ما شاء الله

هلا اختي ...
تخطيط رائع وفنادق في غاية الروعه.......

الحمدالله على السلامة اختي

مثل ما وعدتي وفيتي بكتابة تقرير

وافضل ما سويتوا اخذتوا رحلات الفندق الحمراء والخضراء

وان شاء الله تكونون استفدتوا من موضوعي عن كبادوكيا

منتظرين باقي التفاصيل

ولا تنسين حملي الصور على سيرفر المنتدى

https://www.arabtrvl.com/up

الجزء الثاني

كل مرة أسافر أخلي عيالي عند أمي
(عشان جذي لغيت السفر أول مرة على اساس امي بتكون مشغولة مع اختي و عمليتها)
ولدي العود الله يحفظه صار في الصف الثالث
و هالفترة مدارس و عندهم اختبارات نهاية الفصل ف ما حبيت انه يغيب
ف قلت لعمته راح اخليه عندها على اساس توديه المدرسة لان بنتها وياه
(أنا كلمت معلماته و جهزته للاختبارات و في نفس الوقت رتبت مع مدرسة خصوصية تمر عليه البيت كل يوم)
قالت لي خلي ريمه بعد .. قلت لها راح يبقى الثالث بروحه عند أمي
قالت خليهم كلهم عندي .. ترددت و هي ألحت و ما حبيت أردها
وقلت لأمي اذا صار شي بتصل لج و روحي لهم
(قلت هالمختصر عشان اوضح شي راح يصير بعدين)

جهزت شناطهم و أغراضهم و بعدين ييت أجهز شنطتي
قاومت الرغبة الشديدة في التسوق قبل السفر
و اشتريت جاكيت واحد ثقيل و ينفع للمطر و الباقي قلت اشتريه من هناك و خذت معاي اشياء بسيطة تكفيني اول يومين
(تقكير موفق لكل اللي بيسافر في بداية الشتى .. الاسعار خيالية هناك و الكواليتي ممتاز)


يوم السفر طلعنا من البيت الساعة 7.40 الصبح و وصلنا المطار بالضبط الساعة 8



كنا بنصرف مبلغ ليرات
و وقف يمنا واحد بحريني قال ما انصحكم تصرفون من البحرين لانه اغلى صرفو دولارات احسن
و هناك صرفوهم ليرات و اصلا ما لقينا الا 300 ليرة
صرفنا بس 1000 دولار

و رحنا نسوي اجراءات الشيك ان و الجوازات و خلصنا على الساعة 8.25






مرينا حبيب القلب (ستاربكس)
و رحنا قعدنا في اللاونج الخاص بطيران الخليج



توجهنا للبوابة على الساعة 9.50 و ركبنا الباص و بعدين الطيارة




و الطيارة تمشي للمدرج نشوف الشغل في توسعة المطار على قدم و ساق



و طرنا دقايق قبل الوقت








الرحلة فل ... ما شاء الله من كل الجنسيات
الطيارة جيدة و الخدمة بعد جيدة

بعد 45 دقيقة من الاقلاع عطونا مشروبات و بسكوت لذيذ



و قعدت اتابع افلام لحد وقت الوجبة ..

اخترت لحم و زوجي اختار دجاج
وجبتي كانت الذ



صور من الرحلة











و خلاص قربنا نهبط بالسلامة






لما وصلنا و كان المطار زحمة على حسب كلام الطيار ف خذت الطيارة حول ١٠ دقايق لحد ما وقفت مكانها

نزلنا و شفنا الإعداد الكبيرة و خفت عشان ورآنا رحلة داخلية
لكن خذنا بس ثلث ساعة عشان نخلص الجوازات و عشر دقايق عشان ناخذ الشناط

أول شي سويناه إتجهنا لمحل تركسل Turkcel عشان آخذ لي شريحة
و زوجي نسى تلفونه الثاني ف قال ما راح ياخذ شريحة و راح يفعل التجوال
لانه ما يقدر يسكر خطه

في تركسل كان عندهم عرض شريحة نت و اتصال ما اتذكر تفاصيلها للامانة و كان زحممممة فما صورت
وهذا كان العرض اللي يسوقون له لكل اللي يسأل

قلت لهم عندكم عرض نت فقط لاني ما راح احتاج الاتصال يكفيني الاتصال عن طريق الواتساب او الفيس تايم
فقال عندهم عرض نت فقط ب 185 ليرة ل 15 قيقا و كنت راح اخذه كشريحة لتلفوني
لكني تذكرت اني لما كنت اقرا لقيت محل يأجر مودم و يوصولونه اي مكان
و انا ما اتفقت وياهم لان خفت يتأخرون علينا و إحنا ورانا رحلة ثانية
فسألته اذا عندهم مودم قال عندهم لكنه للبيع مو للاجار ب ٢٥٠ ليرة
قلت لزوجي ناخذ المودم و نحط فيه شريحة النت و خلاص و انا وانت نستحدمه و نعبيه وقت ما نبي
احسن من انت تشغل التجوال لان راح يكون مكلف عليك
كان فيه عرض من زين 1 قيقا ب 20 دينار !!!!

خذناه و قال يتفعل بعد 20 دقيقة

حركنا على مطار الرحلات الداخلية مشي ١٠ دقايق و كان زحمة و اصغر من المطار الدولي طبعا
طبعنا البوردنغ من الجهاز و دخلنا الشناط و قعدنا في كوفي شوب نسيت اسمه
ما كنا نبي شي شبعانين بس خذنا عصير عشان نقدر نقعد
العصير ب ١٧ ليرة تقريبا و كيك ب ١٣ ليرة




فتحو البوابة بعد تأخير و صعدنا الطيارة على الساعة 5.55



الطيارة جديدة و كل شي متوفر فيها
بس ما عطونا سماعات و لا احتجناها




رحلتنا المفروض 6.10 المغرب لكنا طرنا بعد متأخرين تقريباً ١٠ دقايق



الرحلة مدتها ساعة و 5 دقايق تقريباً
وصلنا مطار كيساري الساعة ٧.٢٥ و سبع ونص بالضبط احنا مخلصين
صالة المطار صغيرة مافيها الا سيرين للشنط و بعدين باب و خلاص عالشارع



مثل ما قلت إنا تخلينا عن فكرة السايق و رتبت كل شي مع الفندق
ف كان السايق ينتظرنا برا ب ورقة فيها اسمنا و اسم واحد ثاني

وصلناه اول فندقه تقريباُ 3 دقايق من فندقنا
لما وصلنا فندقنا كانت الساعة 9 تقريباً أو قبلها بشوي ما أتذكر بالضبط

فندقنا يعتبر بوتيك هوتيل مثل ما قلت من الاول
تملكه أسرة من زمان و كان بيتهم لفترة السبيعنات وقت ما الحكومة طلبت من أصحاب الكهوف إنهم يتركونها
و عطتهم تسهيلات للسكن في مكان ثاني
ومع الطفرة السياحية في كبادوكيا
أصحاب الكهوف إستغلوا كهوفهم كفنادق
الاسرة رممت البيت من 7 سنوات و الفندق فيه فقط 10 غرف
اللي يشتغلون فيه أصحاب البيت
المالك و عياله و زوجته و زوجات عياله
و عندهم في حديقة الفندق كلب و دجاج


شافنا ولد صاحب الفندق اللي أهوه المدير


(صورة من ثالث يوم لنا في كبادوكيا)

و أهوه نفسه اللي تواصلت معاه بالايميل
عطانا مفتاح غرفتنا و شرح لنا شرح مبسط عن الفندق
و سألناه عن العشى في مطعم الفندق ف قال راح يسكرون بعد شوي و إعتذر
و قال مطاعم السنتر تظل مفتوحة لل 11 و المسافة قصيرة
و قال عن اللحم بالجرة أشهر وجبة عندهم في المنطقة

صور متفرقة للفندق و المنطقة المحيطة فيه في أوقات مختلفة
















نزلنا الشنط في الغرفة

حجزنا غرفة الغروب مع بلكونة و جكوزي









و معدات الشاي و القهوة و الماي مجاناً



و الحمام تكرمون








تقييمي للفندق و الغرفة و الخدمة فيه راح يكون في نهاية جزء كبادوكيا



و رحنا نشوف مكان نتعشى فيه
المكان ظلاااااااام
بس ماعرف ليش ما كنت خايفة الا متحمسة

للاسف كل الصور عن هاليوم مادري وين اختفت
يمكن صورتها في السناب و نسيت أحفظها

عموماً
وصلنا الستي سنتر على ال 9 ونص
و المسافى خذت منا تقريباً 10 دقايق و الطريق منحدر نازل
أقول لزوجي النزول سهل الحين بس بعد العشى الله يعين

السنتر هادئ أكثر من اللازم و ظلام شوي
مرينا على صراف و حاول زوجي يسحب كاش بس الجهاز ما يشتغل و
ما لفينا وايد و دخلنا اول مطعم جدامنا

إسم المطعم
Cappadocia Pide House Restaurant



طلبنا شوربة عدس
روب بالخيار



و طبق واحد لحم بالجرة (مادري وين راحت صورته)
الشوربة ما حبيتها و الروب أو الزبادي لذيذ أما اللحم أقل من عادي

و التكلفة ٥٤ ليرة
و تقييم المطعم 5/10 .. ما أنصح فيه


و صح طريق الرجعة كان متعب لانه منحدر وايد
و أسولف لزوجي شكل المدينة وايد صغيرة دام هذا سنترهم نص شارع و مافيه الا كم مطعم و صراف واحد


لما رجعنا (كاان) خبرنا ان المنطاد تكنسل بكرة عشان الجو مو مستقر و راح يشوف لنا إمكانية بعد بكرة
و سألناه شنو ممكن نسوي بعد لأن حسب الايميلات بيني وبينه
قال يفضل نحجز في نفس الوقت بدل من قبلها
عطانا بروشور عن الرحلة الحمراء و الرحلة الخضراء المشهورين
و قال احسن بكرة نبتدي بالرحلة الحمراء لانها اقصر و بعد بكرة الرحلة الخضراء
سألته عن رحلة الدبابات ف قال اطول رحلة تكون ل 4 ساعات و انتو وقتكم قصير استغلوه بالرحلات الشاملة احسن
فتوكلنا على الله و حجزنا الرحلة الحمراء
سعر الرحلة 100 ليرة للشخص شاملة الغداء و تذاكر الدخول
و قال الباص بياخذنا 9.45
سألناه وين ممكن نصرف فلوس أو نسحب كاش
قال من السنتر
قلنا له الصراف مو شغال
قال يمكن فيه 50 صراف بالسنتر و نقدر نستخدم أي واحد

ضحكت و قلت لزوجي الظاهر من التعب و الظلام ما شفنا شي ههههههههههه

و خلاص رجعنا غرفتنا بعد يوم متعب و نمنا على طول عشان ورانا يوم حافل بكرة


ألقاكم في جزء جديد ... الرحلة الحمراء في كبادوكيا

تسلمين ويعطيكي العافية على هادا التقرير اللي احلى والاروع من الرائع
هادي المعلومات اللي كنت بأدور عليها من اول عشان اخطط لرحلتنا ان شاء الله
وتقريبا تخطيطي زي تخطيطيك

بس عندي استفسار بسيط بخصوص الطيران الداخلي
هل سافرتوا لقيصري من مطار اتاتورك الدولي ولا من مطار صبيحة؟
ازا من مطار صبيحة، كم اخد منكم وقت من مطار اتاتورك لصبيحة وبكم كلفكم سعر التاكسي؟

وفي شي مستغربته منك!!!!!!
ليش ما استخدمتوا تطبيق اوبر او كريم بدل التكاسي؟
كتير من اهلي اللي سافروا تركيا بيمدحوا فيهم ووصونا نستخدمهم

ودا كله استفساراتي للآن