سفرتي لتركيا في النيو يير 2016 - الصفحة 2

ATL · 24-01-2016, 10:03 AM

اقتباس : المشاركة الأصلية كتبت بواسطة Gunner10

الحمدالله اخوي على السلامة

توني قريت الفقرة الاولى وبعد شوي اكمل ان شاء الله بس لو تحط الصور شوية

كل الود

ودي لكن الصور في الجوال اي فون يبي له سالفة على ما انقل الصوره من الجهاز للكمبيوتر
وانا اكتب الموضوع في الدوام لكن قلت احط سمايلات يعني تعطي جو

اقتباس : المشاركة الأصلية كتبت بواسطة آخـــرفـــرصـــة

الحمد لله على السلامة
يبدو انكم استمتعتوا بالرحلة ماشاء الله
ملاحظاتك ايجابية عن الاتراك
واضح صرت خبير بالتعامل معهم

برافو عليك

ايه الحمد لله لاني زي ماقلت من كلام الناس كنت متخوف لكن الحمد لله تسهلت
لا وش خبرته بس من كثر ما كنت متخوف كنت حذر

اقتباس : المشاركة الأصلية كتبت بواسطة فيصل

وعليكم السلام
حمدلله علي السلامه
من اسطنبول الي بورصا ما جربت تطلع علي العباره
الطريق كم أخذ منك وقت
الشركه اللي استأجرت ذكرت سمعت أن تعاملها سيئ وش رأيك

انا طلعت من اسطنبول الى سبانجا قوقل كان يقول الطريق ساعه ونص بالكثير
وطلعت من سبانجا الى بورصا

فكرت في العباره وانا راجع من بورصا لاسطنبول لكن بعد مشاورات مع المدام قررنا نكملها خط منها نتمشى في مناطق تركيا ونستكشف اماكن والعباره يبي لها حول ساعتين تمشي في قارب ومويه

وبالنسبه للشركة لو بروح مره ثانيه لاي دوله بحاول ابحث عن شركة عليها الكلام ويكون لها مكتب في نفس المطار
شركه عليها الكلام عشان تعطيك سياره جديدة ونظيفه ولا فيها ريحة دخان ويكون عقدهم واضح
ويكون لهم مكتب في نفس المطار عشان ما اجلس انتظر واتمرمط اتجه للمكتب وتكون سياراتهم جاهزه في المطار ويوصلني موظفهم لها

اقتباس : المشاركة الأصلية كتبت بواسطة ليمونه حزينه

تقرير رائع يعطيك العافيه تفاصيل رائعه ودقيقه تفيد الجميع

الله يعافيك، اتمنى ان شاء الله ان احد يستفيد مثل ما افادوني الاخوان

اقتباس : المشاركة الأصلية كتبت بواسطة كتكات783

تفصيلاتك جميلة جداً ..
وسردك للمواقف أشوف فيها إيجابية للسفر لتركيا ..

انا مثل ما قلت في ردي الاول نظرتي لتركيا تختلف عن كثير من كلام الناس ليش ما ادري يا انه توفيق من ربي او ان الشتاء يختلف عن موسم الصيف والزحمه

اقتباس : المشاركة الأصلية كتبت بواسطة حــســن

شكرا لك لنقل تجربتك ...
والحمدلله على السلامه

الله يسلمك من كل شر

اقتباس : المشاركة الأصلية كتبت بواسطة أبن السلطنة

الحمد لله على السلامة
تقرير رائع يعطيك العافيه

الله يسلتم من كل شر ويعافيك ربي

اقتباس : المشاركة الأصلية كتبت بواسطة أبوفيصل

يازين هرجك شعبي كانه تقرير ماشاء الله تبارك الله

شكلك مدرس

والحمدلله على السلامه متابع معك

لا وش مدرس بس ماحبيت اتكلف في الكتابه لاني بكتب كلام واجد فبيكون ممل اكثر من الحين فقلت خلها على السجيه عشان مايكون جامد وممل

سعدت بطلتكم جميعاً، شكرا

فيصل و أبوفيصل معجبون بهذا.

ATL · 24-01-2016, 10:34 AM

انا صراحه تشتت مخي مدري كيف كان تسلسل افكاري
حسيت اني لو سولفت بكتب سرد عن الرحله كاملة ويبي لها كتيب
فمدري محتار اكمل سرد عن بعض الاماكن الي رحت لها ولا احط لكل مكان موضوع لحاله

على كل حال باختم بنقطه وهي اسطنبول يكفيها اربع ايام فقط ...!!

قبل اسافر كل الناس تقول اربع خمس ايام اسطنبول وين عشر ايام كثيرة بتمل مافيها شئ وخساره
لكن لو اعدد لكم الاماكن الي ما رحت لها او الي مريتها بتقولون اجل مارحت لشئ

طبعاً سياستي قبل لا اسافر كان ودي اسافر على روقان واروح لاي مكان وانا رايق موب افكر في المشوار الي بعده ولازم اليوم اروح لاربع اماكن

بحثت في النت مواقع عربيه واجنبية وحصلت اكثر من متحف واكثر من مطعم واكثر من مدينة وكل شئ يقول انا عندي شئ مميز

لكن انا يالخليجيين عندنا سياسة لاتغامر ورح للمكان الي راحوا له حقين السناب والانستجرام وتقارير منتديات السفر والاصدقاء انا ما احب هالحركه خاصه اذا ترتب على سفرتي او جدولي اني ارتبط باماكن معينه

مثال مطعم "مشاري" على سبيل المثال مكانه في شمال الدولة وباقي المناطق السياحية في جنوب الدولة
فانا لو انه اشهر مطعم في العالم عادي اضحي فيه ولا اروح له عشان اتمشى في باقي الاماكن على راحتي

ففيه ايام يروح علينا الوقت عشان المشوار يعني مشوار لمطعم او حديقه ياخذ له روحه وجيه يمكن ساعتين
خلال هذي الساعتين يمديني اروح لمتحفين او معلمين او سوق ومعلم

اسطنبول للي متوقع يزورها اكثر من مره او عنده سكن دائم فيها انصحه انه في كل سفره يبحث عن اماكن جديده ولا يحاول يكرر زيارته لبعض الاماكن والمطاعم

طبعاً هذي القاعده تنطبق على جميع المدن السياحية ولو حصل لك تبحث في المواقع الاجنبية افضل بتحصل اماكن حلوه ويمكن رخيصه

اعذروني على الاطاله لكن السرد كان مرتجل والذاكره شوي مشتته لكن ا تمنى اني افدتكم ولو بالبسيط

وكان تبوني اتكلم عن الاسواق والمطاعم الي زرتها بلغوني بالطريقه الي تفضلونها ومالكم الا طيبت الخاطر

احمد الحربي و Deena معجبون بهذا.

احمد الحربي · 24-01-2016, 12:56 PM

الحمد لله على السلامه

ماشاء الله عليك اول سفره ورحت كل الاماكن

شي طيب انك غيرت فكرتك عن الشعب التركي من واقع تجربه

يعطيك العافية على طرح تجربتك

واصل فما زلنا مستمتعين معك

ATLمعجبون بهذا.

الدوسي · 24-01-2016, 02:10 PM

من اصدق ماقرأت
بارك الله فيك وحفظك........
متابعون.....

النمسا و ATL معجبون بهذا.

ATL · 25-01-2016, 08:41 AM

اقتباس : المشاركة الأصلية كتبت بواسطة احمد الحربي

الحمد لله على السلامه

ماشاء الله عليك اول سفره ورحت كل الاماكن

شي طيب انك غيرت فكرتك عن الشعب التركي من واقع تجربه

يعطيك العافية على طرح تجربتك

واصل فما زلنا مستمتعين معك

الله يسلمك من كل شر، الله يعافيك

اقتباس : المشاركة الأصلية كتبت بواسطة الدوسي

من اصدق ماقرأت
بارك الله فيك وحفظك........
متابعون.....

شكراً لكم وسعدت بطلتكم

ATL · 25-01-2016, 09:16 AM

امس وانا استرجع المواقف والاحداث
ذكرت موقفين تستحق الذكر

الاول السوق المسقوف والسوق المصري
المسقوف تقريباً اغلبهم نفس البضاعه لكن السعر يختلف
الشاهد الخليجيين الانظار عليهم خاصه في البيالات او الفناجيل "استكانت التشاي"

الشاهد جازت لنا اشكالهم وسالنا اول واحد قالنا ب 120 ليره الطقم 6 حبات مع صحونها
المدام الهمها ربي وقالت لا مافيه ب 60 نص السعر
فكر شوي ثم قال ب 80
عاد طمعت المدام حست بالنصر قالت بكسر راسه بعد دام الدعوه نصب في نصب
قالت ب 60 فكر ثم فكر قال يالله شيل، المدام حست بمدري وش اوصفه لكن جازت لها سالفة المكاسر نصف السعر
قلنا اكيد بنحصل قدام ونكاسره اكثر
خليناه ورحنا

كل ما رحنا محل ماش اقل سعر قدرنا عليه 80 ومافيه الا خوينا الاول ذاك لكن مدري وين محله
واحد يرحب ويهلل ويطلع نفس العلبه ونفس الطقم بكم عشانكم ب 120 العب على غيرنا محصلينها ب 60

قال خذ هذي مني واذا حصلت باقل عطيتك الفرق، خليته ورحت
وانا مسكت معي الا اخذها ب 60 عشان بس هذا الي تو

وافر افر سكه سكه اغلب المحلات تتشابه واستعين بخرائط قوقل وبالصدفه واظاهر شكلهم العشاء يقفلون اغلب المحلات او بعضها لان حسيت الحركه خفت عن النهار

الشاهد حصلت نفس البيالات خويتنا واساله بكم قال ب 120 قلت 60 من الاخر تبي ولا سلام ومشيت قال تعال 80 قلت 60 محصلها بهالسعر وانا اصلا زهقان وابي اخلص
كلم خويه في المحل وقال يالله تعال ب60

السوق المصري يفرق شوي لكن يبي لك ماتشتري من اول نظره
انا رحت لمحل حلقوم مدحوه لي وكان محله موب في وجه السوق صاد يقدر السعوديين لان فيه سعودي في التويتر سوا له دعايه وجاب له زباين يضفون منه

الشاهد ان الحلقوم عنده اظاهر كان الكيلو بعد المكاسر ب 39 او 40 ليره
وداخل السوق المصري اسعارهم في حدود الـ 60 ليره
وطازج حتى انه قبل يومين قدمته لضيوف عندي وكلهم حبوه وواحد يقول ماشاء الله طري وحلوه نكهته انا شريت من واحد وطلع فيه سوس وقاسي لكن مدري من وين شاريه

العبره من هالموقفين انكم كاسروهم في الاسواق الشعبيه بنصف السعر وخلك صامل ورح دور غيره ثم ارجع له واوقات اذا كان السوق كبير احتمال تحصل اشكال ثانيه احلا في المحلات الي داخل لاتشتري من اول محل تشوفه

الموقف الثاني والي يحسب لتركيا
كنا نتمشى في شارع بغداد والمعزبه تقول فيه مشغل يمدحونه هنا تبي تقص شعرها
نمشي الا صدفه شفت مشغل لكن رجاجيل يقصون لحريم قلت خل اسال هالمحجبات وين يروحون لين جو يقصون شعورهم
سلام سلام فيه حريم يقصون للمدام قال ايه تعال دخلت قلت غرفه خاصه قال ايه
طبعا بعد ماخلصت المعزبه اكتشفت ان مافيه غرفه خاصه لكنهم دخلوها غرفت العاملات الي يشتغلون في المحل

طبعا اول ما دخلنا كان الشغل كله لغة اشاره
انا كل شوي اشرح لهم غرفه مستقله ابي اتاكد انها غرفه خاصه الا طلع الله يجزاها خير وحده تركيه جالسه تقص شعرها تتطقطق انجليزي وفزعت لنا ولهم
قالت هذي غرفه للنساء فقط وانت تقدر تنتظر هنا، قلت زين طمنتينا

دخلت شوي الا الي بتقص للمعزبه نادت هالي تتكلم انجليزي شوي الا اشوفهم قالو لموظف جالس يغسل شعر وحده اخلص بسرعه رح الجهه الثانيه

قالت لي المدام بعدين ان الي تقص شعري قالت لازم نغسله قبل قلت لها مابي اطلع رجاجيل عادي نغسله في الحمام قالت لا ممنوع، ثم نادت مره ثانيه الي تتكلم انجليزي انا حسيت فيه شئ غلط اول شئ وش وضعهم رايحين جايين ويكلمون بعض زي الي وش نسوي

شوي خلص الي يغسل الشعر لوحده وراح
عقبها طلعت هالي تتكلم انجليزي وجابت حاجز وحطته بين مكان غسيل الشعر وبين مكان الرجاجيل وثم جلست تمشي جمب حرمتي زيادة حرص انهم ما يشوفونها وهي اصلا متحجبه عشان تروح يغسلون شعرها
انا كنت في كرسي جمبها اراقب الرجاجيل الي يقصون
ولا واحد فيهم جاب خبري ولا خبر زوجتي كلن في حاله ويقصقص الي معه

وشدتني حركة موظف عندهم دخل اظاهر صديق لهم او موظف معهم من الشارع وكان متجه للغرفه الداخليه او مكان الغسيل قام الموظف ويمسك الرجال وكلمه تركي
الترجمه "ياولد فيه حريم ديور"

والله ويرجع ما دخل

صراحه بعد هذا الموقف زاد تقديري للاتراك مع عيوبهم
وللبنات سعرهم ارخص من عندنا في الرياض بمراحل وشغلهم زين لكن يمكننا وفقنا بمحل زين لاتدرعمون اي محل تدخلونه واحرصوا على الستر هدانا الله جميعا

فيصل, ماجد الفهد, احمد الحربي و 2 آخرون معجبون بهذا.

Gunner10 · 25-01-2016, 09:31 AM

والله هذا الي شفت من الشعب بس يمكن تصير مواقف استثنائية وربعنا يعممون

ATLمعجبون بهذا.

أبوفيصل · 25-01-2016, 10:11 AM

ياسلام عليك التكملة شيء جميل

واضيف بأن اسمك يذكرنا يوم 25 من كل شهر ATM ههههههههه

شكرا لك اخي على ذكر الايجابيات والسلبيات

ATLمعجبون بهذا.

فيصل · 25-01-2016, 12:04 PM

يا رجال ديور فيه حريم
خخخخخخخخخخخخخخخخخخخخخخخخخخخخخ

مواقف طيبه تذكر مهما كان
وتشكر عليها

ATLمعجبون بهذا.

ام ريمو · 26-01-2016, 02:56 AM

الحمدلله رحلتك جات ميسره من كثر ماكنت شايل همها
حتى احنا اكثر شي فاتوره المطاعم اجلس اقرأ فيها ادور زياده بس الحمدلله تساهيل وتوفيق بالنهايه
وبالنسبه للكاسات المويه اول مانجلس بالمطعم يجيبوها ع عددنا اكلمه يشيلها بدون حساب وهو مبتسم يشيلها ومايضيفها بالفاتوره
اكثر من مطعم المدينه والملك وحمدي
لانه اساسا انا ماشرب بالكاسه ومالها داعي الحركه

ATLمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
صور من سفرتي الى اسطنبول	سامي 224	تركيا	40	08-04-2017 11:58 AM
الرجاء مساعدتي في سفرتي لتركيا	النور السعودي	تركيا	8	20-01-2016 11:49 PM
خواطر من سفرتي	ابا رواء	تركيا	12	02-10-2015 09:21 PM
مقتطفات وفوائد من سفرتي لتركيا	ابا رواء	تركيا	26	09-05-2015 09:31 AM
ياليت تساعدوني في سفرتي	ام عبد العزيز 1423	ماليزيا	8	11-03-2015 09:45 AM