:22 PM
فندق كمبنسكي البحرين ـ وحالياً فندق ويستن البحرين	Bu Rashid	بوابة البحرين	28	14-08-2019 09:21 PM
البحرين 2018 .. ماهو الجديد في البحرين	اسمر وغالي	بوابة البحرين	7	31-03-2019 08:07 AM
دليل فنادق البحرين و شقق البحرين رقم الهاتف و الايميل	عامر	بوابة البحرين	23	06-10-2018 12:55 AM