رِحلَة لَندَن - مَارِس 2023 - الصفحة 4

Boarding Pass · 07-05-2023, 01:36 AM

13 مارس
BOROUGH MARKET
Harry potter and the crused child
The Lion King

قمنا الصباح و قررنا ما نتقهوى و لا نحلّي و لا نفطر لأننا بنروح لبورو ماركت .. بس قبلها رحت أنا و أمي لمحل القماش اللي لقيته قبل .

شاهي حبيبتي و رفيقتي و روحي و عيني أمي شرت الأكواب أول ما وصلنا ، و قالت بما إننا بنرجع للفندق ، أرجعه قبل نطلع للماركت

اسمه Joel & Son fabrics ، المحل يجنننننن يجنننننن يجننننننن ، و كبييييييييير ، و حوله أكشاك يبيعون قماش و أشياء ثانية ، مدري وش هالسوق بالضبط ! المهم إن أسعار المحل نار الله الموقدة ، و لكن فعلاً فعلاً يستاهل ! أنا كنت ضد إني أشتري قماش و الملابس الجاهزة تجنن ! لعلّي تراجعت عن أقوالي .. المهم إننا نمنَا بالمحل ، و ضيفونا قهوة !

فيه صور للملكة إليزابيث بالمحل ، بس ما كان لي خلق أسأل إذا قد أخذت منهم أو لا ! أخذت أمي اللي تبي و رجعنا للفندق ، لأن ورانا مشاوير ثانية ..

طلبنا أوبر و وصلنا الحمدلله بدري لـبورو ماركت ، و كان فاااااضي ، و تفرقنا من غير شر بهالمكان ..

و هذا أحلى محل أخذنا منه بهارات و ملح ، طعييييييييييم مرة و عنده بهارات مكسيكية و هندية و إلــخ ! لذيذ لذيذ لذيذ

أمي و أبوي جلسوا عند الأجبان لأنهم يبون نآخذ معنا للرياض ..

ماشاء الله تبارك الله ملحها هي و نقابها

و أختي الصغيرة كانت جوعانة و قررت تآخذ شاورما يونانية ..

و أنا و أختي رحنا نشوف أكثر مكان هبّة و مذبحة عليه هناك ، كان محل دونات اسمه bread ahead.. و مع الأسف كان أكبر مقلب ! أخذنا قهوة و رحنا نكمل نشوف محلات الحلى لأننا مشتهين نحلّي .. لقينا كشك يبيع كراميل فووووووووودج ، قسسم بالله ألذ ألذ ألذ ألذ كراميل فودج ذقته في حياتي ، مدري ليش ما جبت معي كثير ! طعمه يوجوع القلب ! كان بجنبه محل كانولي ، قالت أمي جيبوا لي منه ، و مع الأسف كلّه فيه كحول ..

رجعنا عند أهلي نتفرج على البهارات و الأجبان و قعدنا نذوق

شافت أختي محل فراولة فريش و يحطّون معها تشوكليت ، أخذنا واحد بالتشوكليت و واحد بدون و كان راااااهي ..

بعد ما تقضت أمي و خلصنا الماركت كامل ، قررنا نتغدى .. أنا و خواتي فيش آند تشيبس و أمي و أبوي ريزوتو ! كانوا لذييييييييييييييييييذات مرة مرة مرة مرة .. فيه محل يبيع بائييا بس خلاص كنّا شبعانين مرة ، ما نقدر ..

طبعاً المسلمين يسوون لهم فريش بدون كحول ..

أختي جرّبت المحار النيء ، و حامت كبدها و كبودنا بعد ! ريحته مرة بحر !..

الأجبان اللي أخذوها أهلي ، غلفوها المحلات تغليف حراري و مسحوب منه هواء عشان الطيارة ، كانوا مرة مرة مرة مرتبين .. المكان مرررة كان حلوو ، ممكن نرجع نزوره عادي ، بس مهم جداً الواحد يروح له و هو جوعاااااان ..

طلبنا آوبر و رجعنا نريّح شوي ، لأن أنا و أمي و أختي حاجزين مسرحية هاري بوتر ، و أختي الصغيرة و أبوي مسرحية الأسد الملك .. التذاكر كلهم كانوا حسب اختيار المكان ، تذكرة هاري بوتر كانت تقريباً تقريباً بـ 750 ريال للشخص ( أخذنا مقعد حلو ) و فيه أرخخخص و فيه أغلى بعد ، و موعد العرض كان الساعة 7 في الليل .. و تذكرة الأسد الملك كانت 890 ريال للشخص ، و فيه أرخخخخخخخخخص مرة مرة ، و موعدها أذكر كان 7:30 ليلاً ، و مواقع المسرحيتين مختلفة ، مكان مسرحية الأسد الملك حول m&m's الظاهر .. بالنسبة لنا كان ممنوع التصوير ، و أختي الصغيرة الظاهر الظاهر عادي تصور ، ما سألتها ! بس تقول المسرحية حلوة مررررررررة ، و أنا شفت إعلانها فعلاً شكلها جميل و لو عندنا و قت زيادة كان حضرتها ..

أما أنا فما كنت مرة مرة مرة متحمسة لمسرحيتي لأني من الأساس ما حبيت القصة حقّت هاري بوتر و الطفل الملعون ، لأني قريت الكتاب أول ما أصدر ، و رجعت قريته قبل المسرحية و حنا في لندن عشان أستوعب اللي بيصير ! أحس كان ينافي وقائع صارت في الأجزاء السابقة ، بس قلت يالله لعيون جي كي رولينج نروح ! و استمتعت مرة مرة مرة لأنه تابع لهاري بوتر فقط ! و إلا كقصة ما غيّرت رأيي ! طبعاً على قولة أختي رأيك يا ريانة مو مهم ، بس أنا أحسه مهم بما إني فانز مُعاصر .

و حنا راجعين كان فيه محل بوبا في البلازا و اسمه T4 ، قالوا خواتي يبون يجربونه .. كان غريب شوي ، تحدد فيه كل شيء حتى مستوى البرودة ! و السكر و و و إلخ ! مطولين السالفة و هي قصيرة ! الزبدة يقولون ما كان لذيذ زي اللي جربوهم قبل .

آخـــرفـــرصـــة, توبليرون, الايمان و 1 آخرون معجبون بهذا.

Boarding Pass · 07-05-2023, 02:57 AM

14 مارس
Arcelor mittal orbit

خواتي الليلة اللي قبل قالوا نبغى نرجع نفطر في المطعم اللي جربناه أول مرة ، bill's ، بس قلت لهم نجرب الفرع اللي ببيكر ستريت ، حجزت بالأبلكيشن .. أصبح الصباح و رحنا له مشيء لأنه قريب ، طلبوا البنات كلهم الفطور التقليدي بس نباتي عشان أغلب اللحوم خنزير و أمي أخذت بانكيك لأن أعجبها حق أختي هذيك المرة ، الصدق الفرع اللي أول أحلى بمليوووووون مرة ، أمي ما كملت أكلها ، و البنات قالوا الفرع الأول يفوز و بدون أي مقارنة ..

المهم تمشينا شوي و لقيت جو آند ذا جوس ، أخذت منه ساندوتش تونة كادو و قلت أخليها معي في حال جعت لأن المشوار طويل و زحمااااااااااااة ..

طلبنا آوبر و انطلقنا لمشوارنا .. كان بعيد والله !

وصلنا للـزحليقة ، المكان فيه حديقة لطيفة و ممشى يجنن ، و المنطقة حليلة صراحة ، و الجو يساعد والله ماشاء الله !

دخلنا للمكان و وريناهم الحجز اللي معنا .. طبعاً عندهم فعاليتين في المكان ، إما التسلق أو الزحليقة ، و بما إن خواتي مجربين التسلق في o2 ، قالوا بس نبي هالمرة زحليقة ، و أخذت معها عرض تصوير فيديو لهم داخل الزحليقة .

و كلها حاجزتها قبل ما نسافر .. أمي كانت تقول لا تحجزين لي معكم ، بشوفها و يمكن أتحمس و أقولكم احجزوا لي وقتها ! لعلّها شافت المبنى من بعيد و كنسلت ! طبعاً عيّت أمي تجربها و أخذت تذكرة مشاهدة فقط ..

عطونا التذاكر و رقينا بالأصنصير !

الزحليقة أطول من تمثال الحرية اللي في نيويورك و صدق مرة طويل ، بس ما يحس الشخص بطولها لأنه بأنبوب !

و هنا معلومات حاطينها في الأصنصير ، مرة انتريستينق !

و أخذت أمي أغراضنا و تزحلقنا ، و لما وصلنا كلنا تحت ، نزلت قلبي أمي ، تقول خفت جاكم شيء و انكتمتوا !

عطيناهم الإيميل عشان يرسلون الفيديو ، و رجعنا رقينا لنفس المكان بس من الدرج و كان شبه مكشوف .. يمدي تنزلون أو ترقون للمكان بدرج حديدي ، الهواء يهبهب عليكم من كل جهة .. خلصنا و نزلنا !

ما كان فيه إلا حنا في المكان ، فعلياً ما فيه غيرنا و الموظفين ! رجعنا نتمشى عند النهر الموجود .. تمشينا و بعدها قررنا نرجع ، يالله يالله حصلنا سيارة ترجعنا ، لأن المسافة بعيدة .. حطيت لوكيشن الرجعة على باركر ستريت عشان لسى نبي نتمشى في المكان ، و نشوف الفنادق اللي قريبة هناك ، في حال قررنا إن شاء الله نرجع لها قريباً نصير شفنا موقع الموقع بالصدق !

بعد ما تمشينا رجعنا نكمل تمشّي في البلازا اللي عند الفندق ، يجنن ، و القناة المائية مخلية الجو فزييييع

و رجعنا للفندق .. منهدّيييييييين ، و كملنا ترتيب الشنط ، لأن طيارتنا الساعة 9 الصباح ، و كان في نفس اليوم بيكون احتجاجات ، فخفنا نتأخر .. قبل بكم يوم كلمت نفس السواق اللي جابنا من المطار ، و اتفقت معاه عشان يآخذنا هو من الفندق ، ففقط رجعت أأكد عليه قبل أنام .

آخـــرفـــرصـــة, AL Tunaiji, توبليرون و 2 آخرون معجبون بهذا.

Boarding Pass · 07-05-2023, 04:12 AM

15 مارس
Back To Home

حطيت المنبه الساعة 4:30 الفجر ، و أخذت بطاقات غرف أهلي قبل بليلة عشان أقومهم في حال ما انتبهوا للمنبه ، الحمدلله طلعوا قايمين ، سوينا قهوة و جلسنا نحاول نصحصح .. كنت متفقة مع السواق 5:30 ، بتقولون بدري ! الصدق صح عليكم بدري بس خفت أتأخر ساعة و تنزحم الدنيا من الاحتجاجات ، فقررت نروح بدري كالعادة .. و ماعاد تفرق أصلاً ، أدمنّا الروحة بدري .

لما نزلنا للّوبي و سلمناهم البطاقات ، لحقني موظف عربي كذلك و أول مرة أشوفه من جينا للفندق ، قال إسمي فلان ، ممكن تقيمين الفندق تقييم مرتفع ، و تذكرين إسمي و تمدحيني ! اللهم طوّلك يا روح ! قسم بالله مو طبيعيييين ! قلت له إن شاء الله ثاني إسم بينكتب إسمك ، انتظروا التقييم في تريب أدفايزر و بوكينق و بشوف برامج ثانية أقيمكم فيها ..
أمي تقول أحتريه يقول أطلب لكم سيارة أو تبون قهوة ، تبون شيء ! و لا شيء ! تخيلوا بس أخذ البطاقات و قالّي أقيمه !

جاء التاكسي و أخذنا لنا غفوة ، لأن الدنيا برررررد ، و ظلام ..

وصلنا و كانت الكاونترات مفتوحة الحمدلله .. دخلنا عفشنا و دخلنا ، و كانت من أسهل المطارات في التفتيش و الحوسة .. تمشينا شوي ، و رحنا لبريت ننتظر هناك .. لما فتحوا بوابة الطيارة و دخلنا ، تأخرت إقلاع الطيارة ساعة كاملة و كنت شايلة هم رحلتنا على الطيارة الثانية للرياض ، بس مرتاحة إنها كلها على نفس الخطوط ! كانت الرحلة حلوة الحمدلله ، بس تخللها الكثير من المطبّات الهوائية المرعبة ، بس حليلة الحمدلله ..

أول ما هبطنا شيكت على إيميلي و كان فيه رسالة من طيران الإتحاد يبلغوننا إنهم بيخلون رحلتنا على رحلة الساعة 1 صباحاً ! يعني لطعة في المطار لمدة 6 ساعات ! وصلنا و بعد التفتيش لقينا موظف شايل لوحدة فيها أسماءنا ، و اعتذر على اللي صار و أعطانا البوردينق الجديد و لكل شخص وجبة من أي مطعم موجود في المطار ! جاني إحباط ، يخس عليهم ليتهم منتظريننا شوي ☹ ! ربي كاتب لنا ننتظر طويل في المطارات دائماً ، يا نبكّر مرة يا نتأخر مرة و كلها فيها لطعة الحمدلله ! الصدق كنا شبعانين نوم ، الوالد ما ينام في الطيارة ، قال بروح للآونج و قلنا له حنا نبي نتمشى .. بعد ما تمشينا جلسنا لنا في مقهى ، قلت بما إني فاضية خلوووووني أكتب تقييم عن الفندق الثاني ! كتبت كل شيء ، ما خليت شيء ، من أول ما دخلنا إلى ما طلعنا ، و ذكرت أسماء الموظفين و جنسياتهم .. ما أمداني أنزل التعليق إلا جتني مكالمة واتساب ! و فتحت المحادثة لقيت أول موظف عربي ذكرت إسمه مكلمني و قال " السلام عليكم " ، بلكته على طول ! بعدها أرسلّي رسالة في الإيميل ، و سفهته !
ركبنا طيارتنا ، بعد انتظار طوييييييل ، و وصلنا الحمدلله بالسلامة للرياض الحنونة ! و صلنا الفجر ، و بعد ما خلصنا حوستنا ، نمنا ..
يوم قمت لقيت المدير مكلمني 4 مكالمات من رقمين مختلفات ، و راسلّي في الواتساب و الإيميل ، و مارديت ! و على هالحال ، يتناوبون على الرسائل بكل محل ! حتى صاروا يرسلون SMS ! و سافهتهم .. إلين جاء قبل كم يوم أرسل لي المدير العام رسالة بالعربي ! يحسبون ما أفهمت وش كاتبين لي قبل ! و هالمرة يقول لي بنرجع لك 10% بس إحذفي التعليق أو قيمينا 10 من 10 ! يا حليلهم .. ليومكم مكالمات و رسائل من كل مكان ! قاموا ينسخون الرسالة و يكررونها يومياً .. و ليومكم سافهتهم والله ..

هذولي بعض الرسايل في الواتس و الإيميل و المكالمات ، و فيه كثير ماشاء الله لو شادين حيلهم بفندقهم مثل شدة حيلهم بإني أشيل التعليق كان أصرف هم الظاهر 4 اللي يرسلون لي

مشكلة الموظفين تبعهم مو فاهمين شغلهم نهائياً ، مثلاً عادي جداً و الناس عند الأصنصير يصير فيه موظف معه و أنتم بكرامة عربية الزبايل ، يدخل قبلك و بكل وساعة وجه يقول رح لواحد ثاني ، و حتى ما يجامل و يطلب للناس أصنصير طز عليكم يعني ! و نفسها تكررت بس مع موظفة معها عربية فيها شنط !

و الأخيس بعد نفس الموظفة الأفغانية مرة و حنا راجعين قالت لو سمحتي دقيقة بتأكد إذا دافعة كل مدفوعاتك أو لا ! هالكلام بعد كم يوم من التشيك إن !!!!!! متخلفة ! رحت مشيت و سفهتها !

و أشياء كثيرة والله ، بس عجزت من الكتابة عنهم و أنا لسى برد عليهم بعد ..

آخـــرفـــرصـــة, توبليرون, الايمان و 1 آخرون معجبون بهذا.

Boarding Pass · 07-05-2023, 04:46 AM

لندن فعلاً أحس يا يحبها الشخص مرّة ، أو يكرههّا مرة ، مافيه وسط !
و الحمدالله أعجبت الجميييييع

الصدق كزيارة أولى للندن ، أحس مرة قليل 12 يوم ، و لكن هذا الوقت المتاح لنا فقط أحس حلوة شهر كزيارة أولى ، بس بإذن الله لنا رجعة ، لأننا ما زرنا و لا مكان غير لندن ..
فيه غير الأرياف ، مدن قريبة ، و فيه مناظر تجنن يزورها السائح ، بس بإذن الله الزيارة القادمة ..

الوقت اللي سافرنا فيه أول شهر مارس ، بالنسبة لنا الجو يجنن ، بس برد صدق مرة ، بس أحس لو بنرجع نسافر لها إن شاء الله ، نسافر كذلك بنفس الوقت ، أهلي جازتلهم أمطار لندن ، و لكن اللي مو حلو فقط إن الملاهي مثل ثروب بارك مسكرة و تفتح نهاية مارس ، و أغلب الملاهي اللي لقيتها ! خواتي كانوا متحمسين لها بس يقولون عادي مو لازم ، أهم شيء الجو حلو ..

كنت خايفة مرة من كثر الفيديوات اللي منتشرة في السوشال ميديا ، سواء كانوا سرقات أو استقعاد الشرطة في الأماكن السياحية أو أو أو ! لدرجة إني رحت لأم حسين قلت وش الوضع ! صدق كذا ، خاصة إن أخوي من غير شر مو معنا ! قالت أبداً ماكو إلا العافية ! و فعلاً الحمدلله صدق ، ماكو إلا العافية !

ماشاء الله أول مرة أشوف منقبات و عبايات سوداء في السفر كثر كذا و لا أحد قالّهم العود .

راح أرفق لكم ملف ، سويته لنفسي عشان أنظّم مخّي شوي بما إني الشخص المسؤول ، فيه :
الأماكن السياحية اللي زرتها فقط + أوقات العمل ( تتغير كل فترة ) + الموقع الإلكتروني + أسعار التذاكر + المسافة بينها و بين الفنادق اللي سكنّا فيها .

الملف المرفق ترتيبه كالتالي :
اللي بالأخضر الفاتح : تسوّق .
اللي بالرصاصي الفاتح : مزارات سيّاحيّة و تمشي .
اللي بالأورنج الفاتح : هاري بوتر ، و فيه أماكن كاتبتها ، صوروا فيها مشاهد ، بس هي أماكن حلوة الصراحة .

و لله الحمد و المنّة خلصت سفرتنا بسلام وَ انبساطة وَ وساعة صدر .. ربي يتممها على الجميع
أي سؤال أو استفسار الآن أو مستقبلاً حنّا بالخدمة ..

الملفات المرفقة

لندن - شهر مارس.docx‏ (42.0 كيلوبايت, المشاهدات 21)

آخـــرفـــرصـــة, AL Tunaiji, توبليرون و 4 آخرون معجبون بهذا.

آخـــرفـــرصـــة · 07-05-2023, 10:58 AM

الحمد لله على السلامة
تقرير خفيف لطيف

فعلا 12 يوم قليلة على لندن
ولو قعدتوا شهر ما راح تخلصون مزاراتها ومحلاتها
بس برافو عليكم تحبون تجربون كل شي جديد
وهذا النوع اللي يتمتع بالرحلة دايم

أعجبني التخطيط لكل فعالية
والاهتمام بطلبات الوالد والوالدة
وهم ملح الرحلة وسكرها برضه

تعامل الفندق مشين و زين اللي سويتي فيهم
ولا تعدلين تقييمك عشان لا يورط فيه غيرك

شكراً على هذي الأجزاء الجميلة
ويبدو لي أنكم راجعين للندن مدة أطول
لأن سحرها لا يقاوم

توبليرون, Boarding Pass و الايمان معجبون بهذا.

AL Tunaiji · 07-05-2023, 01:34 PM

زمان قبل ما أدخل عالم السفر والسياحة كنت أتمنى أزور لندن ، لأن الناس كانت تتكلم عنها

ولكن بعد ما دخلت عالم السفر والبحث وجوجل صارت إهتماماتي لدول أخرى

قرأت بعض التقارير عنها ولاكن ما شجعتني

وفتحت تقريرك هذا بعد تقرير كوريا المميز لأرى إبداعك عن لندن

تعجبني الإضافات الخاصة بالعائلة والأطفال مثل أستوديو هاري بوتر و M&Ms

كتاباتك تذكرنا بالكتاب والخبراء القدامى من معلومات وصياغة

أستمري بالكتابه عن أي دولة ، فكلنا نستفيد مما تكتبين

توبليرون, Boarding Pass و الايمان معجبون بهذا.

الايمان · 07-05-2023, 02:44 PM

أحسن قرار اتخذتيه انك سويتي التقرير
انتي مبدعه في التقارير وكل تقرير لابد من الاستفاده منه واكيد اضافه لبوابة بريطانيا
الله يخلي لكم الوالد والوالده واخوكم ان شاءالله يكون معاكم في سفرات قادمة استغلوه قبل لايتزوج
الموقف اللي صار في المطار صار معاي وكان رقم الرحلة غلط برقم ورفضوا اني اسافر مت من القهر لكن كل شي خيره
مع اني دقيقه جدا وانا اعبي طلب الفيزا لكن سبحان الله غلطت برقم

توبليرون و Boarding Pass معجبون بهذا.

الايمان · 07-05-2023, 02:47 PM

بداية ممتازة للندن ومبين مرتبه الرحلة بطريقة رائعه
أماكن ومطاعم حلوه رحتوا لها عليكم بالعافية
وانا مع اوروبا ضد اسيا

توبليرون و Boarding Pass معجبون بهذا.

الايمان · 07-05-2023, 02:49 PM

اقتباس : المشاركة الأصلية كتبت بواسطة RAYYANAH

حيّ الله أم حسيييييييين

تراي جديدة في الصنعة ، يدوووووبك تقرير و نص ، كيف أجزئ ؟ يعني كل يوم أخليه برد لحال ؟ أو كيف ؟

آووووووووه يالله أقرب إجازة لازم نزور الكويت

إلا يومين أخذناه بس عشان الصور الكثيرة و ما أبغى أكرر صور الباص ، حاولت ما أحطهم إلا مرة ، أخذناه بـ 4 مارس وَ 6 مارس ..

حياج الله بالكويت وان شاءالله نشوفج

توبليرون و Boarding Pass معجبون بهذا.

um Muataz · 07-05-2023, 02:56 PM

مراح ابدع بالتعليق ولكن راح اقتبس من كلام اخوي ابو غسان انو( تقرير خفيف ولطيف) وهذا شي متعارف عنك تجبين الشي من الاخر وفيه فائدة للجميع أشكرك يا RAYYANAH من قلبي

وايضاً تعليق اخوي AL Tunaiji كله نفس المنطق الي ف نفسي الله يعطيه العافيه ومثل ما قال اخوي أستمري هذا هو الكلام ..

والحمدالله ع سلامتكم ونشوفك بأذن في تقرير جديد

Abu Muataz, AL Tunaiji, توبليرون و 1 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رِحلَة كُوريَا الجَنوبيَّة - ( سِيئُول + جيجُو ) - يُوليُو 2022	Boarding Pass	بوابة كوريا الجنوبية	66	10-03-2024 12:46 AM
جولاي 2023	Reham2013	بوابة سويسرا	7	18-05-2023 06:02 PM
اوربا في صيف 2023	Rema	بوابة سويسرا	3	23-01-2023 01:41 PM
رحلة الى أوروبا 2023	Noorbash	بوابة الدول الاخرى	4	16-08-2022 10:42 AM