رحــلــتــي شــهــر الــعــســل أمــــريــــــــــــكـــــــا - الصفحة 6

ali pontiac · 29-06-2015, 12:44 AM

صوره حق مطار شيكاغو O'hare inetrnational air port اكثر المطارات العالميه إنشغالا

ومن شيكاغو الى ناشفيل

شيكاغو من فوق ... بأذن الله بزورها السنه الجايه

Nashville ناشفيل هي عاصمة ولاية تينيسي Tennessee

وهذي موقعها في الخارطه الأمريكيه

يمكن البعض اول مره يسمع فيها هذي المدينه، طبعا ناشفيل مب مدينه سياحيه ابدا ،السبب الي خلاني ازورها هوه National Corvette Museum متحف الكورفت الدولي ، الكورفت سياره رياضيه امريكيه واعشقها من الصغر (مجنون كورفت)، قلت انه دام قاطع كل هذي المسافه ورايح امريكا ليش مازور المتحف والمصنع وكانت احد امنياتي والحمدلله رب العالمين الله يسر علينه امورنه وشفت المكان

في البدايه كنه بنروح بس يوم واحد ، يعني يوم الوصول واليوم الثاني نزور المتحف والمصنع واليوم الثالث ماشيين، بس انه مددت يوم قلنه اكيد ناشفيل فيها اشياء وخل نكتشفها

متحف ومصنع الكورفت مب في مدينة ناشفيل ولا في ولاية تينيسسي ، المتحف والمصنع في ولاية كنتاكي Kentucky في مدينة اسمها Bowling Green

بس اجرب مطار حق المتحف اهوه مطار ناشفيل ، ويبعد عن المتحف مسافة ساعه وشوي بالسياره ، تطلع من ناشفيل وداخل حدود ولاية كنتاكي لي منطقة Bowling green

في مطار قريب من المتحف بس صغير مطار خاص للطيارات (الجت)

ولاية كنتاكي فيها مطار Louisville international airport ، بس مطار ناشفيل اقرب، طبعا عرفت من موقع متحف الكورفت كاتبين افضل طريقه للوصول للمتحف عن طريق مطار ناشفيل

وكنه بنسكن في فندق اسمه Sync قريب جدا من المتحف ، واكثر الي يسكنون فيه حق زيارة المتحف والي يقون يشوفون سيارتهم واهيه تنصنع

بس كنت وايد استخدم خرائط قوقل google map قبل لا احجز وكنت اشوف انه المنطه مافيها اي شيييييي فقط هارديز ومطعم ومحطة بترول ، لنه المتحف صاير على الخط السريع،غيرت الفكره وقلنه نسكن في المدينه اقرب لنه وحق المطار وناخذ سياره اجار افضل والحمدلله انه اخذنه سياره، ماسكنه في وسط المدينه ، سكنه في منطقة الفنادق الي يم المطار ، منطقه هادئه وآمنه جدا ، لنه قريت في قوقل انه ولاية تينيسسي من اخطر الولايات في امريكا واكثر معدل جرائم ، بس ابد ماشفت شي من هالقبيل الحمدلله

حجزت السياره من نفس الشركه Dollar وكنت حاجز نفس الكيا ، كيا ريو ، بس انه ماعرف شقصة هذي الشركه صحيح رخيصه بس انصحكم تحجزون من شركه افضل مثل Budget و Thrifty لأنه كنت حاجز الكيا وعطوني شيفروليت سبارك ! المفروض يعطوني سياره بحجم الكيا ، عطوني سياره اصغر يادوب الشناط دشو فيها ، وغير آمنه وصغيره جدا جدا.

وطلعنه من المطار، شوفو في الصوره اللافته الي على اليسار مكتوب Rental cars حق ترجيع السيارات الأجار

وصلنه الفندق Radisson Airport Hotel

منطقة الفندق حلوه هادئه في يمها مطاعم فاست فود ومحطات بترول واااايد ، وكل محطه يختلف سعر بترولها عن الثانيه لنه شركات بترول متخلفه وايد

فديو تصوير عند الفندق
V

نزلنه الشنط وصلينه وظلم الوقت ،قلنه بنطلع نتعشه و نرجه انام حق بكره ، اكثر المطاعم في امريكا تسكر الساعه 10 الليل ، المهم صار خاطرنه في اكل هندي وحشتنه البهارات والرز/العيش ، وبرنامج الـ Yelp مايقصر

حصلنه مطعم هندي وكان ممدوح ضبطنه الـ GPS ورحنه ، احيانا استعين بالـ GPS قارمن الي شركة التأجير تعطينه ، بس احيانا قوقل Map يكون ادق

وهذي صوورة الأكل

طبعا حاااار وانه احب الأكل الحار

كانت الشوارع مظلمه يوم وصلنه عند المطعم ، شفت مكان مكتوب عليه مقهى عربي ، لحم كباب!!! تعجبت وانه امشي اشوف مكتوب على المحلات واهيه مسكره لحم حلال ، ماتوقعت بشوف هذي الأشياء في منطقه مثل هذي

رجعنه الفندق و ارتاحينه

ناشفيل اليوم الأول

صحينه الصبح وعلى طوووول ضبطنه الـGPS على المتحف

صور الدرب

الدرب ريفي وايد كنت اشوف نسور

في الدرب اشتغل مفعووول الأكل الهندي وانه بنص الدرب وين ارجع الحين؟؟ قلت اصبر ماقدر ... المهم شفت استراحه وفي مطعم هارديز وقفت وطلبت شبس على اساس اني ماني داخل حق الحمام ، لازم تاخذون احتياطكم اذا تاكلون اكل هندي

المهم ارتحت وكملت المشوار

اسم الشارع كورفت درايف

و وصلنه

طبعا هذي الكورفتات الي واقفين في الصاله ، حق استلام عن طريق المتحف ، في امريكا يصير تطلب السياره وتستلمها من المتحف طبعا بتكلفه زياده ، Museum delivery ويكتبون داخلها اسمك ، ويصير تروح تشوف سيارتك اذا تطلبها بمواصفاتك واهيه تتصنع من اول يوم لي يوم الإستلام وطبعا بتكلفه خاصه

صوره من قوقل حق لسيارات الي اصحابها يشوفونها تتصنع او يستلمونها من المتحف يصير تكتب الي تبغيه في قطعه معدنيه داخل السياره ، اما السيارات العاديه فقط مكتوب على القطعه Corvette
صورة توضيحيه هذي السياره صنعت حق شركة Venegeance Racing شركة محترفه في تزويد السيارات

نرجع حق صوري

طبعا رسوم الدخول 10 دولار فقط للشخص حق المتحف والمصنع

في فلم وثائقي قصير عن السياره صورت ثواني منه

فيديو
V
V

1966 الجميله

الجيل الرابع ابتدى من 1984 الى 1996 طبعا هذي السياره الوحيده لسنة 1983 ، سنة 1983 هيه السنه المفقوده للكورفت مانزلت بسبب يوم بصنعون الجيل الرابع واجهو مشاكل وايد بسبب التكنولوجيا الي اول مره يستخدمونها فاحتاجو وقت اطول حق تضبيط امورهم ونزلت في سنة 1984 ، يعني لا احد يقولكم صار عندي كورفت 1983

اسم كورفت جاي من المدمره الحربيه

الأب الروحي للكورفت اسمه زورا ، امريكي من اصل روسي

ZR1 الجباره بقوه 638 حصان

المحرك الي خلاهم يفوزون في سباقات Le Mans

محرك اخر سنة للجيل الرابع

السيارات الكونسبت (نسخ تجريبيه للمسقبل) طبعا هذي تصميمات في الثمانينات وبداية التسعينات حق الجيل الخامس من 1997 الى 2004

هذي يا جماعة الخير صورة المكان الي صارت فيه الكارثه ، صار انهيار ارضي وصارت حفره عميقه في المتحف ابتلعت اندر واثمن سيارات الكورفت ، لحسن الحظ انه هالشي صار وقت الليل وماكان فيه زوار للمتحف

طبعا تم تصوير الحدث بكيمرات المراقبه (فيديو من يوتيوب)
V
V

الي صار شي مخيف

وهذي السياره الوحيده الي نجت

اما الباقي

في احد يعشق الشفر معانه؟

ورجعنه صالة الإستلام

الأسود ملك الألوان

الأرضيه خارج المتحف

فيديو كورفت يستلمها صاحبها لو تلاحظون المتحف كله شياب ، اصحاب الكورفت في امريكا شياب وفي احصائية تقول اكثر الي يشترون الكورفت اعمارهم فوق الـ 50 سنه بس في منهم شباب ايضا
V
V

فيديو للمتحف
V

ركبنه السياره وتجهنه للمصنع ، المصنع مقابل المتحف اقطع بالسياره الشارع وندخل منطقة المصنع ، وداخل المصنع فيه توور يبتدي الساعة 8 ونص وتور يبتدي 11 ونص واخر تور الساعه 2 ، للأسف ممنوع تدخل معاك اي شي داخل المصنع لا كاميرا ولا شي مجرد بطاقة الهويه، دخلنه التور وكان شي جميل نشوف الكورفت واهيه تتصنع ، مرشدين التور طلاب جامعه هندسة قريبه من المصنع ، ويشتغلون بشكل جزئي كمرشدين للتور في المصنع ، بس الولد ماكان حماسي مثل المرشد الي كان في مصنع الشيلبي.

صورة من قرب المصنع للخزان ، كل الي عندهم الكورفت يصورون في هذي المكان اله انه للحين ماصار عندي كورفت ، الله يرزقنه

وخلاص انتهت رحلة مصنع ومتحف الكورفت والي يبغي معلومات اكثر هذي موقع المتحف

National Corvette Museum

ورجعنه الدرب نفسه وطلعنه من Bowling green - Kentuky، واحنه نمشي نشوف مناظر حلوه ، قلت حق زوجتي شوفي في قوقل اذا في منتزه في طريقنه بنوقف ونصور

وقفنه عند مكان حلو وهادئ اسمه Rockland recreation area

ركبنه السياره مشينه مسافه بسيطه وكان فيه منتزه اسمه Cedar hill park

الجو طبيعي جدا بس انه لابس شتوي خدعني الجو لنه اول ماوصلنه ناشفيل كان فيه بروده

ورحنه مطعم كنت متحمس له من البحرين اسمه Kayne prime متخصص في لحم الستيك فيه بس صورة وحده

في المطعم حسيت بشوي من العنصريه ، سالني النادل هل تبي شراب ، قصدهم شي كحولي، قلت له لا بس عصاير طبيعيه قال بس برتقال عندنه وقلت له معليش، ويوم مشه سمعته يقول حق زميله بسخريه مايشربون كحول

طبيعة شعب ناشفيل احسهم مب معتادين على السياح بس انه ماشفت منهم مضايقات

وماعندهم اله شارع واحد حيوي في downtown اسمه The district

ورحنه نشوفه

اطول مبنى في ناشفيل حق شركة اتصالات AT&T

في برنامج الـ Yelp طلع لنه محل ايسكريم اسمه Mike وكان عليه زحمه ، الصراحه عجييب ومصنوع في بيت ، مثل مانقول شغل بيت وبدون مواد حافظه والوان

اخذنه الأيسكريم ورحنه جوله على عربة الخيول

فيديو
V
V

وهذي كانت نهاية اليوم في ناشفيل يتبع....

قطرية كولمعجبون بهذا.

مقدام · 29-06-2015, 07:19 PM

جزء رائع عن ناشفيل والله يعين زوجتك على معارض ومتاحف السيارات ههههههه

مستمتعين ومتابعين معاك بجولاتك الامريكية

آخر مواضيع مقدام

- الشمال الايطالي ثم الى بورتفينو وجنوه 2019
- رحلة شتوية الى جورجيا (تبليسي وثلوج غودوري)
- رحلتي العائلية الى الأراضي النرويجية
- كرواتيا ... زغرب وروعة بحيرات وشلالات بلتيفيتش
- جولة في ارض الطبيعه (البوسنة) .. مايو .. 2018

توقيع : مقدام

(كن _سفيرا_ لدينك_ ووطنك )
احداثيات وخرائط للاماكن سياحية شمال ايطاليا
موسوعة مقدام الامريكية ..اماكن سياحية.احداثيات.خرائط
احداثيات ومواقع الاماكن السياحية في سويسرا وما حولها
جنيف اين تذهب فيها واين تذهب منها ..
خريطة سويسرا السياحية

ali pontiac · 02-07-2015, 05:24 AM

ناشفيل اليوم الثاني

طبعا مثل ما قلت لكم كنت ناوي امشي من ناشفيل ثاني يوم بس مددت يوم نشوف شنو فيها

من معالم ناشفيل الـ Parthenon الي تم بنائه في سنة 1897 وهوه نسخه بالضبط من البارثنون اللأصلي الي في اليونان الي تم بنائه في سنة 447 قبل الميلاد

ويقع البارثنون في منطقه يسمونها Tennessee Centennial and International Exposition وهوه معرض احتفال السنه المئويه لتأسس ولاية تينيسي ، الولاية تأسست سنة 1796 وكان مختلف المكان وفيه بعد هرم نفس مال مصر واشياء غير ترمز لكل دولة

يوم كنه نشوف صور المكان من النت واحنه نخطط حق السفره المكان كان جميل وحواليه وروود وايد ومكان حلو حق المشي

بس يوم رحنه انصدمنه ، لأنه المكان كان يسوون له صيانه واعادة تجديد كامل ومافيه الورود والنهر والهرم ، اقصد المكان والحديقه الي حوالين البارثنون

صور البارثنون يوم وصلنه

وهذي اثينا الي اليونانيين القدماء يعتبرونها ( استغفرالله ) ربهم ، التمثال حطوه داخل البارثنون سنة 1990 ، سنة ميلادي يعني

رسوم الدخول كان مبلغ بسيط وكان داخل تماثيل وصور

بس ماصورت ماطولنه داخل ومشينه

صور قديمة من المنطقه الي حوالين البارثنون من قوقل

طلعنه وتغدينه من مطعم برجر طبعا كان افضل مطعم في ناشفيل مصنف في الـ Yelp

شفنه في قوقل طلع لنه حديقه حلوه اسمها Cheekwood-Art & Gardens

صورة الدرب

المكان كان دربه حلو بيوت وملاعب قولف ، وصلنه عند البوابه كانت في موظفه سألتنه من اي دولة انتو؟؟ قلت لها البحرين واخذت بطايقنه الشخصيه حق تدخل بياناتنه، قالت لنه ماتطلع ديرتكم في الكمبيوتر ، حته في تور الهيلوكبتر نفس القصه

المهم دخلنه وقالت لنه الساعه 5 يسكرون المكان

المكان جميييل ويسوون فيه حفلات زفاف وفيه متحف فنون

وطلعنه من المكان الجميل ورجعنة لمنطقة الـ District هناك في قريب من الشارع متحف Country music hall of fame نسيت اقولكم شغله عن ناشفيل ، ناشفيل يسمونها Home of country music مدينة الموسيقى الريفيه واهيه بلدة اشهر المغنيين الي يغنون الأغاني القديمة مثل الفيس و جوني كاش و كيني روجر

طبعا المتحف فيه قيتاراتهم والات العزف وسياراتهم وغيره ، احنه رحنه على نهاية الوقت وفيه مرشد وتور داخل المكان بس قالو لنه انتو وصلتو على نهاية الوقت ومافي تور ، وقلنه لهم مب مشكله بس نبي ندش على اي حال

سيارة الفيس

السياره الأصليه في الفلم الأسطوري Smokey & the Bandit 2 بونتياك ترانز ام

وطلعنه من المتحف واحنه نتشمه صورت Schermerhorn symphony center

وتمشينه لي الـDistrict ومرينه مره ثانيه محل الأيسكريم Mike

ورجعنة واخذنا السياره ونتشور في المنطقه وهذي صوره بعض المحلات الي نشوفها بالعربي المنطقه فيها عرب واتراك وايرانيين واكراد ماتوقعت بشوفهم خصوصا في اكثر الولايات الجنوبيه عنصريه

ورجعنه الفندق وجهزنه نفسنه لرحلتنه الصبح حق اخر مدينة في رحلتنه واهيه نيو يورك يتبع ....

قطرية كولمعجبون بهذا.

albarood · 02-07-2015, 07:38 AM

هل تعرضت للعنصرية في ناشفل او صادفك موقف اخر غير شرب الكحول؟
وهل ناشفل واضحة فيها العنصرية؟

ali pontiac · 02-07-2015, 10:39 AM

اخوي العزيز albarood الحمدلله ماتعرضت للعنصريه

بس ولاية تينيسي من الولايات الي اهلها يسمونهم Rednecks او Hillbillies

معرفوين بعنصريتهم خصوصا للعرق الأسود وتارييخهم في استعباد الأفارقه

وهذي علمهم المعروف

albarood · 02-07-2015, 11:07 AM

اقتباس : المشاركة الأصلية كتبت بواسطة ali pontiac

اخوي العزيز albarood الحمدلله ماتعرضت للعنصريه

بس ولاية تينيسي من الولايات الي اهلها يسمونهم Rednecks او Hillbillies

معرفوين بعنصريتهم خصوصا للعرق الأسود وتارييخهم في استعباد الأفارقه

وهذي علمهم المعروف

هذا علم سابق للولايات الكونفدريالية الجنوبية ابان الحرب الاهلية الامريكية بين الشمال والجنوب

ali pontiac · 02-07-2015, 10:59 PM

عليك نور يا الـ Barood هذلين اهمه اهل الجنوب

blue@sky · 02-07-2015, 11:11 PM

ما شاء الله عليك اخ علي تقرير طيب
مبروك الزواج والله يبارك لكم بحياة طيبة

بصراحة استغرب من
موظفين الجوازات الأمريكيه موجودين في مطار ابو ظبي
وش السالفة هم بعيدين عن منطقتهم
واتمنى مطار حمد الدولي ما نلاقيهم بعد

كيف تغطية تي موبايل

والف شكر لك

ali pontiac · 03-07-2015, 12:28 AM

Blue@sky شكرا الغالي

تغطية T Mobile ممتازه الباقه كانت 98 دولار ، مع بيانات غير محدوده وناسي كم مدة المكالمات المجانيه لمدة شهر.

blue@sky · 03-07-2015, 12:32 AM

اقتباس : المشاركة الأصلية كتبت بواسطة ali pontiac

Blue@sky شكرا الغالي

تغطية T Mobile ممتازه الباقه كانت 98 دولار ، مع بيانات غير محدوده وناسي كم مدة المكالمات المجانيه لمدة شهر.

العفو
وشكرا لك

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحــلــتــي الــثــانــيــة إلــى مــالــيــزيــا (مــايــو 2015) ...	Bu Rashid	بوابة ماليزيا	199	22-10-2019 08:03 AM