رِحلَة لَندَن - مَارِس 2023 - الصفحة 7

Boarding Pass · 01-05-2023, 10:05 AM

أهلاً وَ سهلاً
فكرت كثير قبل أنزل التقرير ، بما إنه ماشاء الله تقارير لندن كثيرة جداً ، و مغطية أغلب الأماكن ! و لكن قلت معليش معليش .. هه ممكن أحد يستفيد من هنا أو هنا ، مكان جديد ، أو تجربة جديدة ، أو حتى أماكن الإقامة .. و أنا كذلك أستفيد لما أكتبها ، في حال إن شاء الله حصلّي سفرة ثانية لها ، أرجع أشوف أفكاري .. و إن شاء الله تنبسطووووون !

الوجهة :
المملكة المتحدة
( لندن )

العملة :
1 باوند = 4,55 ريال ( سعر الصرف في البنك السعودي للاستثمار " بطاقة السفر " ) .

عدد المسافرين :
5 أشخاص ، و هالمرة أبوي اللي معنا مو أخوي من غير شر تضيق صدورنا إذا ماراح معنا الله يحفظه .

التذاكر :
سعر التذكرة للشخص ، ذهاب و إياب ، و شامل كذلك ( الضريبة + خيار إمكانية التعديل على الرحلة + اختيار مقعد لجميع الرحلات ) :
3858 ريال سعودي .

الطيران :
طيران الاتحاد .
رحلة الذهاب ( بتوقيت كل دولة ) :
تاريخ 3 مارس .
الإقلاع : مطار الملك خالد الدولي في الرياض ( الساعة 4:30 ) .
الوصول : مطار أبو ظبي الدولي ( الساعة 7:10 ) .
( ترانزيت ساعة و عشر دقائق ) .
الإقلاع : مطار أبو ظبي الدولي ( الساعة 8:20 ) .
الوصول : مطار Heathrow في لندن ( الساعة 12:00 ) .
رحلة العودة ( بتوقيت كل دولة ) :
تاريخ 15 مارس .
الإقلاع : مطار Heathrow في لندن ( الساعة 9:00 صباحاً ) .
الوصول : مطار أبو ظبي الدولي ( الساعة 19:45 مساءًا ) .
( ترانزيت ساعة و خمسة دقائق ) .
الإقلاع : مطار أبو ظبي الدولي ( الساعة 20:55 ) .
الوصول : مطار الملك خالد الدولي في الرياض ( الساعة 22:00 ) .

متطلبات الدخول إلى المملكة المتحدة :
1- إعفاء إلكتروني من التأشيرة البريطانية ، و قيمتها 30 باوند ( 137 ريال ) .
2- اللقاح ضد كوفيد 19 غير مطلوب .

شرائح الجوال و الشبكة :
3 أشخاص تجوال ، شريحة جوّي من STC ، بـ 350 ريال ، لمدة شهر كامل وَ 30 جيجا ، و شابكين على شبكة Everything Everywhere و المعروفة بـ EE .
شخصين أخذنا لهم شريحة أنترنت و مكالمات لمدة شهر تقريباً بـ 20 باوند ( 91 ريال ) من Vodafone ، و الصدق كان عند الفندق و جربت أشبك على شبكتهم و كانت تمام ، فأخذنا لهم منها ، و كانت قوية جداً و مناسبة .

برامج استفدت منها جداً في لندن :
1 – برنامج المواصلات uber .
2 – برنامج المواصلات bolt و هو الأرخص .
3 – برنامج خرائط google map .
4 – برنامج للحجز المطاعم open table .
5 – برنامج big bus tours ، لمعرفة الخطوط و الطرق للباص السياحي .
6 – برنامج visit London في حال توهقتوا في المخطط .
7 – برنامج four square لرؤية تقييمات المقاهي و المطاعم و الأماكن االسياحية قبل التجربة .
8 – برنامج omio لحجز تذاكر القطار .
9 – برنامج london undergound .

بِسم اللّه نَبدَأ

3 مارس ( الوصول إلى لندن ) :
طبعاً و كالعادة نحسب المطار زحمة ، لأنه كان أول أيام الإجازة ، و الرياض فعلياً كانت راح تِنبَط ، و الزحمة بادية من قبل الإجازة ، و أخواني قالوا لازم تطلعون بدري ، فقررنا نروح قبل الإقلاع بستة ساعات !
و لعلّنا وصلنا بنصف ساعة للمطار !
و كالعادة انتظرنا ، و أول مرة نجي قبل ما يفتح الكاونتر !
أهلي راحوا لصالات الانتظار اللي تحت ، و أنا و العفش و أختي الصغيرة جلسنا ننتظر الكاونتر يفتح !
من 10:30 و حنا ننتظر حتى 1:20 !

فتح الكاونتر و جو أهلي ، و بدأت فقرة التوتر و الخوف من وجود خطأ في الإعفاء الإلكتروني ، و طول الوقت و أنا ألطم ليش ما خليت مكتب يسويها و أفتك ! و أهلي يقولون عادي يا بنت الحلال حتى لو فيه خطأ خيرة و ربي رادنا عن شر ، لأن هالرحلة تأجلت ثلاث مرات ، و مع ذلك صاملين نروح !

و يوم شفت الكل قاعد يعدّي و الوضع تمام ارتحت ، إلين جاء دور العائلة اللي قدامنا ! و جلست الموظفة تدقق و وضعهم تمام ، إلين وصلت لآخر بنت في العائلة ! كان حرف الـ S تبع اسم الجد small في الإعفاء ، و الجواز كان capital ، قالوا ما تطلع البنت للرحلة ! انهارت البنت ، و انهاروا أهلها ، و انهرت أنا !
و كلموا المكتب اللي سوّاها لهم ، و كان أبوهم يطالب المكتب إنه يتحمل تكاليف رحلة البنت بعد 48 ساعة و يسوي لها التصريح الجديد ، و مدري وش صار عليهم و على المكتب ! و يوم شفتهم كذا بدأ الشيطان يلعب في عبّي !
و جاء دورنا ، و أنا خلاص ناشف دمي ! مو أول مرة أفيّز أو أسوي شيء ، بس يدققون على الفاصلة و على الحرف ، و على كلام العالم إن الموضوع معقد ! و صار لي كم سالفة قبل السفرة بخصوص الإعفاء ، عشان كذا توترت ، و الموقف اللي صار قدامي بعد ! كمّل الناقص !

جاء دورنا ، كان كأنه امتحان .. يوم يكرم المرء أو يهان ! و طلبت الموظفة الإعفاء ، أنا طابعتهم ، و معي في الجوال ، قالت الورقي أفضل و أوضح ! و بدأت تدقق ، و خليتها تبدأ بحق أبوي و بعدها حق أختي الصغيرة ، لأن الإشكال كان عليهم ! يوم خلصت قالت خلاص كلها تمام ! قلت لها تمام تمام ؟ قالت تمام تمام ! قلت ممكن أحد يرجعنا بأبو ظبي أو لندن ؟ قالت أبداً إن شاء الله ! و الحمدلله مشى الموضوع على خير ، و كنت توي أبدأ أتحمس للسفرة !

بالمناسبة أنا مو شخص آوفر و خواف و لكن ! الفنادق مدفوعة ، و تذاكر دخول أغلب الأشياء مدفوعة ، و كلها غير مستردة ، يعني في حال وجود أخطاء لا سمح الله ، كانت بتكون خسارة فادحة جداً !
عدينا الجوازات و رحنا لللآونج تبع سمايلز على أساس نآخذ لنا غفوة ، يوم دخلنا طلعوا كل العالم فيه ! الموظف يقولّي ترى زحمة و ما فيه كراسي و ما فيه إلا مشروبات حالياً ، و أحسبه يبالغ ! طلع صادق ! لقينا مكان لأبوي و قلنا له ينام و وقت البوردينق قلنا له بنبلغك !

نزلنا تحت و فعلاً ما كان فيه أحد ، كلهم باللآونج .. تمشينا شوي ، أخذنا لنا قهوة ، و جلسنا و نمنا ، و لعل البوردينق تأخر إلى 5 الصباح !

و حنا في الطيارة جلست أهوجس ليش ما رجعنا للبيت يوم وصلنا بدري للمطار ! إلى يومكم مدري ليش انتظرنا في المطار كل هالساعات !

المهم وصلنا أبو ظبي و المفروض الترانزيت يكون ساعة ، و لكن وصلنا متأخر لأننا أقلعنا متأخر ! و صلنا و كان باقي شوي على وقت البوردينق ! لما دخلنا طلبوا الإعفاء و جلسوا يدققون مرة ثانية ، و دخلونا بسرعة الحمدلله للطيارة ، و نمت الرحلة كاااااااااملة !

خواتي يقولون إن فطورهم لطيف ، وحدة أخذت فرينش توست ، و الثانية بيض و هوت دوق ، و أنا نايمة و لا حسيت بأي شيء في الحياة !

و الوجبة الثانية كانت ساندوتش الإتحاد المعتادة ، ساندوتش بيتزا بدون جبنة !

و وصلنا لوندوووون .. أسرع مرة أطلع من مطار دولة ! ملحهم ظريفين و سريعين ! لعلّي تفاءلت ! و الحمدلله فعلاً كان أظرف و ألطف شعب يمر علي في أي سفرة .. مرة فريندلي !

كنت حاجزة سيارة من alpha airport cars بـ 176 باوند ( 801 ريال ) ، سيارة لـستة أشخاص + ستة شنط كبار ، و الدفع كاش لأن الكاش أرخص بـ 25 باوند ( 114 ريال ) ، أرسلوا الفاتورة عن طريق الإيميل ، و تواصلوا معي قبلها بيومين عن طريق الواتساب ، و كانوا معي أول بأول إلين وصلت المطار ، و جاء استقبلنا السائق ، و كان من أبدع ما يكون .

وصلنا الفندق و كان موعد التشيك إن من زماااان .. ديكور الفندق غريب أطوار شوي ، و حتى ألوانه غريبه و عليه علامات استفهام واجد ، بس الصدق أرجع أسكنه مرة ثانية عادي ، لأن الموقع رهيب رهيب رهيب رهيب ..

الصدق قبل السفرة سألت شخص في تويتر مشهور ، ساكن بلندن إلا شوي ماشاء الله ، و يرد على الاستفسارات برحابة صدر الله يجزاه خير .. سألته عن المنطقة اللي فيها الفندق ، لأني حجزت فندق و باقي ثاني و كنت بشوف إذا تمام أو لا ! و قالّي " ما أحبها " ،و ما قالّي ليش ما يحبها ! و لكن من فصفصتي للندن ، حابة أقوله إنّي فعلاً ما حبيت غير هالمنطقة !

دخلنا و أخذنا وقتنا تماماً و صلينا و ريّحنا شوي ، و بعدها طلعنا نستكشف المنطقة و الدنيا بدأت تظلم و أغلب المحلات بدأت تقفل .. الوالد كان عجزان شوي ، فقرر ينام ( الوالد كبير بالعمر + مسوّي عملية قبل السفرة ، فكان البرد يتعبه ، لأن العملية في الرقبة ) .

راحوا خواتي لـمطعم wasabi ، و أنا و أمي رحنا نتقهوى في pret ، قلت يمكن نشوف أم حسين !

و حنا جالسين في أمان الله دخل هومليس ، و زرف كم ساندوتش من الثلاجة و هج ! و كانت أول مرة أشوف جذي ! توحشنا شوي ! ما استوعبنا الموقف ، و بعدها صرنا نشوف هالموقف بشكل يومي و الوضع عادي و سهالات !

مشينا لمحطة فكتوريا نشوفها ، و تمشينا حولها ، و تمشينا في المكان ، و شفنا وش حولنا ، و كنت مطلعة كم مقهى و كم مخبز نجربه من four square للأيام الجاية .. ظلمت الدنيا و رجعنا ننام ، و الصباح رباح !

صح كل الفنادق اللي سكنّاهم الساعة 10 في الليل يسكرون أبوابهم ، و ما يفتح الباب إلا ببطاقة الغرف تبع الفندق .

الفندق الأول :
- citizenM London Victoria Station4 نجوم
6 ليال ( 3 مارس – 9 مارس )
تم الحجز عن طريق موقع بوكينق .
الغرف :
3 غرفة كينغ ( سرير مزدوج كبير جداً – بدون إفطار ) .
( النظافة : جيد جداً ) .
( الموقع : ممتاز ممتاز ممتاز ) .
( السعر : مناسب جداً بالنسبة لعدد الغرف ، و كذلك دائماً فنادق أوروبا تعتبر أسعارها مرتفعة ) .
السعر الإجمالي :
14,188 ريال .

اللوبي

و الأصنصير مليان أشخاص غريبين

و الغرف كانت كلها نفس بعض ، بس حق ترى حجمها صغير ، يعني إذا بصلّي لازم أختي تقعد ما تتحرك ..

التحكم بالغرفة كاملة بالأيباد !

4 مارس
LONDON EYE
PALACE OF WESTMINSTER
BIG BEN
WESTMINSTER APPEY
THE SHERLOCK HOLMES MUSEUM
MADAME TUSSAUDS

قمنا الصباح و كنت حاجزة مسبقاً في مطعم Bill's ، قريب جداً عندنا و تقييمه حلو كمطعم يقدم فطور إنجليزي تقليدي .. وصلنا و طلبنا و الطلب اللي يبونه خواتي كان أغلبه خنزير ، قالوا إنه فيه مثله نباتي ، قلنا لهم تمام ، بس البيض طلبناه بيض حقيقي ، جربوه البنات و قالوا إنه لذيذ مرة .. أفطرنا و قررنا نروح لمشوارنا الثاني .

صورته من برّا و أنا مارّة عليه أحد الأيام في الليل !

كنت أبحث مسبقاً عن التذاكر للأماكن السياحية ، قريت تغريدة في تويتر لسائح فرنسي ، يقول أوفر شيء إنك تروح تحجز من أجهزة التذاكر الذاتية اللي موجودة عند عين لندن ! تقدر تصمم البكج اللي يعجبك ! رحت شيكت على أسعارها في الموقع ، و عرفتها .. و بما إن عين لندن تبعد دقائق قليلة عن الفندق تبعنا ، قلت أروح أشيك قبل أحجزها من النت ، و طلعت فعلاً أرخص في حال كنت بتأخذ كذا تذكرة .. أخذت لكل شخص تذكرتين باص ليومين ، و تذكرة للعين ، و تذكرة لمتحف الشمع ، و كلهم بـ 75 باوند ( 342 ريال ) .. بما إن سعر الباص ليوم واحد 37 باوند ( 168 ريال ) و اليومين 54 باوند ( 246 ريال ) ، و عين لندن كانت بـ 33 باوند ( 151 ريال ) ، و نفس السعر للمتحف تقريباً ، بيطلع المجموع كذا 468 ريال في حال أخذنا الباص مرة وحدة ، و 546 ريال في حال أخذنا الباص يومين .. طلع كلامه صحيح ، و التذاكر كلهم تستفيد منهم خلال 90 يوم ، إلا تذكرة عين لندن لازم بوقتها اللي حجزت فيها .

قصينا التذاكر و دخلنا العين .

و بعدها رحنا نشوف بيج بين و قصر ويستمنستر .. بالنسبة لي مهم القصر لأنه تم تصوير فيه أحد مشاهد فيلم هاري بوتر .. و الصدق إنها تجننننن بالحقيقة ، ألوانها ساااااااطعة ، عشان كذا صورتها لكم من كل جهة ! ما يحتاج تزورونها بعد كذا !

و بعدها مرينا على كاتدرائية ويستمنستر ، و حصلنا اسكتلندي يعزف ..

و لمّا خلصنا ركبنا الباص ، و قررنا نتمشى و نشوف المعالم من فوق الباص ، لأنه ويكند و عاااااالم ، و قلنا ننزل لبيكر ستريت ، و نتمشى هناك بعد ما نأخذ لفة في الباص .

قاصة التذاكر تبع متحف شارلوك هولمز من النت ، و بدلوها لي و أعطوني إياها ورقي ، تهبببببببببببل التذاكر الورقية ، سعر التذكرة 16 باوند ( 73 ريال ) .. المكان يحتاج فقط نصف ساعة أو أقل .. اللي مو مهتم نهائياً ما يصلح يدخل ! يمر عليه كفاية و يدخل محل التذكارات !
خواتي مو مرة كانوا مهتمين بس مسؤولات عن التصوير ! أنا و أمي و أبوي نسمع القصص و السواليف ، و هم يصورون !

المواعيـن تهبّل أول شيء قبل يتكلمون عن شارلوك هولمز ، يعطونا تنبيه عشان ننتبه للأغراض و في حال حسنا الأثاث أو الأطباق راح يدفعوننا إياها ! و على كلامهم تكلفتها عالية جداً !

أنييييق !

لو هذا مكتبي و بنفس الإطلالة ، ماراح آخذ إجازات و لا أغيب حتى .

بعدها دخلنا محل الهدايا و شرينا كم شغلة .

أما التمثال فكان قريب لمتحف الشمع

لما طلعنا من متحف شارلوك هولمز كان قدامنا محل سوفونير ، حليل !

و مشينا بعدها لمتحف الشمع ، و كان سبق لنا زيارته في هونج كونج ، و بدأوا أهلي يقارنون ، مع إنه مافيه أي مجااااااال للمقارنة ، مختلف تماماً ، و طبعاً بالنسبة لهم راح يفوز فرع هونج كونج بدون نقاش !
أنا و أوروبا ضد أمي و خواتي و شرق آسيا !

الجو كان برد برد برد برد ، فطيس ، لابسين ثقيل و لا بسين ثيرمال طبقات ، بس ما أدري ليش كذا ! و جعنا من البرد ، و قررنا نتغدى .. أنا و أمي و أبوي رحنا محل Pizza Express ، أخذنا لنا نوعين بيتزا و بطاطس .. و خواتي راحوا Taco bell ، و كلهم موجودين في بيكر ستريت .

خواتي أخذوا تاكو و ناتشوز

السماء انشقت و امتلينا مطر ، و فيه هواء قوي جداً ، ركبنا الباص ، و أخذنا معنا قهوة من caffe Nero، و كملنا دوارة و نتفرج و حنا في الباص .. و آخر باص الحمدلله كان في منطقتنا ، آخر باص الساعة 5:45 ليلاً .. مشكلة الأماكن في لندن في الويكند يفتحون متأخر و يسكرون بدري ، يخلص اليوم بسرعة !

عبدالرحمن الصلال, آخـــرفـــرصـــة, توبليرون و 6 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رِحلَة كُوريَا الجَنوبيَّة - ( سِيئُول + جيجُو ) - يُوليُو 2022	Boarding Pass	بوابة كوريا الجنوبية	66	10-03-2024 12:46 AM
جولاي 2023	Reham2013	بوابة سويسرا	7	18-05-2023 06:02 PM
اوربا في صيف 2023	Rema	بوابة سويسرا	3	23-01-2023 01:41 PM
رحلة الى أوروبا 2023	Noorbash	بوابة الدول الاخرى	4	16-08-2022 10:42 AM