بسم الله الرحمن الرحيم

بالبداية احب اشكر هذا المنتدى اللي شفت فيه قوقل معلومات تبارك الرحمن من الجميع وطوفولي اي شي من ناحية التصوير او صياغة الكلام الا اني بحاول قد ما اقدر استعرض الرحلة

من زمان وانا ناوي السفر لكن حكم تغيير دوامي صار لازم يعدي 9 اشهر واكثر عشان تاخذ اجازة

وصارت الفرصة ان شهر 11 ميلادي ( نوفمبر ) هو شهر اجازتي السنوية

وكان الاختيار على ( ماليزيا )

وطبعا احب اقولكم اني ما احب دول شرق اسيا لأن الجو حار .. عاشق اسطنبول من الاخر

واحب اروحلها شتويه بس يعني انسوا اتاقلم مع الرطوبة ( الرطوبة بالخليج مو مقصرة فينا )

لكن اللي معاي ولد عمتي ( مصعب ) قال انا رحت تركيا وانت رحت خلنا نغير ونبعد نروح ماليزيا

وتم الاختيار والتخطيط قبل السفرة بأسبوع فقط يعني سفرة سريعة وبتكون اقتصادية بإذن الله وتم التخطيط على التوجه الى ( لنكاوي 4 ايام 3 ليالي .. بينانغ 5 ايام 4 ليالي ،. كوالالمبور الايام الباقي بحيث تكون الرجعة للكويت لتاريخ 11/18 والوصول بالضبط تاريخ 19 الفجر )

هاذي بداية الرحلة / اوافيكم بالصور حالا .. مع التفاصيل ليوم سميته ( يوم المطارات )



أرسلت بواسطة iPhone بإستخدام Tapatalk

بداية الرحلة كانت على طيران الامارات fly emirates
سعر التذكرة 167 دينار للشخص ( سياحية ) لمدة 12 يوم واليوم ال13 نكون بالكويت
تاريخ 6 نوفمبر توجهنا لمطار الكويت الساعة 11 ونص الظهر






وطبعا حطينا الجناط بالأول عن الزحمة
ولازم نتحرش بسناب على اهل السامسونغ ( بحكم اني موظف شركة اتصالات فضايفيني موظفين معاي بالدوام عشاق للسامسونغ ولازم اتحرش فيهم



فعلاً شي مو هين انك تمنع تلفون جديد من الطيارة خوفاً ع الطيارة

وهم طبعا لازم اي احد يزور مطار الكويت يمر مطعم الباستا الشهير هناك



بعد التچييك صلينا وتمشينا بالسوق الحرة

وعقبها رحنا للطيارة

موعد الرحلة 2:15 الظهر توقيت الكويت متجهين الى دبي دار الحي





ولازم صديق الرحلة ( فلم للتقزيرة = للتسلية )



وصلنا الامارات بحمد الله وكانت الساعه 5 بتوقيت الامارات يعني 4 توقيت الكويت
وتمينا منتظرين مع جولات بسوق الحرة ومطارهم ( اللي حرام تسميه مطار ومطار الكويت هم تسميه مطار )

كانت الرحلة الساعة 9 و 40 دقيقة بالليل



وكانت مدة الرحلة 7 ساعات ونص

حاولت انام ماقدرت لان الكراسي ما تساعد ع النوم ابدا





هم لازم تسلية بعد 7 ساعات ونص

طارق العلي كان صديق الرحلة



وصلنا كوالالمبور الساعة 9 الا ربع بتوقيتهم يعني 4 الا ربع الفجر بتوقيت اهلنا بالكويت

مطار كوالالمبور كان مو زحمة بس مع هذا اشوفه كذلك افضل من مطار الكويت وكبير ماشالله فيه مترو بين البوابات مثل مطار دبي


اخذنا خط قبل التچييك والدخول
خط ماكسيس ( 10 غيغا تقريبا ب50 رينجت .. ال10 رينجت تقريبا 710 فلس كويتي )
وتقدر تضيف 10 رينجت للمكالمات
وضفناها


للامانة وصلت لبوابة الدخول .. كان فيه كونترين فقط شغالين وزحمة غير طبيعية .. دبل اللي بالصور بس الاجراءات كانت سريعة واستلام الجنط ( الحقائب ) بدون تأخير يعني تقريبا 20 دقيقة مع استلام الجنط



وطلعنا نشم هوا شوي ونرجع لاكمال الحجز الى لنكاوي ( حاجزين الفنادق بلنكاوي وبينانغ من قبل الوصول فمانقدر نغير بالجدول وهذا الافضل ان نلتزم بالجدول


حجزنا الساعة 10 على طيران والعياذ بالله منه اسمه ماليندو
تذكرتين بعد ساعتين 12و 20 دقيقة
تذكرتين ب410 رينجت وكان هو الارخص بين الطيرانات
صج طيران مش حالك
بس يمشي الحال
وكان في تاخير بالرحلة واحنا مو ناقصين لان بنكمل 24 ساعه بدون نوم وعلى قولة صديق الرحلة .. طيرانهم وكيفهم بعد

مده الرحلة كانت ساعة بين كوالا ولنكاوي




وهذا مطار لنكاوي اللي اشوفه زووين كونه مطار داخلي بس صغير

وعجبني هالاعلان عندهم لكن غير صحيح التكاسي برا ارخص


وعجبني ان العربي مهم عندهم بالمطارات

واول مافتحت البوابة هلوا علينا جميع التكاسي
في واحد اخذناه قال 5 رينجت للفندق مسافة الفندق 7 دقايق او 8
عن المطار
يتكلم عربي بطلاقه وسيارته خاصه وجدا رائع اخذنا رقمه
لتكمله الرحلات غدا
هذا محمد


وصلنا فندقنا واحنا مانبي اي شي بس نبي الفراش طبقنا 24 ساعة بدون نوم
وهذا الفندق
مع اطلالة الغرفة





الفندق مقبول نوعا ما
4 ايام
3 ليالي
ب228 رينجت
وانا ما اهتم للفندق كثير لان شباب وبنكون برا الفندق غالب الوقت
لكن للامانه طاقم الستقبال متعاون جداً واي شي نطلبه يتوفر

نمنا للساعة 9 ونص ( قبل 3 ساعات يعني لان الحين 12 ونص بتوقيت لنكاوي )
ورحنا تعشينا بمطعم السلطان
طبعا اتصلنا على محمد وودانا مطعم عربي اسمه السلطان فيه عمال مصريين فيه


المطعم جنب التلفريك
ولا تسالوني عن الحساب لان الجوع كافر اللي معاي دفع
ورجعنا الفندق

والحين بننام عشان نكمل الصبح بنشاط اكثر لان تقريبا يومنا راح واحترق بالمطارات

ملاحظات ؛ مطار دبي لا يعلى عليه

* عجبني بمطار كوالا ان كان فيه زحمة قوية
ومع هذا كان فيه طفل مع عائلة سعودية تعبان ويصرخ ويبجي ( يبكي ) وخذوا العائلة ومشوها قبل الكل

* مطار لنكاوي دخول الطيارة للعوائل والاطفال اول والمضيفات الله لا يوريكم .. نفسية سيئة
* الجو رطب واللي بالكويت ينزلون سناب وتغريدات ان انت من رحت من الكويت ، المطر هل علينا .. واضح الموضوع ضدي [emoji174] واني كنت نحس ( اللهم صبا نافعا )
*
تصبحون على خير ليوم جديد / وسامحوني ع الاطالة واذا في اي سؤال حاضر



أرسلت بواسطة iPhone بإستخدام Tapatalk

ياهلا و مرحبا فهد

أعجبتني صورة البرج لقطة جميلة
مطار دبي و كوالالمبور مانختلف عليها تعامل راقي

الطيران الماليزي عموماً اختلف كثير في السنين الاخيرة
و فقد الكثير من العملاء

بداية قوية و جميلة
كثير يحتاج مثل هذي الرحلات الاقتصادية

متابعين

حمدلله علي السلامه

الله يعيين علي الرحلات الترانزيت

كان ريحتم في لنكاوي أو أنت من قاعدة خل التعب مره وحده

الحمدلله على سلامة الوصول
السامسونغ صح حتى فلاي ناس قالو نفس التحذير
حتى بوحسين قال لي تلفونج 7 قلت له بس انا ايفون وهم يبون سامسونغ

مطار دبي كبير وحلو واسواق بس اهتمام مافي للمسافرين وخاصه لما يغيرون البوابابات
واذا بغيت سيارة غولف عاد تعال خل السايق الهندي يركبك
ما يركب الا الهنود

علشان جذيه انا احب المطارات الصغيره
انزل من سيارتك واركب طيارتك ههههه

المهم الفندق باين عليه حلو بس ننطرك تعطينا الصور عقب ما تصحصح
بالعافيه العشا ومتابعين للآخر

لا انا كانت تجربتي لووعه بمطار دبي

المهم مبروك على تغيير الأسم

من ميلاني الى فهد