بسألك عن البحرين كيف أهل المنامة عادهم يذكروني (2019 )

هاوية الاسفار · 13-12-2019, 12:04 AM

صباح و مساء الخير على الجميع

اليوم السبت

12 / 10 / 2019

يوم العوده للوطن

أول شي قمت و صورت المسبح في النهار

و هذا الشارع جدام الفندق اللي لازم نطلع منه كل يوم

طلعنا الساعة 9 عشان نلحق نتريق و نتسوق قبل ما نسير المطار

وجهتنا كانت الافنيوز و بالتحديد مطعم بزه

وصلنا طبعا المول شبه فاضي و بعدها المحلات ما فتحت

بس المطعم ما شاء الله مزدحم و ما قدرت أصور الديكورات

بس هي نفسها اللي في الكويت بالضبط

طلبنا الريوق اللي دايما نطلبه في الكويت أعتقد البيت العود

و هذا طلب أختي و نسوا اييبونه الا بعد ما خلصنا الأكل و ما كان حلو

طلبت بيض بجبن قلاص بس هو فهم انها تبغي جبن قلاص و كان حاط ويا الطلب

نسيت أصور الفاتوره

و نسيت أخبركم انه ولدي من أمس تعبان و حرارته مرتفعه و للأسف ما كنت ماخذه

ميزان الحرارة و لا حتى خافض للحراره و نسيت أمر الصيدليه في الليل و الفندق فيه

محل عندهم أدويه و أسبرين و بندول بس ما عندهم للأطفال

طلعنا من المطعم على طول للصيدليه و خذت أدول و ما عندهم حتى ميزان لقياس

الحراره بس أنا كنت أعرف انها فوق 38 و شربته بالغصب الحمدلله بدت شوي تخف

حرارته و طلعنا على طول باتجاه سوق المحرق

و هذا لوز للأسف قلناله بنرجع ناخذ من عندك و نسينا

لأنه دخلنا حلويات شويطر و قعدنا يمكن ساعة نشتري حلوى و ماي النعناع

ضروري للشاي المغربي أحب أحط وياه و خذنا بسكوت و بهارات و متاي من محل ثاني

و بعدها دخلنا محل جلابيات و خذنا المقسوم و خلصنا و اتصلت في راعي التكة

و قال الطلب جاهز مري خذيه طبعا الجو حار و الشمس صقعت روسنا بس عيالي

خليتهم في السياره ويا ولد أختي و ما لقينا مواقف للسياره

رجعنا الفندق و قلتلهم كم نقدر نقعد لأني أمس كلمتهم قالوا لين الساعة ثنتين

بس بعدنا ما خلصنا اغراضنا و أعتقد الساعة كانت وحده و نص

قالت بعد الساعه ثنتين تدفعين دينارين لكل ساعة قلت مب مشكله بنطلع

الساعة ثلاث قالت ادفي أربع دنانير للغرفتين و دفعت و على طول رجعنا نرتب

الاغراض و خذنا كرتون من محل تايلوس في المحرق و كنت ماخذه هدايا حق الروضه

عشان يستانس ولدي و يهدي ربعه اللي وياه في الصف و بسرعه خذنا شور عالسريع

طبعا بالدور و طلعنا الساعة 3 بالضبط و على المطار

وصلت صالة المغادرين و اتصلت على مكتب الايجار و خليتهم يستلمون السياره

و يدفعون الدينار اللي دفعته حق المواقف و قلتله مره ثانيه ما بنأجر من عندكم

دخلنا و الحمدلله الاجراءات سريعه و الوزن بالضبط قد اللي عندنا 120 كيلو

بس شوي زحمه و مرينا السوق الحره

توجهت لمكتب التاكس فري و بيكون مكانه عدال ماكدونالدز عقب السوق الحره

سألت الموظفه من متى عندكم التاكس فري قالت من شهر 3 يعني بعدهم ما كملوا سنه

و طبعا قلنا بنتغدى ما عندهم غير ماكدونالذز و جسميز و أكيد خذنا جسميز ما يستوي

نوصل البحرين و ما ناكل من عنده

و هذا الكراش من أمس أختي ماخذتنه و في الثلاجه اليوم شربته

توبليرون, q8ya metnaqla و الايمان معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
أين تذهب في البحرين في 2019	أم ريمه	بوابة البحرين	40	10-05-2024 04:04 PM
حبيبتي البحرين 2019	توبليرون	بوابة البحرين	87	02-12-2021 10:22 PM
فندق كمبنسكي البحرين ـ وحالياً فندق ويستن البحرين	Bu Rashid	بوابة البحرين	28	14-08-2019 09:21 PM
البحرين 2018 .. ماهو الجديد في البحرين	اسمر وغالي	بوابة البحرين	7	31-03-2019 08:07 AM
دليل فنادق البحرين و شقق البحرين رقم الهاتف و الايميل	عامر	بوابة البحرين	23	06-10-2018 12:55 AM