اما الصور استخدم مركز تحميل الصور الخاص بالعرب المسافرون

وانسخ رابط المنتديات


ان شاء الله يفيدونك الشباب ومتابعين التقرير

واصل ، شكرا لك

حلو المخلص
بس الاحداث معاكم عجيبة حق رحلة الاسترخاء والروقان
شنو الفندق في ويندرمير اللي سكنته

هذا الموضوع يفيدك للصور

https://www.arabtrvl.com/vb/t50538.html

أهل فيكم مره ثانية
بجرب طريقة تحميل الصور وإن شاء الله تضبط
شكرا لكم

---

نكم ملخصنا للرحلة يوم وصلنا لندن

وصولنا كان تقريبا على الساعة 4 العصر والخطة بأخذ أوبر يوصلني للسكن مع الشنط
والسكن هالمره كان عن طريق ار ان بي الأسعار وقتها كانت هبال لكن بحثت في منطقة قد سكنت فيها قبل يمكن 10 سنوات وكانت مريحة بالنسبة لي قريبة من موقف باص وميترو والهايد بارك

المهم نرجع للمحطة وطبعاً يوم وصل الباص الكل هجوم طالع وأنا أسحب في هالشنط بس هالمرة قلت لايصير لي زي ما صار في وندر مير خل أحجز قبل أطلع .. وياليتني ما سويتها

النت مدري التطبيق المهم واحد منهم مقلبني حطيت في التطبيق احتاج سيارة كبيرة من محطة القطار إلى السكن ومبسوط يقول السواق قريب دقيقتين يعني لازم اطلع له بسرعة

المشكلة كنت متوجه لنفس المكان الي نزلني منه أوبر يوم أروح لوندر مير مواقف التكاسي وانتظر وينك فيه واناظر مالقيته ويكلمني يقول تعرف الفندق الفلاني وهالفندق أنا سبق وبحثت عنه قبل قريب من المحطه لكنه من الجهه الثانية شوي قلت له شكلي في المكان الغلط شوي إلا يلغي الرحلة لأني تأخرت عليه

وطبعا كبريائي صعب تقول انك أنت الغلطان قدام المعزبة
واطلب ثاني واحاول اركز ويني فيه لكن المصيبة وقتها مدري وش جاني مستعجل ولا عرفت احدد مكاني بالضبط

فاقترحت المعزبة ليه مانمشي شوي نبعد عن الزحمة والعالم وتطلبه
قلت حلو ونمشي ونسحب الشنط المشكلة على حظنا كان وقت طلعت الموظفين وكلهم متوجهين للمحطة فمشينا مسافة على ماتعدينا هالمعترك

المهم يوم وصلنا مكان هادي طلبت سيارة وقبل يوصل قلت له ترى معي شنط كبار قبل يوصل بدقيقتين ثم قال سيارتي صغيرة مايمديني هنا قلت لازم تحسم الموضوع مصخت
فالغوا علي الحين رحلتين ودفعوني رسوم الالغاء

واروح واطلب سيارة ل6 مدري 8 ركاب عشان محد يتعذر
والله ويجينا واحد أصوله افريقية مسلم - على الطاري أغلب الي جوني في أوبر في لندن مسلمين- تتوقعون هم الأغلبية ولا سياسة الشركة تربط المسلمين ببعض..هالشئ مناسبني لكن شدني بما إني في لندن

المهم ماعلينا جانا الشقردي بسيارة فان صغير شكيت انه يكفينا ألا والله يسفط المرتبتين الي ورى ويحط العفش ونتوكل على الله وينزلنا عند باب السكن

نرجع للسكن شوي يومين من معلومات المؤجر قال برسل لك بيانات الدخول ووصف البيت ومدري وشو قبل وصولك بيوم .. قلت له ذيبان أبيها قبلها بيومين وإذا قبل احسن عشان أعرف أرتب أموري ولا يصير لي مقلب وقتها قالي خير بس ذكرني قبلها .. وأرسل لي البيانات وكيف أدخل وأن فيه رقم سري للمدخل الرئيسي الكتروني وعلمني كيف اتعامل معه وفيه قفل يدوي لمفتاح الشقة عند باب الشقة وقالي ترى اذا تبي تطول ترى فيه رسوم إضافية علمني من الحين حاولت فيه يمين يسار يعطيني ساعتين ساعة رفض قال برسوم قلت في نفسي الشرهة موب عليك على الي حاجز عندك

المشكلة صور الفندق كنت حافظها عندي كنت بنزلها في تطبيق الحجز لكن ماقبل فحذفتها
على كل حال نرجع للموجز

وصلنا للسكن النظره الأولى كانت مريحة للموقع والمدخل شارع هادي سكني فيه بقاله قريبة
جينا للقفل الإلكتروني اول مرحلة وكنت مشغل فديو الشرح عشان ما اغلط ناقصين تأخير وافلام

واله ويفتح من أول محاولة
طبعا المعزبة ماعندها فكرة عن السكن متكله علي انا عطيتها معلومة قبل لكن الواقع صدمني
المهم دخلنا المدخل حلو فيه شقه على يمينك وشقه في المقدمة وجنبها درج طويل

هنا حطيت الشنط جنب بعض وخذت لي نفس عميق وعطيتكم ذيك الابتسامة
أنا أدري أن السكن في الدور الثالث مدري الرابع وهذا أول درج يقابلني معناتها بطلع زي هالدرج أربع مرات ومعي كل هالعفش الي يكسر الظهر ....!!!!

بس ترى في تعليقات الناس على السكن جابوا طاري انتبه من الدرج وانه بيكسر ظهرك بس حسيت يبالغون شوي لكن يو جاء الواقع هههههههههه الصراحة اتخيل شكلي وقتها وانا اطلع دور دور وأقول في نفسي متى نوصل بس باب الشقة

بس الصدمة أو المصيبة الكبرى كانت في آخر مرحلة .. يوم وصلنا الدور الثالث إلا احصلهم مسوين درج جديد مرتجل يطلعك على دور رابع وضيييق وزاوية نزولة حاده وزياده مخلينه فرش ولا فيه كسره فوق يعني تلف
فواضح أن الي مسويه متقصد يخلي الناس تطيح فيه

الهم وصلت اخر دور قلت خل افتح الشقة هم يريحون وانا اجلس احمل الأغراض على مراحل راقي نازل
والحمد لله مرة بسلام بس الصدق هلكت ما تسوى علي وقتها قلت ليتني زايد ميزانية السكن شوي ولا هالمرمطة مع أنه في نفس العمارة فيه شقق ثانية واضح أنه يأجرها وبتكون حلوة لكن وقتها ماكان فيه الا الي في الدور الرابع أو القبو

طبعا السكن عباره عن استديو غرفه فيها سرير واحد وتلفزيون صغير ودولاب وجدار واحد مخلينه للمطبخ ثلاجه صغيرة وفرن وغسالة ملابس ومجلى

وفيه دورة مياة وانتو بكرامه حجمها مناسب بدون شطاف طبعا والشاور فيه سخان فوري (قروشة)
بشكل عام السكن مرتب بالمقارنة مع الفنادق الي بنفس السعر ... الفنادق كل ما دخلت عليها احصلها قديمه ومندقه مهتريه... ولا فيها غسالة ملابس الي هي أحسها من الضرورويات أذا معك أطفال وأيضا الفرن

السرير كان حجمه مناسب لكني كنت جايب معي سرير نفخ هواء إحتياط ولعلي ما استفدت منه الأطفال كل الأيام نايمين معي في السرير

ماعلينا،، هالمره على طول خلصنا شغلنا لا يروح اليوم علينا وكنا جوعانين نبي أكل صاحي عقب وندرمير
طبعاً السكن أقرب منطقة له اكسفورد بالمترو 6 د أو 5 مجمل وقت الوصول مع المشي تقريبا عشر الى ربع ساعة

يعني خمس دقايق مشي إلى المحطة أو موقف الباص والمترو
المهم نزلنا وقلنا بنروح بالباص أوناس من تحت الأرض وقوقل ماب شغال وأنا في بالي أعرف وين أكسفورد اتجاهه ونوقف عند المحطة لكن المشكلة الباص ماجاء وطول ؟؟ والأجواء برد برد كنا حاطين في بالنا يوم نجي أن الأجواء ربيعيه

يعني قبل الرحلة بشهر كانت مواقع الطقس تقول الأجواء بين 25 إلى 22 العظمى والصغرى 18 الى 10
وكل مايقرب وقت الرحلة كان الطقس يتغير ويميل للبرودة !! بس إذا قريت في النت أن هالفترة الطقس خلاص يبداء يعتدل

فكانت الأجواء باردة وطول الوقت مشتين مع أن فيه ناس كثير نص كم وشورتات فكان الوضع غريب نصهم مشتين ونصهم فالينها

المهم نرجع للباص وبعد انتظارنا اكتشفت إني موقف عند محطة غلط ونمشي شوي ونوصل للمحطة والقاهم حاطين عليها لوحة تراها خارج الخدمة بس الزين أن محطة المترو جنبها وننزل على طول خلاص مافينا حيل دايخين وبرد وجوعانين ...
والحمد لله المطعم الي بنروح له كان قريب من محطة المترو في بداية الاكسفورد اسمه (ASK Italian) كان أكلهم حلو الصراحة ايطالي لا يجي أحد الحين يصدمني ويقولي خنزير
والحمد لله بعد ما عبينا خلاص انتهى يومنا باقي لنا نمر السوبر ماركت ناخذ لنا مؤنه وخذنا لنا قارورتين موية وخفايف الفرولة والتوت رخيص عندهم وحليب طبعاً بعد ماضفينا وش اول شيء بيجي في بالك .. الطريق للسكن والدرج

بس وش نسوي قضي الأمر نتحمل (رحلة استجمام وروقان)
بس الحمد لله مر اليوم على سلام وكانت ليلة نمنا فيها بعد التعب نومه حلوه
طبعاً لأن الرحلة هي استجمام وروقان وسبق وأننا جينا للندن فكانت الخطة مافيه جدول صارم فمتى مانقوم نقوم المهم يوم صحصحنا عقب التعب وتجهيز الأطفال الي ياخذ نص اليوم على ما ينططون ويحوسون والبس ولا تلبس طلعنا نفطر .. وين هنا يجي موضوع الحيرة وين نروح هذا ولا هذا والي جنب هذا عشان ما يضيع علينا الوقت

فوقع الخيار على هالمطعم (Fait Maison Mayfair) ليه ؟؟ لأن عنده أكل عربي مرتب شوي ويمدحونه وكله من ربعنا رحنا له هالمره بالباص عشان نشوف النيا بس هالمره صحصحت ونزلنا عند اكسفورد عشان نتمشى فيه على ما نوصل للمطعم وطلع المطعم في سكة من سكك اكسفور ما اذكر اني قد شفتها فكانت بداية رايقة

المهم لندن كل أيامنا كذا ماندري وين نروح العلامات في قوقل ماب فل من كل جهه مطعم ولا مقهى ولا محل
وأذكر أكثر منطقة مرينا عليها هي سوهو وفيها كثافة العالم وأصلا لندن زحمه وأقول في نفسي تو الخليجين ماجوها كيف بتكون إذا جو بعد !! يعني كم مطعم نروح له يقول انتظار لكن بسيط قدامك اثنين أو ثلاثة لكن الي سمعته أن فيه طوابير انتظار في المواسم

وطبعا زي ماقلت لكم أنا ملاحظ فيه كثافة سياح بس ما كنت أدري ليه لكن طلع اظاهر فيه مناسبة ونسيت الصراجة اسال عنها لأنهم كانوا حاطين ورود في كل زاوية في أحد الأحياء الي خلف هارودز والعالم تمشي وتصور



ووقتها مدري وين كنا رايحين بس الصدفها ودتنا لهالتجمع وكنت راكب مع ولدي فوق في الباص وأتفرج عالمناظر ومن قوة الزحمة الباص موقف ما يمشي



بالمناسبة هالمنطقة حلوة للسكن كل شئ فيها جديد


طبعاً راح وقتنا زي ماقلت قبل في التنقل بين الأماكن وأكثر شارعينرمرينا منها أكسفورد وريجن
نصيحة إذا بتسكن اسكن حول ريجن ولا الي تحت هارودز الي حطيتها في الصورة

شارع ريجن وسيع وكله محلات ويوصلك إلى اكسفورد



آخر يوم لنا في الرحلة او قبلها بيوم كنت احاول في راعي الشقة يمدد لنا شوي قلت له معي عفش ورحلتي العصر قال ما أقدر لكن أقدر أفيدك وأعطيك موقع يأجرون أماكن فيها تحفظ شطنك ويحابسبونك بالشنطة يحفظونها عندهم بس لاني بجلس ساعتين بس فكان السعر مايحمس وغير كذا مابي ارجع يومها أبي أمر محل ثم المطار لكن للمهتم يقدر يبحث بيحصل وحتى البقالات الصغيرة تلقاهم حاطين لوحات لهالخدمة

آخر يوم بعد معانات ترتيب السكن وتنزيل العفش طلبنا أوبر عشان يوصلنا لكوفي نفطر فيه ثم نروح للمطار طبعاً رحنا بدري لأن العالم مخوفيني من مطار هيثرو والزحمة وفيه مشي كثير
فكان يوم ماطر أنشقت علينا السماء وأبتلشنا بالعفش الي معنا حاطينها في الشارع قدام المقهى بس استمتعنا باللحظة وبعدها طلبنا أوبر إلى المطار والي كان فاضي وسلسل وزحمة طبيعيه جدا تقدر تقول خفيفة وكان باقي لنا ساعتين على الرحلة فرحنا للاونج ألا العالم سرى هناك كل العالم معهم بطاقات فيزا

والحمد لله انتهت رحلتنا بسلام ورجعنا أرض الوطن وكانت رحلة (روقان واستجمام مع الأطفال ما نعيدها)

خلاصة الرحلة
وقت السفر كان نهايت مايو وكأني قد قريت معلومة أنه انتبه من موسم اللقاحات الشجر والصراحة أتعبنا شوي كل العالم تعاطس وتكح خاصة يوم رحنا للهايد بارك فيه أشياء في الجو تطير صغيرة موب حشرات لكن تخليك تعاطس ولا تشرق لازم كمامة ويدخل في العيون يخليك تجلس تفرك تحرق

لندن المقاهي والمطاعم فيها كثيرة حدد أنت وش تبي من الرحلة تزور معالم وحدايق ولا تبي مقاهي ومطاعم صعب تجمع بينهم لأن الخيارات كثيرة بس في النهاية الذائقة عندنا صارت عالية فلا تنصدم من مستوى الاكل أو الخدمة والنظافة مشي
حط في بالك أن عندهم تقاليد ماشين عليها
مثال واحد من المطاعم الفارهه يقولك الفطور ينتهي عند الساعة 11 ونص وصلت عندهم الساعة 11 و 25 د
قلت تقدمون فطور قال أيه بس لازم تطلب الحين قلت يالله عطنا فرنش توست راح للشيف ورجع قال لاخلاص قفلنا تبي شئ ثاني بنقدمه -يستهبل-
نفس الشي رحنا لمقهى ثاني غويلي كان فيه جلسات خارجية لها مدخل واحد ومن الجهه المقابله فيه زي الحاجز ديكور مفتوح بدال ما تاخذ لفه دخلنا معه قال لنا ممنوع تدخلون من هنا الدخول من هناك قلت طيب دخلنا قال لا لازم من هناك عشان أقدر أخدمكم قلت له زين
وأمشي وأجلس عند المدخل وأقوله لو سمحت أبي طاولة
قال تفضل هالطاولة - يستهبل- صدق المسافة بين المدخل الي كنا فيه والي يبينا ندخل معه تقريبا خمس خطوات!!

نفس الشئ مطعم ثاني كان صغير ولا أقدر أدخل عربية الطفل فيه قلت طيب بطلب ثم أسفط العربية قال لا لازم تجلس في الطاولة ثم نجي ناخذ منك الطلب
قلت زين جلست على الطاولة وعيالي ينتظرون برى جاني قال وش تطلب قلت له كذا وكذا قال اوك شكرا وقمت ورجعت دخلت عيالي وسفطت العفش عبط الموضوع؟؟ أنا أبي اختصر الوقت

الأسعار ما ادري عن باقي الخليج لكن بالنسبة للسعودية مافيه فرق يسوى أنك تقول بتقضى من لندن وحتى البضاعة مافيه اختلاف كبير يمكن تحصل تلقيطات ويمكن تحصل عطور إذا أنت مهتم

الفنادق والسكن فيه فنادق توب خمس نجوم حلوه ومرتبه لكن أسعارها صفقة
وفيه فنادق قديمه وتعبانه لكن أماكنها حلوه تكون أسعارها عاليه

ار ان بي فيه خيارات كثيرة للشقق وأشوفها منافس قوي للفنادق خاصة في المساحة أغلب فنادق لندن صغيرة وقديمة مندقة من كثر الزوار
وحط في بالك غالبا التقييمات معتمدين على الإقتصادية وقربها من الأماكن الحيوية فلو بعدت شوي بيكون السكن أرتب أو المنطقة لأن في النهاية ماتستاهل هالقيمة

الناس تحب تسكن عند منطقة اولف قاردن - سوهو
التنقل في لندن فيه أكثر من خيار وسهل إذا معك نت أنا أفضل الباص لأنه يعتبر تمشية
تاكسي لندن في أي لحظة تقدر تأشر له ويوقف لك في هالسفرة ما جربته

شكراً جزيلاً لمتابعتكم وإن شاء الله الرحلات القادمة تكون مرتبه ويكون التقرير مرتب موب زي ذي

آخر مواضيع ATL

- لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023 - اشتراطات الدخول لالمانيا

توقيع : ATL

اللهم لا تجعل في قلوبنا غلاً للذين آمنوا

هههههه يا أخي الله يسعدك على هالدراما الحلوة .اسلوب شيّق فعلاً (رحلة روقان).على أجر إنشاءالله .ليتك مددت كم يوم..

الله يجزاك خير أسعدني مرورك والجد ترى فيه أكشن ماقلته عشان أختصر ومايحتاج انشره

------------
وابشركم لقيت صور الشقة والدرج


هذا درج الأدوار الأولى


وهذا درج آخر دور الي هد حيلنا




هذي الشقة تصوير يوم جينا نطلع عشان لو قال المالك فيه شئ خربان أحط الصور في عينه


وهذا هو القفل الي حاطين فيه مفتاح الغرفة

آخر مواضيع ATL

- لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023 - اشتراطات الدخول لالمانيا

توقيع : ATL

اللهم لا تجعل في قلوبنا غلاً للذين آمنوا

تسلم على هالتقرير المفيد
بس تحتاج مستقبلا ترتيب أكثر
عشان توصل المعلومة أسهل للقارئ

أحس أني دخت بعد القراءة
وأخذت لي حبة بنادول


منطقة ريجن جميلة بس غالية
ولا فيها خيارات كثيرة على خبري

لندن هي لندن
مهما غبنا عنها تبقى سيدة المدن

شكراً

اهم شيء يذكر الاسعار ههههههههههههه
تقريرك شيّق جداً

يارجال الرحلة كلها من الأساس ملخبطة من بدايتها لنهايتها بس الحمد لله لو ما حصل منها ألا أننا غيرنا جو
إن شاء الله التقرير القادم تكون رحلة روقان ويجي التقرير متكتك..

آخر مواضيع ATL

- لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023 - اشتراطات الدخول لالمانيا

توقيع : ATL

اللهم لا تجعل في قلوبنا غلاً للذين آمنوا