رِحلَة كُوريَا الجَنوبيَّة - ( سِيئُول + جيجُو ) - يُوليُو 2022 - الصفحة 3

AL Tunaiji · 31-01-2023, 04:08 PM

تقرير مفيد ومعلومات قيمة نحن بانتظارها

كوريا الجنوبية الوجهة القادمة لي ولكن ما زلت أبحث عن بعض التفاصيل

برامج القيادة والخرائط kakao map و naver map ، هل يمكن إستخدامها وإضافة الإحداثيات بها

هل لديكم خلفية عن برامج القيادة الأخرى مثل Sygic و Garmin هل تعمل بشكل جيد هناك

أخطط لجولة في ربوع كوريا الجنوبية أزور فيها معظم المقاطعات

حاليا تم تخفيف بعض الإشتراطات وإلغاء فحص PCR

آخـــرفـــرصـــة, توبليرون, Boarding Pass و 1 آخرون معجبون بهذا.

Boarding Pass · 01-02-2023, 06:01 AM

اقتباس : المشاركة الأصلية كتبت بواسطة AL Tunaiji

تقرير مفيد ومعلومات قيمة نحن بانتظارها

كوريا الجنوبية الوجهة القادمة لي ولكن ما زلت أبحث عن بعض التفاصيل

برامج القيادة والخرائط kakao map و naver map ، هل يمكن إستخدامها وإضافة الإحداثيات بها

هل لديكم خلفية عن برامج القيادة الأخرى مثل Sygic و Garmin هل تعمل بشكل جيد هناك

أخطط لجولة في ربوع كوريا الجنوبية أزور فيها معظم المقاطعات

حاليا تم تخفيف بعض الإشتراطات وإلغاء فحص PCR

شكراً جزيلاً

بإذن الله .. ربي ييسر لك ..

برامج الخرائط مثل KAKAO MAP وَ NAVER MAP هم يستعملونها في سياراتهم ، و KAKAO MAP بالنسبة لي أفضل لأن NAVER MAP أغلب المحلات تكون باللغة الكورية ..
بس بالنسبة لي إذا راح أطلع أمشي أحب NAVER MAP لأنه أوضح و طريقته حلوة ..

أما برامج القيادة الأخرى مثل Sygic و Garmin فهي إليـن تاريخ رجعتنا ما تشتغل هناك أبداً ..
أخوي بالعادة لما نسافر أي مكان ، يحب يستأجر سيارة و نسوق و الوضع يصير مريح ، و لكن هالمرة كان عنده كورس لأدوية معينة ممنوع إنه يسوق في حال أكلها ، و ما تحمس هالمرة يأجر لأنه بـ 2018 في سيئول تم الرفض من كم مكتب للتأجير ، بس اللحين عادي ..
و في جيجو طلب من السواق إنه يجرب يودينا للفندق و كنا قريبين له و ودانا و جاز له الوضع ( معاه رخصة دولية ) .. بس السائق قال له إنه أغلب المكاتب في جيجو ترفض تأجر للسائح الأجنبي للحين ، مدري ليه !

حلوة الرحلة بالسيارة في كوريا ، و لكن تحتاج تخطيط .. مثلاً إذا تبغى بوسان أفضل تآخذ قطار من سيئول و تستأجر هناك ( 3 ساعات بالقطار = 200 ريال ) ، لأن البنزين غالي جداً فبالتالي أوفر القطار ، و تجربة حلوة ..
و المقاطاعات الأخرى عندك Gyeonggi فيها جزيرة نامي و القرية الفرنسية .... إلخ ، و تحصل فيها فنادق ، فيها أودية و حدائق و آكتيفيتيز رياضية كثير ، و متعودين على السياح ..
و كذلك عندك Gangwon ، أذكر كانت تبعد بالسيارة 3 ساعات أو 4 ، و الظاهر فيها فنادق ..
و جيجو كذلك تروح لها بالطائرة ، و ما أعرف إذا يمديك عن طريق البحر أو لا !

أهم شيء تتأكد إن المقاطعة أو المنطقة اللي بتروح لها فيها أماكن تجلس فيها ، لأن أغلب سكانها كبار سن ، و لسى كبار السن و هم بسيئول يستغربون السائح بشكل عام ، فما بالك بالقرى !

و بالنسبة للإشتراطات فعلاً فقط حالياً تصريح السفر الإلكتروني K-ETA .

حيّاك الله

AL Tunaiji, Abu Muataz, um Muataz و 5 آخرون معجبون بهذا.

AL Tunaiji · 01-02-2023, 03:18 PM

اقتباس : المشاركة الأصلية كتبت بواسطة RAYYANAH

شكراً جزيلاً

بإذن الله .. ربي ييسر لك ..

برامج الخرائط مثل KAKAO MAP وَ NAVER MAP هم يستعملونها في سياراتهم ، و KAKAO MAP بالنسبة لي أفضل لأن NAVER MAP أغلب المحلات تكون باللغة الكورية ..
بس بالنسبة لي إذا راح أطلع أمشي أحب NAVER MAP لأنه أوضح و طريقته حلوة ..

أما برامج القيادة الأخرى مثل Sygic و Garmin فهي إليـن تاريخ رجعتنا ما تشتغل هناك أبداً ..
أخوي بالعادة لما نسافر أي مكان ، يحب يستأجر سيارة و نسوق و الوضع يصير مريح ، و لكن هالمرة كان عنده كورس لأدوية معينة ممنوع إنه يسوق في حال أكلها ، و ما تحمس هالمرة يأجر لأنه بـ 2018 في سيئول تم الرفض من كم مكتب للتأجير ، بس اللحين عادي ..
و في جيجو طلب من السواق إنه يجرب يودينا للفندق و كنا قريبين له و ودانا و جاز له الوضع ( معاه رخصة دولية ) .. بس السائق قال له إنه أغلب المكاتب في جيجو ترفض تأجر للسائح الأجنبي للحين ، مدري ليه !

حلوة الرحلة بالسيارة في كوريا ، و لكن تحتاج تخطيط .. مثلاً إذا تبغى بوسان أفضل تآخذ قطار من سيئول و تستأجر هناك ( 3 ساعات بالقطار = 200 ريال ) ، لأن البنزين غالي جداً فبالتالي أوفر القطار ، و تجربة حلوة ..
و المقاطاعات الأخرى عندك Gyeonggi فيها جزيرة نامي و القرية الفرنسية .... إلخ ، و تحصل فيها فنادق ، فيها أودية و حدائق و آكتيفيتيز رياضية كثير ، و متعودين على السياح ..
و كذلك عندك Gangwon ، أذكر كانت تبعد بالسيارة 3 ساعات أو 4 ، و الظاهر فيها فنادق ..
و جيجو كذلك تروح لها بالطائرة ، و ما أعرف إذا يمديك عن طريق البحر أو لا !

أهم شيء تتأكد إن المقاطعة أو المنطقة اللي بتروح لها فيها أماكن تجلس فيها ، لأن أغلب سكانها كبار سن ، و لسى كبار السن و هم بسيئول يستغربون السائح بشكل عام ، فما بالك بالقرى !

و بالنسبة للإشتراطات فعلاً فقط حالياً تصريح السفر الإلكتروني K-ETA .

حيّاك الله

ما شاء الله ، باين عندكم معلومات وتفاصيل دقيقة

سبق أن بحثت وقرأت مقارنات بين برامج القيادة في كوريا ولكن أنا أعتمد على الإحداثيات التي جمعتها عن كوريا

برامج kakao map و naver map لست متأكد من إمكانية إستخدام الإحداثيات بها ، وليست كل المواقع مسجلة باللغة الإنجليزية

أيضا يمكن إستخدام رقم الهاتف للوصول للموقع المطلوب ولكن هذا غير مضمون لكل المواقع

قضيت فترة طويلة أبحث وأعمل دليل سياحي لكوريا ووجدت مواقع سياحية كثيرة وخيالية منتشرة في ربوع كوريا ومجهولة للعرب

وكذلك بحثت عن المطاعم المناسبة ، أغلبها يقع في أحياء تسكنها جالية مسلمة ، كما وجدت بعض المحلات التي تبيع المواد الغذائية الحلال

أعتقد أني أحتاج أحدث هذا الدليل وأضيف أرقام الهواتف

الرحلة الأولى ستكون مغامرة واستكشافية وستكون بعدها رحلة عائلية إذا وجدتها تناسب العائلة

جربت مرة واحدة إستخدام وسائل المواصلات من قطارات ومترو في تايوان بعد تجربة القيادة ، صراحةً أفضل أتحمل تكلفة الوقود وبوابات الرسوم المنتشرة في كوريا وأستمتع بالقيادة والوصول المباشر لكل المواقع

بالرغم من الموقف السلبي لسواق الأوبر إلا أن هذا الموقف يعطي إنطباع إيجابي عن البلد والنظام والشرطة والشركة بخلاف دول أخرى

Boarding Pass, توبليرون, آخـــرفـــرصـــة و 1 آخرون معجبون بهذا.

Boarding Pass · 01-02-2023, 05:20 PM

اقتباس : المشاركة الأصلية كتبت بواسطة AL Tunaiji

ما شاء الله ، باين عندكم معلومات وتفاصيل دقيقة

سبق أن بحثت وقرأت مقارنات بين برامج القيادة في كوريا ولكن أنا أعتمد على الإحداثيات التي جمعتها عن كوريا

برامج kakao map و naver map لست متأكد من إمكانية إستخدام الإحداثيات بها ، وليست كل المواقع مسجلة باللغة الإنجليزية

أيضا يمكن إستخدام رقم الهاتف للوصول للموقع المطلوب ولكن هذا غير مضمون لكل المواقع

قضيت فترة طويلة أبحث وأعمل دليل سياحي لكوريا ووجدت مواقع سياحية كثيرة وخيالية منتشرة في ربوع كوريا ومجهولة للعرب

وكذلك بحثت عن المطاعم المناسبة ، أغلبها يقع في أحياء تسكنها جالية مسلمة ، كما وجدت بعض المحلات التي تبيع المواد الغذائية الحلال

أعتقد أني أحتاج أحدث هذا الدليل وأضيف أرقام الهواتف

الرحلة الأولى ستكون مغامرة واستكشافية وستكون بعدها رحلة عائلية إذا وجدتها تناسب العائلة

جربت مرة واحدة إستخدام وسائل المواصلات من قطارات ومترو في تايوان بعد تجربة القيادة ، صراحةً أفضل أتحمل تكلفة الوقود وبوابات الرسوم المنتشرة في كوريا وأستمتع بالقيادة والوصول المباشر لكل المواقع

بالرغم من الموقف السلبي لسواق الأوبر إلا أن هذا الموقف يعطي إنطباع إيجابي عن البلد والنظام والشرطة والشركة بخلاف دول أخرى

جلست أبحث قبل شوي لقيتهم يستعملون كذلك برنامج إسمه T Map ، تبع SK Telecom ..
و سألت أهلي إذا شافوا السيارات اللي نركبها وش يستعملون قالت أختي إنه فيه واحد استعمل naver map ، لأنه كان يبي يسألها عن شيء و طلع من الماب و دخل المترجم و شافته لما رجع فتح الماب ..
قبل السفر كان فيه لستة مقاهي و محامص قهوة نبيهم ، حملت kakao map و حددت فندقنا و حددت الأماكن اللي نبيها و حفظتها ، و اشتغل هناك من أبدع ما يكون ، و لكن مشي !
كذلك عندي صديقة كورية بسألها اليوم إن شاء الله بموضوع السيارة و نتأكد لك حتى بإذن الله كان تيسر و استأجرت نكرر التجربة حنّا إن شاء الله

صدقاً ما قد جربنا نستأجر سيارة نهائياً في شرق آسيا ، و أتوقع السبب إنه سفراتنا لهم تكون سريعة و ما نقرر زيارة إلا مدينة أو ثنتين ! و كذلك المواصلات فيها سريعة و كثيرة و سهلة

و لكن من باب التجربة جرّب قطار بوسان ، حتى في حال سافرت مع العائلة الكريمة تقرر تكون سيارة أو قطار

و المترو والباص في كوريا جداً أمان و نظيف و مرتب و ماقد شفت أي محاولة للسرقة أو التعرض لأحد بأي شكل كان ، يعيبه الزحمة في أوقات الذروة !

واجهنا موقف مشابه في هونج كونج بالنسبة للتاكسي ، بس ردة فعل الشرطة كان نوعاً ما خرابيط

صح فيه مكان كنت حابة نجربه مرة ، اسمه Bukhansan National Park ، منطقة تسلق جبال و تخييم ، صورها حلوة حلوة حلوة ، تأجر فيه زي الخيمة أو الغرفة الصغيرة و تجلس كم يوم ، مخيم كشخة على معسكر ! و لكن أخوي كان مُحدد له عملية للركبة فخفت إنه يجاملنا و نروح و يتعب أكثر ! حتى ماركزت هي بكوريا الشمالية أو الجنوبية !

AL Tunaiji, توبليرون, namareq و 3 آخرون معجبون بهذا.

AL Tunaiji · 02-02-2023, 03:32 PM

اقتباس : المشاركة الأصلية كتبت بواسطة RAYYANAH

جلست أبحث قبل شوي لقيتهم يستعملون كذلك برنامج إسمه T Map ، تبع SK Telecom ..
و سألت أهلي إذا شافوا السيارات اللي نركبها وش يستعملون قالت أختي إنه فيه واحد استعمل naver map ، لأنه كان يبي يسألها عن شيء و طلع من الماب و دخل المترجم و شافته لما رجع فتح الماب ..
قبل السفر كان فيه لستة مقاهي و محامص قهوة نبيهم ، حملت kakao map و حددت فندقنا و حددت الأماكن اللي نبيها و حفظتها ، و اشتغل هناك من أبدع ما يكون ، و لكن مشي !

وهذا إن شاء الله اللي بسويه

كذلك عندي صديقة كورية بسألها اليوم إن شاء الله بموضوع السيارة و نتأكد لك حتى بإذن الله كان تيسر و استأجرت نكرر التجربة حنّا إن شاء الله

إذا تأكدنا من موضوع الإحداثيات بتتسهل أمور كثيرة

صدقاً ما قد جربنا نستأجر سيارة نهائياً في شرق آسيا ، و أتوقع السبب إنه سفراتنا لهم تكون سريعة و ما نقرر زيارة إلا مدينة أو ثنتين ! و كذلك المواصلات فيها سريعة و كثيرة و سهلة

أغلب شرق آسيا القيادة من جهة اليمين لذلك قليل من يفكر باستئجار سيارة ، تايوان مختلفة وتجمع بين أوروبا وشرق آسيا والقيادة من جهة اليسار ، لذلك القيادة بها ممتعه ومفيدة والأجهزة الملاحية تعمل بها مثل الجارمن وجوجل ماب ، أنصحكم بزيارتها

و لكن من باب التجربة جرّب قطار بوسان ، حتى في حال سافرت مع العائلة الكريمة تقرر تكون سيارة أو قطار

و المترو والباص في كوريا جداً أمان و نظيف و مرتب و ماقد شفت أي محاولة للسرقة أو التعرض لأحد بأي شكل كان ، يعيبه الزحمة في أوقات الذروة !

ما يمنع نجربه للمناطق المزدحمة وقليلة المواقف

واجهنا موقف مشابه في هونج كونج بالنسبة للتاكسي ، بس ردة فعل الشرطة كان نوعاً ما خرابيط

صح فيه مكان كنت حابة نجربه مرة ، اسمه Bukhansan National Park ، منطقة تسلق جبال و تخييم ، صورها حلوة حلوة حلوة ، تأجر فيه زي الخيمة أو الغرفة الصغيرة و تجلس كم يوم ، مخيم كشخة على معسكر ! و لكن أخوي كان مُحدد له عملية للركبة فخفت إنه يجاملنا و نروح و يتعب أكثر ! حتى ماركزت هي بكوريا الشمالية أو الجنوبية !

بالنسبة لمناطق التخييم كانت تظهر لي بعضها في الغابات وقرب الأنهار ولكن كنت أتجاهلها وأركز على المنتجعات العائلية والشقق المفروشة

بالنسبة لمناطق الهايكنج أدون المميز منها عندي لزيارتها في يوم ما

أعتقد زيارة كوريا تحتاج موبايل خاص أركب فيه شريحة كورية وأنزل برامج خاصة بكوريا وأخزن فيه الصور لأن موبايلي ما بيتحمل

Boarding Pass, توبليرون, آخـــرفـــرصـــة و 1 آخرون معجبون بهذا.

Boarding Pass · 01-02-2023, 12:17 AM

العــودة إلى سيئـول

20 يوليو :
Shinsegae Premium Outlets Paju

قمنا و الشمس لسّى ما طلعت و الجو يجنن .. ضباب ! سوينا التشيك آوت ، و لقينا سيارة ثانية مختلفة عن اللي دائماً و سواق مختلف ، جلس يسولف معنا .. يقول كنت اشتغل في السعودية من زمان في بناء و حفر الطُرق مع أحد الشركات ، و جلس يسولف ، حليل مرة

وصلنا المطار و كان كل شيء سهل و ميسر الحمدلله .. و هالمرة نمنا كلنا في الطيارة و لا حسينا بشيء ! وصلنا و توجهنا للفندق ، كان المطار الداخلي بعيد ، فكملنا نوم في السيارة !

وصلنا الفندق و كان وقت التشيك إن كان الساعة 3 العصر ، و قبل كذا تدفع مبلغ قيمته 300 ريال للدخول للغرف قبل الوقت ، قلنا بنزّل الشنط و نخلص الإجراءات يصير بس يبقى الدخول !
حجزنا عبارة عن حجزين منفصلين بس كلهم بإسمي .. ثلاث غرف ، بس الحجز الأول غرفتين ، و الحجز الثاني غرفة .. فتلخبطت الموظفة مرة ! و مع سوء اللغة اللي عندهم ما قدرت تستوعب و أخذنا وقت نناظر بعض بصمت و هي مو مستوعبة اللفة ! عطيناها رقم الحجز و ما مشى الوضع ، الزبدة يالله يالله فهمت ! و اعتذرت لنا و انحرجت ، و كاعتذار منها عن الحوسة اللي صارت دخلتنا الغرف على طول

الفندق :
8 ليال ( من 20 يوليو - 28 يوليو / سيئول )
LOTTE City Hotel Myeongdong
4 نجوم - LOTTE City Hotel Myeongdong
تم الحجز عن طريق موقع بوكينق .
الغرف :
2 غرفة سوبيريور توأم .
1 غرفة سوبيريور توأم عائلية .
السعر :
8994 ريال .
أسكن فيه مرة ثانية ؟
أحس لا ، الغرف كئيبه شوي و ضيقة و مستهلكة ، لما أروح عند أمي أصلي فوق السرير من صغر المساحة الغرفة مستطيلة .. بس الحق ينقال موقعه كان حلو ، بس مو أحلى من موقع الأول أبداً ، و لو بنروح إن شاء الله مرة ثانية راح نجرب فنادق جديدة .. و بالنسبة لي أهم شيء تكون في منطقة ميونق دونق .

فيه مدخلين للفندق ، واحد على حارة و الثاني على الشارع .

رحنا و ارتحنا شوي بس كنا جوعانين و ما فيه طاقة نطلع و النوم حالف ما يتركنا هاليوم ، قالت أختي الصغيرة إنها شافت مطعم في اللوبي حلال .. اسمه زعفران ، غير عن زعفراننا طبعاً ، بس قررنا نتغدى فيه ، حلو الحمدلله .
و حنّا في جيجو كلمتني موظفة من الشركة اللي نظموا رحلتنا في جيجو ، اسمها الكوري صعب و اسمها اللي تتواصل فيه مع العرب مديحة و قالت ودّي أستقبلكم في الفندق أنا و باقي الموظفين إذا ممكن ! و فعلاً جو و سلمنا عليهم السلام و كان سلام نظر بحكم إن الكوريين ما يصافحون بعض أو يحضنون بعض ! ما دريت إلا قالت لي " لا يا حبيبتي هذا مو سلام ! تعااالي " و الوضع قلب خمخمة ! جو 3 موظفات و 3 موظفين ، يجننوووووووون و لطيفين جداً و كانوا متحمسين و هم يسولفون ! و كلهم لهم أسماء عربية .. أشوف اللي سووه شيء جميل جداً ، و تسويق للشركة .. و كلمة حق لما اتفقت معهم عشان جيجو دخلوني قروب فيه 4 موظفين ( مديحة وحدة منهم ) عشان لو بغيت شيء و أنا في جيجو أو عندي ملاحظات على السواق ، لكن حتى في سيئول لما نحتاج نسأل عن أي شيء كانوا يتجاوبون بسرعة و ساعدوني كذا مرة والله .. بدون مقابل و بنفس حلوة ! حتى يتطمنون علينا بين فترة و فترة ! صدقاً حتى وصولنا للرياض ! .. عيبهم ارتفاع سعرهم نوعاً ما !

بعدها راح أخوي و خواتي يتمشون و يجيبون الشنط اللي في الفندق الأول ، و مرّوا على مقهى HOLLYS ..

و أمي راحت للآوت لت .. تقريباً يبعد ساعة .. طلبنا لها آوبر و أخذت شنطة كبيرة عشان ما تبلَش بالعفش .. قلت لها صوري لي المكان و كذا ، قالت أبشري و صورت لي صورة وحدة جزاها الله خير للآوت لت .. و صورة لشنطة السيارة حقت آوبر معلق فيها سمكة ( يعتقد إنها تحميه ) ، و نشبنا لها تآكل شيء عشان ما تتعب و صورت لنا عشان نصدقها و صورت لنا الأشياء اللي أخذتها لنا من المخبز

في سيئول كثييير أسواق آوت لت و لكن من التجربة الأولى لنا في 2018 ما استفدنا إلا من هذا فقط فقررت إنها تروح له هو فقط

و أنا نزلت أتعرف على المكان الجديد و الدواعيس الحلوة و اكتشفت إنه فيه ممشى يخترقه نهر قريب جداً من عندنا ، رحت أخذت من باسكن روبنز و رجعت أقعد فيه

رجعوا متأخر كلهم و سهرنا و كلّمنا أخواني اللي في الرياض و جلسوا يسولفون لنا عن الصلخ و الحرارة اللي عندهم و بعدها تعشينا و رتبنا أغراضنا و نمنا .

21 يوليو :
namdaemun market
Starfield Coex Mall

راحت أمي و أختي الصغيرة لـ namdaemun market و أنا و الباقين رحنا لأكثر محل مشهور عندهم يبيع البينغ سو عنده فروع كثيرة و مبدعيـن فيه مرة ! مليون شكل ! أخذنا اللي بالتيراميسو ( الكمية اللي يقدمونها المطاعم و المقاهي كبيرة مرة مرة ، و يستغربون إننا نآكل مع بعض ، و أحياناً يبقى و يجون يسألون إذا الطبق فيه مشكلة أو لا ) .

و بعدها رجعنا للفندق و أمي كذلك لأننا بنروح لـ Starfield Coex Mall .. طلبنا سيارتين آوبر و حركنا للمول ، بعيد طبعاً ! لما وصلنا تفرقنا في هالمول عشان كل أحد يتقضى براحته و لأن كل شخص يحب شيء معين .. بالإضافة التقضّي مع أمي مُهلك مُبكي غير مُحتمل ! لما تشوف أي قطعة أحسها تجلس تتناقش معها و تشوف إذا حبتها أو لا ! و تقلبها يمين و يسار ، من بعيد و من قريب ! وقتها أنصهر و أصيح من جوّا بس لا أستطيع أن أنطق ببنت شفه لأنها أمي ! فـمن زمااان متفقين أنا و هي اتفاق تتفرج وتنقّي و تصور اللي تبيه و تأخذ راحتها تماماً و أنا أنتظرها في أي مقهى و لما تخلص أروح أجمعهم و أحاسب ! و أختي الصغيرة لا تهون بس تخلص بسرعة أما أختي الثانية و أنا نحب نتمشى و نتقهوى و نتفرج على الرايح و الجاي و نتطمش على الخلق و نتعرف على العالم و نفصفص المكان فصفصة و إذا أحد كلمنا نروح له في حال بيأخذ رأينا بشيء و إذا شفنا شيء حلو بالطريق أخذناه .. مبسوطين أنا و هي ! أما أخوي مسكين يتنقل بين الجميع و معاه شنطة للأغراض !

قهوة بين الأشواط

و أنا و أختي نتمشى لقينا P. F. Chang's ، قلنا نشوف المنيو في حال متوفرة أطباق seafood ؛ عشان نكلم أهلي نتعشى فيه .. دخلنا شيكنا على المنيو و انتبهت أختي إن اللحوم تبعهم مستوردة من أمريكا ، سألناهم و جاء المدير و أكد على هالشيء ! لمّا خلصوا أهلي رجعنا كلنا و تعشينا غداعشاء ، طلبنا كان 2 داينميت شريمب و 2 منغوليان بيف و 1 نودلز خضار و الأسعار نصف أسعارنا والله ! طبعاً الصورة الفقيرة من تصوير أمي حياتي ( الصورة فيها كل شيء إلا العشاء )

طلبنا آوبر و رجعنا للفندق و جلسنا نتفرج على الأغراض و طلعت أمي شارية فستان مرتين واحد أنا حاسبت عنه و الثاني أخوي حاسب عنه ، فقررت أمي إننا نطقم لا رجعنا للرياض

توبليرون, AL Tunaiji, ملاك و 5 آخرون معجبون بهذا.

Boarding Pass · 01-02-2023, 02:37 AM

22 يوليو :
Namsan Seoul Tower
Myeong Dong Market

قمنا الصباح و جلسنا نتقهوى أنا و أمي قهوة تركي و حقيقةً هالفقرة من أمتع الأشياء لنا الصباح .. أما الباقيين نزلوا يتقهوون برَّا قالوا لنا فيه محل ظريف ننزل نفطر فيه ، فطور خفيف .. نزلنا أنا و أمي له و كان يبيع خبز bagel بخمس أو ستة نكهات ، و يومياً عندهم نكهة مختلفة جديدة ، اسمه 4B .. يسوونها لك ساندوتش في حال تبيها ساندوتش أو بتاخذها سادة .. و فيه ثلاجة فيها كريمة تشيز حالية بنكهات مختلفة إذا تبي تدهنها مع bagel .. المخبز مُقابل الكوفي ..
طلبنا كابتشينو لأنهم موفرين حليب " لاكتوز فري " ، كانت القهوة لذيييذاة والـ bagel ألذ .. أمي خافت ما يعجبها و ذاقته معي و طلبت واحد لها .. و أخواني أخذوا آيس دريب و قالوا لذيذة ..

قررنا نروح لبرج نامسان ، و لكن هالمرة قررنا نروح له بالتلفريك لأن المؤمن لا يلدغ من جحر مرتين !
السفرة اللي قبل قلت لأخواني خلّونا نرقى للبرج مشي جو حلو و خضرة و وجه حسن وَ راح نستمتع و اقتنعوا ! صراحةً ما كنت أدري عن المسافة و ما كنت أدري إنها طَلعـة مرتفعة جداً جداً ! أحسب الموضوع ظريف فأخذنا تقريباً ساعة و نصف و حنّا نرقى هالدحديرة ! و ما أسمع غير هواش من أخواني و صراحة معهم حق لأني قايلة لهم ازهلوها بهالمشوار ، لا تبحثون عن شيء ، كله علي .. الدحديرة توجع الظهر مرة و الحمدلله أمي ما راحت معنا و إلا كان تعذّبت نفسياً .. و العالم اللي تمشي فيه رياضين فقط ! و ما فيه و لا سائح مَـر ! و لما خلصنا من الزيارة للبرج ، بلشنا بالرجعة لأنها من نفس المكان ! و ما قلت لهم إن طريق الرجعة نفسه خليتها مفاجأة لهم .. الصدق كانت سريعة و طيران ! و اليوم اللي بعده ما قدرنا نتحرك أبد و جابت لنا أمي كريمات للعضلات ! عشان كذا قررنا هالمرة تلفريك .

كانت محطة التلفريك تبعد عن الفندق ثلاثين دقيقة ، قريبة جداً لفندقنا القديم ، أقل من 10 دقايق .
و حنا ماشيـن لها لقينا محل قهوة تبيه أختي ، دخلت هي و أخوي له ، و بياخذون المشروب تيك آواي .. قلنا نسبقهم ، و الطريق كان يقطع ميونق دونق ماركت ، و نمشي و نمشي و نمشي و الوضع طبيعي ، إلين قابلتنا دحديرة ! مبخوتين بالدحديرات ! كانت محطة التلفريك في الأحياء بين بيوتهم ، بس هي مرة مرتفعة ، الدحديرة كل مالها و تصير تقصف الظهر بس المدة كانت قليلة في الدحديرة ، أبو 10 دقايق بس .. خفت على ظهر أمي و سألتها إذا تعبت و تبي آوبر بس عيّت و الحمدالله الوضع مشى لأننا جلسنا نتفرج على بيوتهم و نصورها و ندخل المحلات اللي في الحارة .. بس يوم شفت الدحديرة كلمت أخوي و أختي و قلت لهم يآخذون آوبر لأن أخوي عنده مشاكل في الركبة و خفت توجعه زيادة ..

وصلنا .. وصلنا

لما وصلنا أخذنا التذكرة للشخص رايح جاي بـ 13000 وون ( 36 ريال ) ، و فيه تذكرة للروحة فقط بـ 11000 وون ( 30 ريال ) .. و كذلك فيه طريقة للدخول عن طريق الـ shuttle bus بـ 2000 وون ( 7 ريال ) ..

ركبنا التلفريك و هذا المدخل اللي خليتهم يرقونه أول مرة و مدري وين نهايته

شرينا أقفال عشان كلن يكتب اللي يبي بـ 9000 وون ( 25 ريال ) وَ يجي معها قلم عريض للكتابة ، و دوّرنا أقفالنا القديمة و ما لقيناها ! أخذنا قهوة و آيسكريم ، و بعدها جلسنا نتمشى و نصور و نتفرج على سيئول من البرج ، الجو كان مش طبيعي ! وبعدها قررنا نتغدى ، أخذنا شريمب و سمك و بطاطا نوعين ، الكمية كانت راهية جداً جداً ! و بقى منّـه كثير ! و الحساب كان رخيص بالنسبة للكمية .

شبكة العنكبوت منتشرة على الأقفال القديمة

صورة من داخل البرج

جلسنا ننتظر الغروب ، و يوم ظلمت الدنيا نزلنا مرة ثانية بالتلفريك ، و رجعنا مشي للفندق ، و مرينا من Myeong Dong Market و قعدنا نتمشى و نتقضى و تقريباً نمرّه بشكل يومي هالمكان ..

كرسي كيوت لقيته بالحارة

و رجعنا للفندق بعد ما سكروا العالم و تعشيت أنا و أمي حلا و آيسكريم و الباقين ماكدونالدز .

23 يوليو :

قررنا هاليوم إن كل شخص يروح للي يبي و يجيب اللي يبي ما يأجله لآخر الأيام عشان ما يصير ضغط بترتيب الشنط ، و كذلك الوالدة تبغى تجيب هدايا لباقي الأسرة
فـانطلقت أختي الصغيرة و أمي في طريج و أنا و أختي و أخوي في طريج ! راحوا لهوانداي مول .. و السوق الشعبي نامدايمون يبون لبس كوري تقليدي للحفيدة الجديدة .. بس قبلها مروا على 4B تبع البيقل .

حركنا حنا و أختي كانت تبغى محل آيسكريم بينغ سو قبل نتقضى لقينا طلبها اللي تبيه في رابع فرع لهالمحل ! دائماً sold out ، و بعدها رحنا blue bottle ، نبغى حبوب قهوة لأخواني و عائلاتهم الصغيرة

هذا الفرع اللي لقينا فيه اللي تبيه ، و كان أساساً على الطريق

بعدها توجهنا Myeong Dong Market لأن أختي تبي محل Fila هناك و تبغى تشتري من عندهم ، و لا أحكيلكم عن فرق السعر المرعب في جميع الماركات ، أرخص من عندنا بمليون مرة الغالي عندهم فقط ماركاتهم الكورية ، و لا أعتبرها غالية و لكن بالنسبة للماركات العالمية تعتبر غالية ! .. و كذلك أختي تبي تتقضى للجامعة مرة وحدة ، ميونق دونق ماركت كلها محلات ميكب و منتجات بشرة ( طبية و غير طبية ) ، و محلات زي ZARA و H&M و ماركاتهم الكورية العالمية بس الرخيصة .
مرينا ماكدونالدز أخذنا المعتاد للجميع و رجعنا للفندق ، و جلسنا نتفرج على الأغراض اللي كلن جايبها ، تعشينا و نمنا .

AL Tunaiji, توبليرون, ملاك و 6 آخرون معجبون بهذا.

Boarding Pass · 01-02-2023, 05:21 AM

24 يوليو :
Common Ground

اليوم قررنا نروح لمجموعة محلات اسمها Common Ground .. قمنا زي العادة تقهوينا أنا و أمي في الفندق و الباقيين راحوا يفطرون برّا .. بعد ما خلصنا طلبنا آوبر ، و حطينا اللوكيشن و أول مرة أنا اللي أتقدعن و أعطي أهلي الوكيشن ! و كانت آخر مرة ! طلع في اللوكيشن إنه يبعد 45 دقيقة .. لما وصلنا نزلنا في حي فيه بيوت ! و محلات بسيطة على الشارع ، نفس اللي بالدراما ! دخل أخوي محل و سألهم ، و ورّاهم المكان و طلع منطقة مختلفة تماماً .. في الضفة الأخرى من العالم ! و طلع فقط يبعد عن فندقنا ربع ساعة بالسيارة ! و لعل الأجوما اللي بالمحل بلشت فينا مرة .. و تحاول تفهمنا إن المكان خطأ و فهمناها إننا فهمنا ، و رجعت لنا مرة ثانية و قالت أطلب لكم تاكسي ؟! .. تشكرنا و قلنا طالبين .. و راحت و رجعت و كتبت لنا اسم المكان في ورقة عشان نعطيها السواق في حال ما فهم ! قالت أمي خوذوا رقمها و كلموها بشروها إذا وصلنا و كلمناها و الله بعد ما جلسنا ساعة نحفظ الجملة اللي نقولها لها بالكوري ، و انبسطت يا قلبي هي !
المهم وصلنا و كانت المنطقة في الحقيقة كبر عيني ! بالأنترنت طالعة كبيرااااااااااه ! طلع فيها محلات بسيطة و أغلبها رياضية ، و أكشاك في الوسط ، و فود ترك ، و مطاعم ، المنطقة حلوووووة و مهم الواحد يشوفها ، صغيرة بس مختلفة ، و غريب إن المحلات على شكل حاويات ! تنفع الواحد يسوي فيها جلسة تصوير الصدق ..

فيها مخبز من ألذ ماذقت في حياتي ! بعد ما تقهوينا فيه ، أخذنا كيك برتقال و فستق من عندهم ، نتقهوى عليها في الصباحات القادمة

جلسنا ندور في المكان ، و نحلل المرمطة اللي تمرمطناها عشان نوصله .. و بعدها قررنا نتغدى و صار فيه انقسام كالعادة ! أنا أبي قهوة ، وأختي تبي بيتزا من الفود ترك ، و أخوي و أختي الصغيرة يبون مطعم إيطالي كان موجود في الدور الثاني .. أما الأم في عالم آخر ، عالم التسوق ! و قالت لأخوي يجيبون لها تيك آواي .
صح كان فيه مطعم بالدور الثاني لعائلة فلبينية مسلمة ، المطعم حلال بس كلّن مقرر وش يبي
وَ صح بعد ترى أغلب المطاعم الإيطالية في الأماكن السياحية المعروفة اللي متعودين على المسلمين لمّا نطلب منهم يقولون لنا راح يتأخر الطلب شوي لأننا سالقين المكرونة مسبقاً بمرق دجاج ، فراح نسوي لكم جديدة بماء عادي ، هالموقف تكرر علينا بمطعم في الآوت لت بـ 2018 ، و في فرايديز في سوق لوتّي مول كذلك بـ 2018 ، و هالمرة بعد

رجعنا للفندق ، و نزلنا نتمشى ، لأن المكان اللي حول الفندق كله أماكن حلوة و ماغطيناه كله و كل شوي نكتشف شيء جديد

25 يوليو :
Petite France ( ما رحنا لها هالمرّة ، فقط بـ 2018 ، أضفتها عشان يكون عندكم خلفية عنها لأنها بنفس المقاطعة )
The Garden Of Morning Calm
nami island

قمنا الصباح و رحنا كلنا لمحل 4B حق البـ bagel و أفطرنا ، و لما جاء وقت الانطلاق لوجهتنا لهاليوم أخذنا من عندهم قهوة و مرينا ماركت بجانب الفندق و أخذنا منه تشوكليت و حركنا لحديقة الصباح الهادئ و جزيرة نامي .. الحديقة تبعد عن سيئول بساعة و نصف وَ الجزيرة تبعد عن الحديقة بنصف ساعة .. كلهم موجودين في نفس المقاطعة ، مقاطعة غيونج جي

أخذنا تاكسي كبير لمدة 9 ساعات في هالمشوارين من نفس الشركة اللي أخذناها في جيجو بـ 1200 ريال ! غالية شوي صح .. صح ! و لكن المشوار رايح جاي قرابة الأربع ساعات ( في حال كان الطريق فاضي ) ، و صعبة نحصّل تاكسي في المنطقة هناك عند الحديقة عشان يودينا لجزيرة نامي ! أما عند الجزيرة ممكن فيه مواصلات و لكن الحديقة لا ! و كذا كذا مو بعيد عن سعر سيارتين من آوبر لما حسبتها و كذلك الآوبر ما راح ينتظرنا لما نخلص ، فاشتريت راحتنا !
و اللي يبي يروح إن شاء الله يضيف القرية الفرنسية للخطة و بنفس السعر بتكون ، أهم شيء الإتفاق على الساعات ..

أول شيء وصلنا الحديقة و ما قدر زرناها قبل ، و سعر التذكرة للكبار 11000 وون ( 30 ريال ) وَ الصغار بـ 7500 وون ( 21 ريال ) و كذلك الشباب لهم سعر أقل من الكبار .. وَ كانت من أجمل الأشياء الطبيعية اللي زرتها في سيئول و الصدق أحلى من hallim park اللي بجيجو تحتوي الحديقة على 5000 نوع من النبات .. اسُتخدِمت هذه الحديقة كموقع لتصوير عددٍ من المسلسلات التلفزيونيّة الكوريّة .. ذكرتني جداً بسويسرا .. جميلة جميلة جميلة ! و تأخذ وقت صراحة كبيرة كبيرة ! بس فتنة والله ! فعلاً خلاّبــة ما شاء الله !

بعد ما خلصنا خواتي قالوا إنهم جوعانين و ما كان فيه غير كشك يبيع كورن دوق ! يكون النصف العلوي جبنة و النصف الآخر هوت دوق .. أكلوا اللي فوق و خلّوا اللي تحت ، و أكلوا آيسكريم و شبعوا الحمدلله

بعدها توجهنا لجزيرة نامي و بالطريق شفت فندق غريب ، جازلي والله ، الخطة القادمة لازم نسكن فيه إن شاء الله ..

المهم وصلنا و رحنا بنحجز الـ Zip-wire، و قالوا لنا أقرب وقت الساعة 4 ، يعني انتظار ساعة !
تذكرة الـ Zip-wire كانت بـ 1500 ريال للجميع و شاملة دخول الجزيرة .. و تذكرة الدخول للجزيرة عن طريق العبارة رايح جاي بـ 16000 وون ( 45 ريال ) وَ تذاكر الصغار و الشباب أرخص بعد ..
رحنا للمقهى اللي جنبه لما يجي وقت دخولنا .. أخذت كرواسون حالي و أمي آيسكريم ، و الباقين قهوة و تمشينا في الشوارع اللي قريبة للجزيرة ، و فيه بالمنطقة مطاعم كورية حلال ، جربناها بـ 2018 بس ما استسغنى الأكل الحمدلله .. و كذلك داخل جزيرة نامي فيه تقريباً 3 مطاعم حلال ..
لما جاء الوقت ، رجعنا .. طبعاً ممنوع منعاً باتاً التصوير في الـ Zip-wire .. ( الوزن المسموح فيه من 35 كيلو - 120 كيلو / الطول السموح فيه من 140 سم - 200 سم )

أول مرة جينا بـ 2018 كان فيه كاميرا تحت تلتقط لك صورة و تأخذها في حال كنت تبغاها ، هالسنة ماكووو ! انتظرنا بعد ما نزلنا كلا و رحنا تمشينا، و كانت السناجب الدعنونة ملياااااانة ، لطيفة لطيييفة !

استأجرنا سكوتر كهربائي و سيكل عادي لمدة ساعة لخواتي بـ 5000 وون ( 14 ريال ) و لازم بطاقة الأحوال و تستلمونها بعد ما ترجعونهم .. أما أمي و أخوي أخذوا سيكل ثنائي معلق في السماء سيكل مرتفع يمشي على سكة حديد ، مرعب في البداية يقولون و لكن مجرد ما مشوا انبسطوا و عبارة عن دورة واحدة فقط ، و طويلة لأن السكة طويلة .. و التذكرة كانت بـ 8000 وون ( 22 ريال ) .

خلصنا و رحنا صلينا في المصلى اللي حاطينه .. مرتب مرة .. و دورات المياه فيها شطّاف .. الصدق ما تأزمنا حنّا لأننا ماخذين 3 شطّافات من السنيدي

كنت مخططة على المطعم الإيطالي ، و لكن مع الأسف كل المطاعم مسكرة ، ما أعرف ليش ! طبعاً فيه مطعم حلال ، و مطاعم كثيرة ، و مقاهي كثيرة ، و لكن مغلقة كلها !
و بعد ما خلصنا قررنا نطلع و توجهنا للعبّارة .. في طريق الخروج لقيت أجوما تبيع خبز قرع مطبوخ على البخار و محشي فاصوليا حمراء بـ 1000 وون ( 3 ريال ) ، مدري ليش نفسي سوّلت لي آخذه ! لا آكل فاصوليا حمراء و لا هو وقت القرع صراحـة ! حاولت ألزّم على اللي معي يذوقونه بس ماش عجزوا ! أكلت الأطراف ، و لقيت سنجوب صغير و عطيته إياه و كان له نصيب الأسد من هالخبزة قلبي السنجاب والله أحسه كان يجاملني يوم كمّلها !

فيه كثير أنشطة في الجزيرة غير الـ Zip-wire وَ الـدراجات و القطار .. فيه Motorboat وَ Motorboat وَ Water sports & pedal وَ أشياء أخرى ، و كلها أرخص من الـ Zip-wire .

رجعنا و قررنا نخلي السواق ينزلنا في مطعم أردني حلال اسمه البيداء .. من أكثر المطاعم المعروفة هناك و أقدمهم ، طلبنا مشروبات و الأكل كان مسخن و كباب الظاهر و الصدق نسيت وش طلبنا ! بس السعر رخيص بالنسبة لمطعم عربي حلال .. حول الـ 300 ريال .. تعشينا و رجعنا ، و يالله يالله حصلنا آوبر ، لأن المنطقة بعييييدة و غير سياحية ..
الآوبر حقنا بني آدم طبيعي .. حق أخوي شكله كان مقرقع شوي ! وقف بمكان خطأ و لما راح له انهار السواق و بدأ يصرخ و يقول " التاكسي الكوري ما ينتظر ! طلّع أخوي الجوال و بدأ يترجم له إنك إنت يا متخلف غلطان و واقف بمكان خطأ ! قام هذاك يلج لج و هو يسوق و قام يصبّخ ! و كذلك أخوي قام يلج عليه و يصبخ ( قابل الصراخ بالصراخ تسلم ) و فعلاً توحّش السواق و هجد ! اتصل أخوي على الشرطة من خلال تطبيق آوبر و حط سبيكر عشان يسمع السواق .. و قالوا له ما نقدر نتدخل إلا إذا كان فيه اعتداء بس راح نحرك الدوريات داير مدارك .. خاف السواق ! و بدأ يغني فجأة ، و يسأله من وين أنت و هو مبتسم ! و أخوي ما يرد عليه و مكمل مع الشرطة في جهة ، و يهاوشه في جهة ثانية ! و تواصل أخوي بوقتها مع إدارة آوبر ، و رجعوا له قيمة المشوار و حطوا له مبلغ زيادة في حسابه نفس قيمة المشوار وَ شالوا السواق من البرنامج وَ الشرطة حررت للسواق مخالفة لترهيب السيّاح و مدري وش سوو فيه بعد ! و اعتذروا الشرطة من أخوي لتصرف السواق .. رجع أخوي و سوّاله قهوة دريب و قطرها على روقان و روّق ، و قالنا السالفة من بكرة عشان أمي ما تنهبل ..
قلنا لأخوي المفروض نزلت و خلاص ! قال قهرني ، و بنقهر لو ما أخذت حقي ! يقول لو معي وحدة منكم كان نزلت من السيارة و اشتكيت عادي و انتهى الموضوع و طلبت سيارة ثانية !
حنّا سكتنا و ما ناقشناه ، لأن أخوي هادي جداً و ما شاء الله تبارك الله عليه طولة بال تقتلنا حنّا ! فعارفين إذا رد هالمرة أكيد إنه السواق منرفزه و متعدّي حدوده و قاهره ! فـيستاهل السواق .. و يصير يأدبـه لباقي السيّاح مستقبلاً .

و اللحين بنزل صور للقرية الفرنسية بشكل سريع و مبسط .. بدايةً القرية أفتتحت عام 2008 ، عبارة عن قرية فرنسية و الشخصية الكرتونية للقرية هي شخصية الأمير الصغير (‏ هي رواية صغيرة للكاتب الفرنسي أنطوان دو سانت إكزوبيري ) .. فيها فندق ، و كذلك فيه عروض حيّة على المسرح .. رسوم الدخول للأطفال 9900 وون كوري ( 38 ريال ) و الكبار 18900 (71 ريال ) .

و الله يا كميّة صور حطيتها لكم ربي يعيينكم بس تحسفتبهم و حطيت لكم منهن شوي
و شكل ما باقي لنا إلا شـوي من غير شر

AL Tunaiji, توبليرون, ملاك و 6 آخرون معجبون بهذا.

توبليرون · 01-02-2023, 08:47 PM

يعطيج العافية اجزاء جميله جداا
واكيد الكتابه واضافة الصور تتعب بس مع ردود وتعليقات الاعضاء تعيشين السعادة بما قدمتي

كل الاماكن حلوه وجميله والصور احلى واحلى
ماعندي تعليق الا اقول يعطيج العافيه على تعريفنا بكل شي قدمتيه

اخوج ما ينلام يعصب على السايق مفروض اهو اللي يتأسف وما يصارخ على السائح والحلو ان اخوج عمل اللازم بالاتصال بالشرطة وادارة اوبر ولا خاف منه لان معاه حق

بلندن اذا ما شافنا بالمكان الصح او ما يقدر يدخل للمكان اللي احنا فيه او ما قدر يوصل لنا
يلغي الطلب ويرجع الفلوس اذا كان ماخذهم
المهم عدت على خير
ومستمتعين بالصور والتقرير

Boarding Pass, آخـــرفـــرصـــة و عبدالرحمن الصلال معجبون بهذا.

Boarding Pass · 04-02-2023, 10:08 PM

اقتباس : المشاركة الأصلية كتبت بواسطة توبليرون

يعطيج العافية اجزاء جميله جداا
واكيد الكتابه واضافة الصور تتعب بس مع ردود وتعليقات الاعضاء تعيشين السعادة بما قدمتي

كل الاماكن حلوه وجميله والصور احلى واحلى
ماعندي تعليق الا اقول يعطيج العافيه على تعريفنا بكل شي قدمتيه

اخوج ما ينلام يعصب على السايق مفروض اهو اللي يتأسف وما يصارخ على السائح والحلو ان اخوج عمل اللازم بالاتصال بالشرطة وادارة اوبر ولا خاف منه لان معاه حق

بلندن اذا ما شافنا بالمكان الصح او ما يقدر يدخل للمكان اللي احنا فيه او ما قدر يوصل لنا
يلغي الطلب ويرجع الفلوس اذا كان ماخذهم
المهم عدت على خير
ومستمتعين بالصور والتقرير

الله يعافيك

فعلاً مرة يُبسط إنكم متحمسيـن .. و الصدق ما طلع يتعّب مرة ، بس في البداية لأني ما عرفت لها

هم بالعادة السواقين محترمين ، بس هذا ماكان صاحي نوعاً ما
و الحمدلله عدّت على خير

توبليرون, آخـــرفـــرصـــة و عبدالرحمن الصلال معجبون بهذا.

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ام حسين في باريس 2022	توبليرون	بوابة فرنسا	234	17-09-2022 01:02 AM
إسطنبول Jul 2022	احمد ال مقبل	بوابة تركيا	72	23-07-2022 04:08 PM
عدد من الأسئلة السريعة -USA May 2022	Fahad2021	بوابة امريكا	16	12-04-2022 01:05 AM