رِحلَة لَندَن - مَارِس 2023

Boarding Pass · 01-05-2023, 10:09 AM

5 مارس
WESTMINSTER CATHEDAL
BUCKINGHAM PALACE
TRAFALGAR SQUARE
CAMDEN MARKET

قمنا الصباح و قالت أختي فيه مقهى مختص ، عنده فقط قهوة كولمبية ، جلسنا ندوره و ندوره ، طلع موجود في دواعييييييييس ، يبعد حول 4 دقايق فقط ، بس يالله لقيناه بداعوس ، تحت الأنقاض !
قهوته كانت لذيييييذة و من أفضل القهاوي اللي ذقتهم في لندن فعلياً !

رحنا مرينا الكاتدرائية ، ملاصقة للفندق ..

و بعدها حركنا لقصر باكنغهام عشان نشوفه و نشوف عرض الحراس !

صورة له وحنّا راجعين من نفس الطريق ..

و بالروحة و بالرجعة نمر على حديقة غرين بارك ..

و بعدها حرّكنا على ميدان ترفلجار .

و بعدها الماركت .. شاورت أهلي تبون نمشي أو نأخذ سيارة لـ Camden market ، قالوا تونا قايمين ، و فينا طاقة ، خلينا نمشي و إذا تعبنا طلبنا أوبر ، كامدن ماركت يبعد ساعة و ثلث .. و صلنا لشارع warren ( ما أعرف إذا هو معروف باسم ثاني أو لا ! أو حتى أصلاً يعتبر معروف ) و وقفنا في مطعم برجر عشان أمي و أبوي يتغدون ، اسمه Honest Burgers ، فروعه كثيرة جداً .. يقولون البرجر عادية و ما يكروونها !

و حنا دخلنا الماركت تبع ماكس آند سبينسر نآخذ لنا تشوكليت ، و أخذنا من جهاز قهوة كوستا ، هوت تشوكليت بالكراميل ، حلوووووة في البرد .

وصلنا و كان شكل المكان جمييييل و الرسمات اللي على الجدران و المجسمات كانت تهبّل ، و لكن البضائع الموجودة مُش و لا بُد ! أغلبه هدايا تذكارية أو تقليد ماركات .. قلنا نتغدى أول و بعدها نكمل تمشّي ، الصدق خيارات الأكل كثيييييرة و كلّها تشوّق مرة و شكلها يَمي .. يروح له الواحد و هو جوعاااان ، الأكل اللي فيه أحلى و أكثر من بورو ماركت ..

هذا المحل ظريف للبنوتات ، تختارون لون شنطة أو كفر جوال ، و بعدها تختارون أشياء و مجسمات و خرز و ألوان و خرابيط كثيرة عشان يلزقها عليها ! مرة مرة مرة كيوووووت كهديّة ..

أخذت من فود ترك فيش آند تشيبس ، كانت لذيذاااااااة ، و أختي أخذت وافل من محل دعنون ، كان لذيذ ..

و لما جينا نرجع كان وقت الذروة ، و مافيه سيارات تقبل توصل ، و كانت الباصات زحمة موووووت و العالم مخلصين دواماتهم و يحترون الباص ، قلنا ما بدّهاش ! نرجع مشي أو نبعد شوي عن المنطقة و نطلب سيارة .. لعل الجو كان يجنن ، و وصلنا شارع warren مرة ثانية و بدينا نتسوق لأن الشارع و سيع صدر مرة ، و لقينا بريمارك ، قلنا نشيّك عليه مرة وحدة ..

و قلنا نرجع نكمل مشي و بدأت تمطر .. و رحنا مرة ثانية مرينا على الكاتدرائية عشان نشوفها في الليل !

وصلنا و نزّلنا أغراضنا في الفندق و طلبنا أوبر لأن عندنا حجز في مطعم Harry's Bar ، مطعم إيطالي ، الأكل كان لذيييييييييذ جداً ، بس كنا متحمسين للحلى تبعهم اللي على شكل الماشروم ، و كل الطاولات المحيطة طالبنها ، بس طلعت عادية جداً ، و التيراميسو لذييييذ ..

ترافل باستا تجي بصحن تقديم ( قِدر ) و بعدها يحركونها و يقدمونها لكم بصحن ثاني !

فيه كثيير فروع له ، و مختلفات بس مدري وش الفرق صراحة ! أتوقع المنيو فيه أطباق موجودة بفرع و فرع ثاني لا !

6 مارس
Oxford Street
Bond street
Selfridge
Carnaby Street
Regent Street
Piccadilly Circus
M&M'S WORLD STORE
Leicester Square
China town

قمنا الصباح مرة مرة بدري ، و العالم مسكرة إلا مقهى كنا مخططين عليه من أمس و يفتح بدري ، قهوته بالدماغ ، قريب كذلك مننا .. اسمه Notes coffee roasters مقهى و محمصة ، صدق كانت قهوته لذيذة و طلبوا أهلي معه أشياء أخرى ، يقولون لذيذة بس شكلها ما يشهّي الحمدلله ! .. الوالد تعب عقب البرد حق اليوم اللي قبل ، و قال بيرجع الفندق و بيريّح و يطلع يتمشى إذا يقدر ! قلنا أجل نستعمل بطاقات الباص السياحي اللي معنا ، و نكمل تمشّي في الأماكن المفتوحة اللي ممكن تتعبه عشان ما نروح لها معه و يتعب .. و بما إننا قايمين بدري مرة ، قلنا نتمشى في الميادين و الشوارع المعروفة ، و قبل تزدحم ، و أفضل شيء إنهم على خط واحد تقريباً !

تمشينا و تفرجنا و كلن أخذ اللي يبيه ، الفُرجة و التمشي لحالها في الشوارع وساعة صدر مو طبيعية ..

دخلنا السيلفريدج و كانت الأجواء اللي عند الباب مزعجة نوعاً ما ! أغاني عربية و رقص و تجمعات ، و هومليس كثير ، و يغصبونك تركب العربات و تشتري ورد ، كان الوضع مزعج ! دخلنا بسرعة و طلعنا و حرّكنا لـمحل m&m's ، و جلسنا فيه وقت طويل مررررة عشان أختي الصغيرة تحب شخصياتهم مرّة .

طلعنا بعدها للساحة المقابلة .. عشان تمثال هاري بوتر موجود هناك ! و لقينا تمثال لمستر بن وَ وليام شكسبير .. الصدق ماكنت أعرف إن مستر بن وَ شكسبير موجودين ، لأن المهم بالنسبة لي و أختي هاري بوتر ، بس أمي تحسبني جايبتها خص نص لتمثال شكسبير ! و مشيتها إني قاصدة !

حي هالعين !

و محل ليقو كبييييييييير ، و الطابور عليه أكثر من إم آند إمز !

و حنا ندور بالدهاليز اللي حول m&m's لقيت الحي الصيني ، كله أكل صيني و شرق آسيوي بشكل عام ، و حتى مزينينه بزينة صينية .. ما أعرف هل اسمه فعلاً فقط الحي الصيني مثل ما بلغني أحد الموظفين أو له اسم ثاني ! يكاد يكون أزحم مكان حول هالمنطقة ! و أكيد خواتي قرروا يآكلون منه !

تأخر الوقت و قررنا نرجع للفندق ، ننزل الأغراض ، و بعدها تعشينا من wagamama اللي حول الفندق ..

7 مارس
The O2 Arena

كنت مبلغة أهلي قبل بليلة يقومون بدري عشان اللي يبي يتقهوى و اللي يبي يفطر لأننا بنروح لـ The O2 Arena ( قبّة الألفية ) .. رحنا لمخبز Gail's Bakery ، حبيت مخبوزاته و الساندوتش كذلك ، رجعنا له كثير ، فروعه بعد كثيرة .. تقهوينا و عيّنا من الله خير ، و طلبنا آوبر من هناك .

كنت حاجزة تذاكر لخواتي لـتسلق القبّة (UP AT THE 02 ) و أنا في الرياض ، و سعر التذكرة 160 ريال للشخص ، و تقدر تختار الوقت اللي يناسبك ، و طبعاً وقت الغروب يعتبر أغلى وقت ، التصوير مسموح ، بس خواتي ما صوروا المكان لحاله ، داخلين في كل الصور و الفيديو راح أحط صور من موقعهم حتى تشوفون المكان اللي يتسلقونه ( 3 صور ) ..

المكان يبعد عن الفندق بالسيارة حول ساعة ، و موجودة في شبه جزيرة غرينتش في جنوب شرق لندن . عبارة عن مجمع تجاري ترفيهي ، و يعتبر آوت لت كذلك ، بس الماركات اللي فيه بسيطة و أغلبها رياضية ، تيد بيكر و أديداس و كذا ، فيه سينما ، و الظاهر الظاهر لمحت فيه ملاهي أو بولينغ .. كذلك المسرح تبعه من أشهر المسارح اللي بلندن .

خواتي يقولون التجربة حلوة جداً جداً جداً ، و مختلفة !

و كذلك بالنسبة لي كنت أبغى أجرب مطعم الشيف رامزي حق البرجر و فيه فروع كثيرة له كذلك ، اسمه Gordon ramsay street burger ، و كان موجود في المجمع و تقدر تآخذه عرض مع تذكرة التسلق و تقدر تختار مطعم ثاني ! أنا و أمي تغدينا فيه ، و أبوي كان مع خواتي ، و بعد ما خلصوا هم تغدوا في Wagamama .

تمشينا في المكان وحللناه بما إنه بعيييد ، و دخلوا أهلي فيلم ، و أنا جلست أسوي شغلي اللي طالبينه الدوام ، عشان كذا ماكان عندي وقت أدخل معهم و دخل أبوي مكاني .. خلصنا و طلبنا آوبر ، و رجعنا للفندق ..

بعد ما ريّحنا طلبوا خواتي أوديهم لمحل يسوي بوبا ، تقييمه عالي في فورسكوير ، كُشك كشخة ، اسمه Hefaure ، يبعد عننا تقريباً 5 دقايق ، و بجنبه محل القهوة Notes coffee roasters .. يقولون البوبا لذيذة مرة مرة ، و الكشك اللي بجنبه بعد يعتبر من محلات الدونات الأعلى تقييم ، اسمه crosstown ، جربناه أحد المرات ، فعلاً كان لذيذ ..

المجمع اللي فيه هالمطاعم و المقاهي يجنن و ونيس مرة ، و حتى داير مداره مليان محلات و مطاعم و مقاهي و فاااضي ، حتى اللي أفطرنا فيه أول يوم بنفس المجمع و كان أحلى فرع جربناه ، المكان إذا أنا أفهم اسمه the nova building أو nova development Victoria ، الزبدة إنه عند الفندق .. المهم تمشينا و مرينا ماكدونالدز و أخذنا عشاء لأهلي ، و تعشينا و نمنا .

Abu Muataz, um Muataz, عبدالرحمن الصلال و 6 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رِحلَة كُوريَا الجَنوبيَّة - ( سِيئُول + جيجُو ) - يُوليُو 2022	Boarding Pass	بوابة كوريا الجنوبية	66	10-03-2024 12:46 AM
جولاي 2023	Reham2013	بوابة سويسرا	7	18-05-2023 06:02 PM
اوربا في صيف 2023	Rema	بوابة سويسرا	3	23-01-2023 01:41 PM
رحلة الى أوروبا 2023	Noorbash	بوابة الدول الاخرى	4	16-08-2022 10:42 AM