11-05-2021, 03:13 PM
|
#11 |
مسافر متميز
تاريخ التسجيل : Sep 2015 رقم العضوية : 6071 الدولة : قطر العز الجنس : ذكر المشاركات : 103
| 
Lax Airport 
الحمدلله الطيارة نزلت في مطار لاكس بخير وسلامه، وبعد ماتوقفت المحركات وانفتح الباب على خرطوم المطار سحبنا شناطنا وتوجهنا الى اخر محطه متعبة بالسفر واللي هي كاونتر الجوازات، طبعا الطابور كان طويل بشكل خيالي فالواحد بين تعب السفر وتعب الوقفه في الطابور وصوت صياح اطفال غير الف فكره وفكره في راسه عن الاسئله اللي راح يسألها اياه موظف الجوازات فالاعصاب كانت نوعا ما متوتره.  
لكن الحمدلله بدا الطابور بالتدريج يخف لحد ماوصلنا لمكان فيه اجهزة خدمة ذاتيه دخلنا فيها الجوازات وعبينا البيانات وبعدها طبعت لنا ورق حطيناه مع الجوازات وتوجهنا لضابط الجوازات، طبعا كانت اسئله خفيفه كان الضابط سمح للامانه جلس يسولف ويضحك معانا وبعدها سمعنا صوت ختم الجوازات السته طاخ طاخ بعدها اهلا وسهلا بكم في لوس انجلوس بعد هالكلمة كل التعب راح وتوجهنا على طول الى استلام الشنط واستلمناها بحمدالله. 
بعدها خرجنا من المطار وكنا ندور على اللافتات اللي تدل على منطقة باصات النقل اللي توصل المسافر لمكاتب ايجار السيارات(معلومة للي ماوصل من قبل على مطار LAX، مكاتب او شركات ايجار السيارات ماتكون في مبنى المطار تكون في منطقة تبعد عن المطار ممكن 15 دقيقه وطبعا يكون الذهاب لها من خلال باصات نقل مجانية خاصة بكل شركة) حصلنا اللافتة اللي تدل الى مكان الباصات وجلسنا نتبع الارشادات تقريبا مشينا 20 دقيقه لان كنا نسحب شناطنا معانا، المهم وصلنا على رصيف مكتوب عليه اسمه الشركه اللي استأجرنا منها السيارة Thrifty انتظرنا لدقايق لحد ماوصلنا الباص وركبنا فيه وصفينا شنطنا داخل الباص وتوجهنا الى مكتب الايجار.  
بعد ماوصلنا لمكتب ايجار السيارات انتظرت في طابور لحد ماوصلت للكاونتر عطيتهم رقم الحجز والجواز والليسن القطري وبطاقة الائتمان ، خلال 10 دقايق خلصنا الاجراءات وتوجهنا للساحة الخلفية للشركة واستلمنا السيارة وكانت مثل ماطلبنا شيفرولية سوبربان، الحمدلله السياره شالت 11 شنطة (6 شنط كبيرة و 5 شنط صغيرة كابن)، ركبنا السيارة وطلعت من شنطتي الباك باق جهاز الملاحة قارمن (طلبته من امازون قبل السفر بخرايط امريكا، انا بالعادة كنت استعمل القوقل ماب من الجوال بس بهذا بصراحة جهاز القارمن كان احسن من حيث
ان الشاشه اكبر وفي نفس الوقت اوفر شاحن الجوال) المهم دخلت عنوان السكن في غرب هوليوود وتوكلنا على الله.  |
|  |
345الاعجاب
العرض الشجري
المواضيع المتشابهه 
