رحلتي الجميله لطوكيو 2015 - الصفحة 16

هداوه · 09-05-2015, 04:56 PM

السلام عليكم ورحمة الله وبركاته

مقدمه

يسعدني صباحكم ومساكم

أشكركم ع اهتمامكم بتقاريري واشكر كل من سأل عن تقرير اليابان

والسموحه اني تأخرت في تنزيله والله غصبن عني

واليوم قلت خلني أبدأ وادبس عمري ههههه عن أهون وما أنزله

ابا تشجيعكم عشان الحق اخلصه قبل ارمضان

اليابان
أخيرا تحقق الحلم بزيارة اليابان

السنه اللي طافت اقترحت ع شباب العائله من اخواني وخواتي وعيالهم

برحله جماعيه لليابان

ما أدري يتني هفه اودي عيالي وعيالهم الشباب

ورتبت كل شي وحجزت الفنادق

ولكن مرور أخويي وعياله بظروف صعبه بفقدان امهم ووجود اسماء في المستشفى

خلانا نلغي الرحله مراعاة لمشاعرهم

ولكن ظل الحلم يراودني أنا وبناتي

وقررنا السنه نقوم بهاي الرحله بروحنا

ورتبت لهاي الرحله من شهور طويله بديتها أول شي في الفنادق

مابتصدقون لو قلتلكم اني حجزت الفنادق قبل سفرنا بسنه تقريبا

لأنه الوقت اللي قررنا نسافر فيه يعتبر موسم وممكن مانحصل الاسعار والفنادق اللي نباها

وحجزت وقتها في الهليتون طوكيو اللي في شينجكو

Hilton Tokyo Hotel

وهيلتون طوكيو باي القريب من مدن الالعاب

Hilton Tokyo Bay

وفي بيست ويسترن شينجكو

ولكن بعد شهور غيرت كل الفنادق وغيرت خطة السكن من ناحية الاماكن

والسبب اني حصلت فنادق أفضل في السعر والموقع

بتعرفون أكثر من خلال التقرير

تفاصيل رحلتنا

تاريخ الرحله

من 3 /4 /2015 الى 14 / 4 / 2015

المسافرون

انا وبوعيسى وبناتي

عبادي الله يحفظه رفض يسافر ويانا متعقد من أيام كوريا ويلس بيت أخويي

والصراحه أفضل لما مايا ويانا كان وايد بيتعب من المشاوير

الطيران المعتمد

انا وبوعيسى ع البزنس

وحصلت البزنس في السيره بس

وفي العوده حصلتها في آخر لحظه وماحصلنا حق العيال للاسف

الاسعار تختلف بحسب الشهر اللي تحجزون فيه يعني السعر متغير

ساعات الطيران

من دبي الى مطار هانيدا

9.45 ساعات

في العوده من مطار هانيدا الى دبي 11.15 ساعه

اخترت مطار هانيدا لأنه هو الاقرب ع فندقنا ولأنه هو اللي حصلت فيه كرسي ع البزنس

الفيزا

الصراحه ماعندي أي تفاصيل عنها لأنه مقر عمل بوعيسى هم خلصونا هالموضوع

المواصلات

اعتمدنا هناك أكثر شي ع الاندرجراوند والقطارات والباص

أما التاكسي يمكن مرتين بس استخدمناه كان وايد غالي

أفضل تاخذون وحده من هالبطاقتين حق استخدام الميترو والقطار والباص وتتعبى متى مافضت

الاتصالات

الصراحه هالموضوع مافهمته لا في كوريا ولا في اليابان

لما وصل بوعيسى المطار سأل محل للاتصالات اسمه

Mobile Communication Service Counter

موقعهم ع النت وفيه كل التفاصيل تقدرون تحجزون عن طريقهم

www.gsm-rentafone.co.jp/e/mobilecom/lineup_dm/index.html

سألهم عن بطاقات السيم كارت حق آي فوناتنا بس قالوله

انه السيم كارت مانقدر نستخدمه لاتصالاتنا انما فقط لخدمة الداتا

واذا نبا الاتصالات لازم نأجر تلفونات من عندهم

قام بوعيسى وأجر 4 تلفونات منهم

كل فون ببطاقته وفيه ايجار يومي ع المكالمات الصراحه ما أعرف التفاصيل

بس لما عرفت انه بوعيسى أجر التلفونات وحسبت الاجمالي طلع ع المده كلها بيكلفنا 1500 درهم

قلتله مافي داعي الأهم انه يكون عندنا نت اما الاتصال بيننا مابنحتاجه الا قليل

وفي هاي الحاله بنستخدم موبايلاتنا ومايكلف كثر هالمبلغ

وكنت أباه يأجر جهاز نشبك فيه نحن كلنا حق النت

ولكن لما سألهم عنه قالوا خلص

ومن قبل السفر باسبوعين وانا أطلب من بوعيسى انه يأجر من

الشركه عن طريق النت ونستلمه هناك

بس ماكان مقتنع ويقول مافي داعي وبناخذه من هناك

وكله يقوللي : هاي اليابان

وانا أقوله

أنا أعرف أكثر عنك من تقارير الناس وتجاربهم

وهو راسه يابس وممقتنع

وطلعت اليابان خرطي هههههههههه

في الأخير ظلينا بدون نت الا اذا حصلنا واي فاي

وهناك قلتله شفت ماسمعت كلامي

قال ماتوقعت

عموما ماكانت بالنسبه لنا مشكله أحس أفضل يوم تمينا بدون نت

كنا دايما مع بعض ومحد منشغل بفونه

هاي شركه بعد ممكن تحجزون عن طريقها

http://www.jalabc.com/english/index3.html

العمله

عملتهم تسمى الين و1000 ين تعادل 30 درهم تقريبا

مستوى المعيشه عندهم

بلد مستواها مثلنا ومثل اوروبا ومافيها الغلا المبالغ فيه

الجو

في الوقت اللي سافرنا فيه يعتبر شتوي ربيعي

والحراره كانت تتراوح في الوقت اللي زرناها مابين 3 درجات و13

فيه أيام كانت جدا بارده

وبعض الايام كانت ممطره وأغلب الايام مغيمه

الكهرباء في اليابان

في البدايه كنت متوتره عسب هالموضوع لأنه الفولت عندهم

100 ونحن اجهزتنا 220 - 240

ولكن الحمدالله بالنسبه لجراجات الفون كانت الامور طيبه بس

للجدر الكهربائي واجهتني مشكله عقب بخبركم عنها

وقبل لا أسافر اشتريت محولين اظن اسمه دابتر اللي يحول

الكهرباء من 220 الى 100 واول ما استعملته حرقته زين ماحرقت جدري والسبب

اني ركبته بالغلط ههههههههههه

بالنسبه للبلكات المطلوب أكثر في فيشاتهم هو بلك بو راسين
شرات هذا

وبعد الفندق يوفرلكم البلكات لو احتجتوا

الأكل في اليابان

يعتبر مشكله وممشكله

أول شي لأنها بلد ديانتها البوذيه فمايجوز ناكل من لحومهم وديايهم

بس الحلو في اليابان انه فيها الكثير من المطاعم المتنوعه

والكافيهات في كل مكان وممكن تختارون بعض الاطعمه المناسبه

بالاضافه لوجود مطاعم حلال متنوعه ومنتشره في مناطق معينه

اللغه
طبعا هم لغتهم اليابانيه ولكن تفاجأت انه الكثير يتكلمون الانجليزي

ولو مايعرفون الانجليزي بعد يساعدون

المرشد السياحي وشركات السياحه

في اليابان ممكن تتفسحون فيها وتتعرفون عليها بعدة طرق

باعتمادكم ع نفسكم والفندق بيساعدكم كيف توصلون لأي وجهه

وممكن عن طريق شركات السياحه

واللي يكون لها برامج معينه وممكن تحجزون منهم قبل سفركم أو عن طريق فندقكم

وعادة تكون هاي الشركات أسعارها مكلفه خصوصا اذا عائله

لأنهم يحاسبونكم ع كل الشخص فالاجمالي بيكون غالي

وأخيرا ممكن يكون عن طريق مرشد سياحي

وهذا صعب تحصلونه وماأدري اذا أصلا متوفر

ولكن أنا حصلت مرشده سياحيه يابانيه رائعه وايد فادتنا واستوت صديقتنا

وهاي قصتها قصه بخبركم عنها عقب

مقارنه بين اليابان وكوريا من وجهة نظري

اليابان أجمل بوايد من كوريا من عدة نواحي

أولا : اليابان أشرح وفيها كثير من الانشطه والاماكن السياحيه المتنوعه غير عن كوريا

ثانيا: تنوع المطاعم والكوفيهات ووفرتها في اليابان أكثر من كوريا

ثالثا : الشعب الياباني أكثر طيب وخدوم من الكوري

رابعا : اليابان أنظف من كوريا وماتشمون الروائح الخايسه فيها مثل اللي كنا نشمها في كوريا

خامسا : اليابان أجمل من كوريا عموما

سادسا : كوريا تتميز عن اليابان انها أرخص من ناحية التكاسي وكن نعتمد عليها أكثر

بينما اليابان فأكثر شي نعتمد ع المواصلات العامه القطارات والباصات

سابعا : الجو تقريبا متشابه بينهم

ثامنا : اليابان أفضل السوق فيها من كوريا بس عموما ماعجبني التسوق في الاثنين

تاااابعوني

الايمانمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي الى جورجيا يونيو 2015	Fahad Mandi	بوابة جورجيا و اذربيجان	115	11-07-2018 12:02 PM
الطيور الجميله	أبوهمس	بوابة اثيوبيا	8	16-07-2015 11:11 PM
رحلتي إلى تركيا 2015 ( #اليوم_الثاني )	المصور أحمد المعراج	تركيا	12	08-06-2015 10:49 AM
مقتطفات من رحلتي قطر يناير 2015	Fahad Mandi	بوابة قطر	31	28-05-2015 10:14 AM