أدري تاخرت في باقي الرحلة لكن صادف عندي شغل وإجازة مدارس <-- مالها دخل
عذراً على الانقطاع ..



نستكمل من حيث توقفت .. الي هو اخر يوم في فلورنسا رتبنا اغراضنا الليل عشان نصحى بكير ونفطر وننطلق الى بيزا وبورتفينو

نفس المنوال الصباح نضبط القهوه عند الحجيه لكن هالمره ماطولت لن من نظرتها حسيتها ماودها قلت سوي واحد قهوه سريع سريع ..

وتقهويت مع ام حمودي
وقلنا يالله ننزل نفطر فطور سريع وقبل لا نطلع من الفندق قلنا للاستقبال جهزوا السيارة ترانا ماشين..
رجعنا حصلنا السياره عند الباب وانا كنت مسوي تشيك اوت قبل لا اطلع والشنط عندهم بس باقي حساب المواقف للسياره عطيته الاستقبال وما ياخذون الا كاش لانه موب تبع الفندق خذوا علي يومين ب 50 يورو

وقلنا قبل لا نطلع من هالديره لازم وداعيه خل نروح للمطل حقهم


بالسياره تقريبا ربع ساعة اظاهر او ثلث
وفيه مواقف بالساعة عند المطل وفيه كم كوشك يبيع تذكارات واطلاله على المدينة كاملة حلو موب شين
واشوف في خرائط قوقل انه في الصيف يزيدون عدد المواقف .. وفيه باصات اظاهر توصل لهالمطل
وفيه ايضا حديقتين يمين ويسار لكن مارحت لها لان اتوقع في الربيع او الصيف تكون حلوه ومزهره الورود
وفيه مطعم او مقاهي في مكان اعلى من المطل لكنه خلف المطل اشلون اوصف



ماطولنا لان ورانا خط فقلنا بسم الله توكلنا على الله .. وانطلقنا
الان الوجهه بيزا نتمشى فيها ساعتين الى ثلاث ساعات مبدئياً واحتمال تزود

والطريق كان حلو مع انه شتاء لكن كنا نمر بمزارع حلوه مرتبه ومرتفعات وجبال كان فيها خضار عكس طريقنا من كومو الى فينيسيا فيه خضار وشجر وتشوف الكنايس تصميمها كانها مساجد لها منارات واضحه بين البيوت
وحاولت اقراء عن كنايسهم فيه بعضها يقولون كانت مساجد وقلبوها وفيه ناس تقول لا هم تاثروا بالمسلمين ذيك الفتره وبالمسلمين في اسبانيا الزبده منظرها حلو وهي فوق الجبل وحولها بيوت صغار .. جاني شعور ودي ارجع بالزمن فتره واشوف كيف كانوا عايشين وقتها في عز وقت المسلمين والمسيحيين
في امريكا دخلت كم مره كنيسه وفي باريس ولندن شفت كنايسهم لكن طرازهم للبناء غير وماشدتني وعندهم كنائس نفس باقي اوربا بس الشاهد وانت تمشي في الخط وتشوفها من بعيد
وطراز البناء للبيوت تقريبا واحد قرميد <--- زي الطراز الاندلسي او المغربي الي فوق يكون فيه زي المظلة ديكور يا احمر ولا ازرق ولا اخضر هو زي البرتغال واظاهر اغلب اوربا نفس اللون اللون الاحمر الي يميل على البرتقالي

وقربنا من بيزا .. الصدمه
اشيك على اللوكيشن في الجوال وفي السياره كلهم يقولون عشر دقائق وتوصل للوجهه الي انا حاطها مواقف عند برج بيزا اشلون وش هالديره ؟؟ شكلي غلطان في اللوكيشن

عن سمعت بيزا وبيزا واسمها مرتبط بالبيتزا والبرج المائل واول ماتقول بيزا يجيك علم ايطاليا واذا مارحت بيزا كانك ما رحت ايطاليا .. الصوره الي في بالي عنها انها مدينه كبيره وفيها حياة عمائر وتاريخيه
طبعاً قريت عنها قبل وماحصلت شئ فيها الا الدومو والبرج المائل وفيه شارع تسوق ولوحة جداريه لفنان مشهور والعالم تقول نمرها ساعتين ونروح .. كنت اقول اشلون اكيد ما سلطوا عليها الاضواء ولا اشلون بيزا هذي

جاني شعور وانا امشي حسيتها احدى المحافظات عندنا في السعودية
وصلنا قال اللوكيشن باقي دقيقه على الوجهه الا اشوف زحمة ناس لكن ماشفت البرج ولا شئ بس زحمه
ودخلت المواقف ووقفت وانا منصدم بس على قولتهم الكتاب باين من عنوانه

المواقف يعطيك زي القرش بلاستيك تخليه معك وانت طالع تحاسب وقفنا والسياره فيها اغراضنا وقلت الله الحافظ كان الوقت العصر

وفيه مخرج واحد للمواقف على سكه صغيره غير مدخل السياره المشكله هالمخرج والسكة
متجمعين فيها افارقه اشكالهم ونظراتهم تثير الريبه
طلع متجمعين يبيعون شنط تقليد واتوقع وراهم مصايب بعد لكن الحمد لله فكنا الله منهم وانطلقنا للبرج المائل
تدخل بين اكشاك تذكارات كلهم تقريبا يبيعون نفس البضاعة
ثم تشوف سور كبير وبوابه تدخل تشوف الدومو والبرج سعنون


وهالساحات الخضراء محوطينها ممنوع تدخل ولا تجلس عليها بس تناظر والعالم كل واحد يتفنن في الصورة


ورحنا شوي نستكشف المنطقة الا اغلب الاماكن مقفله عشان الشتاء او عشان اجازة الكريسمس
صايره المدينه كئيبه تجيب الهم تحسفت اني مريتها .. ماطلونا فيها ساعة تقريبا ثم مشينا

وانا طالعين قلت وش رايك ناخذ لنا بطاطس ماك ننقنق عليه في الخط
دخلنا الا زحمه طبعاً لاحظة ان مطاعم الفاست فود قليله عندهم ماك وبرجركينق وخاصه برجركينج هو الي نشوفه في اغلب المدن لكن ماك الي كل ماسافرت ديره لازم اشوفه في كل زاويه عندهم نادر

الشاهد دخلت وطلبت بطاطس قالت تبي كاتشب قلت ايه قالت بمدري كم سنت الله يفقرهم
وانا انتظر الا اشوف فيه ورقه مكتوب اذا تبي تستخدم دورة المياه وانتو بكرامه
لازم تعطيهم فاتورة الطلب بس لزوار المطعم البلديه عندهم مستكثره تبني لهم دوراة عامه جنب البرج

انطلقنا وانا متحسرين على هالزياره الخائبه .. الي يبي يمرها يمرها مرور الكرام ماتستاهل نص يوم
الوجهه الان من بيزا الى ربالو وبرتفينو تقريبا ساعتين

طبعاً هنا الطريق بداء يتغير لاننا بدينا نرجع من الجنوب الى الشمال فكان الطريق عبارة عن جبال وشجر وانفاق وانهار او مجرى سيل وفي بعض الاماكن فيه بقايا ثلج وفيه قرى صغيره تشوفها على الجبال او بيوت تقول ذولا اشولون يوصلون هناك ولا اشلون سياراتهم تمشي .. المشكله ودي اتامل في الخط وفي نفس الوقت لازم انتبه للخط ...

ومن خلال الخط لاحظة شئ في سواقتهم فيه كلمه نسيت وشي لكنها بالايطالي وعند لوحه اذا قربوا عندها يهدون مع انهم يكونون مسرعين قبل يوصلون واول ما يتعدونها يسرعون .. فكان استنتاجي لها انها كاميرات او رادارات سرعة

وثم وصلنا بحفظ الله ورعايته لربيالو هي مدينه صغيره كنت بسكن فيها بس واطلع اتمشى في بورتفينو
الزبده نفس المشكله رجعت معي بخصوص اللوكيشن والجوال
المعزبه قلت لها الان الشوارع صغيره فانتي وجهيني

ونمشي فجاءه كان الوقت المتوقع 20 دقيقه فجاءه صار 50 دقيقه اشلون ؟؟
وكل شوي الوقت يزود واللوكيشن يقول ارجعوا ؟؟

قلت فيه شئ غلط ما اذكر ان الفندق كان فوق جبل اذكره قريب من البحر ومواقف القوارب اشلون
وقف وقف خل نشوف الخريطه زين

ثم قلت خل نرجع ونشوف وش يقول كل مانتعدى يزود الوقت خل نمشي مع الحرامي لباب الدار ونشوف ودخنا وجوعانين صراحة المود قفل
يوم رجعنا ونمشي معه خطوه بخطوه ومهدي السرعه الا طلع اني تعديت اللفه الي مفروض الف معها ويوم مسكت اللفه الثانيه طلعتني الجبل ... ويوم مشينا صح وثلنا للفندق على طول وراح وقتنا على الفاضي لوه نهار كان اهون نشوف مناظر

الفندق هذا قديم وعادي وكنت ماخذه عشان فيه مواقف عامة جنبه وبس عشان ننوم ونطلع
لو برجع مره ثانيه منيب ساكن فيه مع ان الموظفين الي فيه محترمين جداً ومتعاونين لابعد درجة ونفسيتهم عسل ومؤدبين

اول ما وقفت السياره قلت له عندي حجز وقال حياك الله نزل اغراضك وتعال كل امورك جاهزه
وسالته فيه مواقف هنا قال ايه وعادي وقف مجانيه قلت زين وتوني مشغل السياره الا اشوفه يركض ويقول لي حرمتي بتطلع الحين وقف مكانها مقابل الفندق وتجي حرمته تركض توخر سيارتها وزياده يوقف لي الشارع عشان اديور

وزياده على كذا يوم طلعنا الغرفه حصلتهم حاطين لي سرير طفل مع انه في الحجز كاتبين الطفل عليه رسوم زياده وغرفتك صغيره تقدر تسوي اب قريد اذا وصلت لغرفه اوسع ولكن ماعطيتهم الاوكي لاني غيرت رايي ماجبت ولدي معي برد ولا حاسبوني عليه ولا حتى سالوني عن ولدي بس تشكرت منهم وانا طالع وقلت لهم لانه برد ماجبته معي عشان مايقولون يستهبل ذا <--- مادروا عنك


هذي الاطلاله من الفندق

حطينا اغراضنا وقلنا بنروح ناكل لنا شئ ورحن لبورتفينو تقريبا 20 دقيقه الطريق مسارين رايح جاي يمينك جبل ويسارك سفح جبل وبحر المنظر روعة لكن للي يخافون مايصلح لهم
والمشكله لليل ويطيرون هالايطاليين بسياراتهم الصغيره فيه واحد قفلها معي لاصق فيني وانا مهدي زي الي يقول اسرع والله ويطلع المارد السعودي الي فيني واسوق سواقتي في الرياض
بس ابي اعلمه ترى اعرف اسرع واتهور بس موب وقته يا تعدني ولا امش زي الناس

وصلنا بورتفينو تقولون خاويه على عروشها كل شئ مقفل وهدوووء
في الخريطه كنت متخيلها اكبر من كذا طلعت ولا شئ وش اقولكم كبره جد جد صغيره مدري كيف تكون في الصيف اذا زحمه فيه كراجين مواقف بفلوس واحد كان مقفل يوم نجي وكلهم جنب بعض الي دخلناه ادوار مرتب لكن مدخله المواقف ضيق وصاير منعطف اتوقع اصحاب السيارت الكبيره او الي سواقته موش ولا بود بيتعب زي مواقف الابراج في مكه ولا البحرين مداخلها ضيقه

نزلنا نتمشى الا هدووء ووصلنا للمارينا وكل المطاعم مقفله الا اثنين يمكن ونقرب من واحد ويستقبلنا حياكم
انا توقعته بيقفل طلع يقول تونا بنفتح 7.30 السهره عشاء لكن تفضلوا اجلسو وتمقلوا في المنيو على ما نجهز طبعا مافيه الا مطعمين وانا جوعانين فما فيه خيار ادخل لو انه عادي

منيب متكلم عن طفاصيل الطلب لكن يوم طلبنا جاب لنا باديتين شوربه قال هذي من الشيف ترحيبيه
وكان تقديمه حلو

صراحه طعمها ما انساه الى اليوم غريب شوربه فيها لذعه حلوه المدام تقول نكهة القرقاص كان تعرفونه نبته بريه .. انا مدري اشون اوصفها لكنه تحس لسانك يتكهرب وانت تاكلها يحرك كل حواسك الوقيه

ورجعنا للفندق عشان ننوم نومه هنيه ونرجع للديره الصباح نشوفها وهي مصحصه ومنتعشه
وان شاء الله نستكمل لكم الرحه غدا او بعده ان شاء الله ونختمها بميلان ديرة الاناقه والموضه



شكراً لكم

آخر مواضيع ATL

- استفسار هولندا مع الأطفال؟؟ - لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023

توقيع : ATL

اللهم لا تجعل في قلوبنا غلاً للذين آمنوا