ثالث ييوم او رابع انقلب راسي
رحلتي كانت زي ماقلنا رحلة عمل في المقام الأول كان عندي دورة تدريبية وانطلقت من الصباح على اساس ان الدوام بيكون الساعة 9 الصباح
ويومها وخذ لك توتر كل شوي قايم من النوم اشيك على المنبه الى ان جت الساعه ثمان وشوي واقوم اتجهز ونزلت الا اشوف الفطور قلت ياولد مر شف فطورهم خذك حاقه تصحصحك
واخذ لفه على الفطور حقهم ( مرتدلات واجبان ومربى معلب وانواع مخبوزات وكوروسونات وواحد يصلح اومليت وفول وفلافل وكريب صغيرات وفواكه مقطعه .. الخ) يعتبر مقبول بالنسبه لي بس انا مستعجل وابي اصحصح ومدري عن نظافتهم الشاهد خذت لي ملعقة فول وخبزتين عشان اصحصح

بالمناسبة انا كنت حاجز في نوفتيل من موقع الشركة https://www.accorhotels.com
لانه عطاني سعر ارخص سعر وشامل افطار والسعر فقط للعملاء الي مسجلين في الموقع وبدون تسجيل سعرهم زي سعر بوكينج

ومن خلال تجاربي لاحظت ان الواحد اذا جاء يبحث واعجبه فندق لايحجز على طول من اي موقع ابحث عن اسم الفندق في اكثر من موقع وحتى لو قال لك اقودا ولا المواقع الي تعطيك ارخص موقع ان هذا الموقع ارخص سعر موب صحيح

لان فيه مواقع تعطيك السعر بالضرائب ومواقع زي بوكينج بدون ضرائب فاذا جيت تحسبها او تدفع في الفندق تكتشف ان السعر قريب من الموقع الثاني والي كان بيعطيك غرفه افضل باطلاله او معها فطور او حتى يكون الموقع الثاني سعره ارخص مع الضرائب

نرجع لنوفتيل واسمي وكانت ثاني تجربه لي للفول المصري .. ..
ونفسي الشي نفس الطعم الي كلته في زوبا اللهم حق زوبا كثرت طحينه وزيت عليه .. بس ماش مهوب مثل فولنا حق ابو يمن

وانطلق للدوره وحسيت اني متاخر قلت ياولد خلني اخذ اوبر يقربني مابقى شيء على الساعة 9
وقلت خلني اجلس على الاتجاه الي من جهة فندق الانتر عشان مايجلس يلفلف ونتاخر
اطلبه وانتظر ويقولي شوي وجايك .. وكل شوي يلف ويخربط .. ويرسل لي تراني وصلت .. وادق عليه اقول وينك يقول انا عند اللوكيشن قلت وين انا عند الدوار وهو يقول انا عند الدوار

وقام يقول شفت التمثال خليه وراك وتعال انا عامل تنبيه اظاهر قال كذا قصده مشغل فليشر تنبيه
واناظر البرنامج واحصله في اللوكيشن في الجهه الثانيه واجيه ركض يالله بس خلصنا خل نلحق وموقف عكس اتجاه الفندق كانك يابوفلان ماغزيت
ولا حر اقوله شغل المكيف وننطلق البرنامج يقول 8 دقائق لكن زحمه الدوار واقف قدامي وانا توترت اول يوم وتتاخر ياشينها

الى ان وصلت ونفس الحركه اليوم الي قبله جيت ادخل مع السيارت لان قلت لاوبر نزلني على الشارع ويوم جيت ادخل قال مع مدخل المشاة

وادخل وانا الهث وادخل الا مافيه الا انا
ماتسوى علي الركضه والخرشه

شوي الا بدو يتوافدون ولا طلعونا الا الساعه وحده وشوي وعاد في الطلعه قلت امش كعابي اسرع لك ومنها حركه ولا يضيع وقتي على شيء ما يسوى

هي الشمس حاره بس لاني اتفرج على النيل وفيه هواء يعني مخففه علي لكن لو ولدي معي منيب ماشي
وارجع الا ام محمد مولمه لي القهيوه ومحمد حايس الدنيا في الغرفه يلعب بسم الله عليه
وعاد المعزبه في خاطرها مطعم ساكويا الي قلت لكم رحنا له وقال حجز وادق عليهم وقلت له ابي حجز اليوم .. قال معليش اليوم مقفلين انا كاني سمعته يقول صيانه او نظافه لكن يوم مرينا جنبه لقينا فيه ناس

الشاهد قلت له اجل احجز لي لبكره غداء

وقالت ام محمد مادحين لي مطعم يقال له هيدا لبنان Hayda Lebanese restaurant
جيناه العصر نايم جوه اتوقع في الليل يقلب نظام شيش ومزيكا وردح
خذنا اوبر وانطلقنا طبعا ما يعرف المكان وقلت له امش على اللوكيشن وجلست على راسه اقوله لف الحين ومدري ايش الى ان وصلنا ويوم جينا ندخل الا الصدمه
درج طويل نازل تحت وانا معي عربية ولدي فوق عشر درجات لانه عباره عن قارب متوقف على النيل ثابت
زين ان عربية ولدي خفيفه وشلتها ولا كان عقوبة النزله

ماعليه المطعم بس لاتاخذون مني تقييمات عن اكل المطعم انا بس باوصف لكم المكان والجلسات لان الناس اذواقهم تختلف

يوم عبينا الحمد لله طبعا عبينا اقصد فيها نفسي لحالي لان المعزبه تلمس بس وولدي ماذاق شيء من اكلهم خايفين عليه من التحذيرات الي وصلتنا قبل نوصل وسالفة التسمم والنزلات المعوية

طلعنا قلنا وين نروح وقت الغروب حلو ناخذ لفه على النيل يالله وين اماكنها وبحثت في النت وعرفت انهم يسمونها فلوكا او فلوكه زي كذا القوارب الي تاخذ بك لفه على النيل
بس السؤال الحين كيف نركبها كيف ننزل لها
وطلبنا اوبر وحطيت اللوكيشن الفندق ويوم ركبنا سالته من وين نركب هالقوارب قال انا اعرف فيه مكان جنب منتزة الجزيرة قلت حلو جنبنا طيب بكم ؟؟ يعني تقريبا
عشان ما يلعبون علي واعرف افاصلهم

قال منيب متاكد ماقد ركبته بس حاول تفاصلهم ويضحك لانه عارف انهم بيلعبون علينا
وابن الحلال وصلنا لمكانهم مشينا زي الجسر الصغير وفيه اولاد صغار قال عاوزين لفه مدري قارب قلت ايه بس بكم قال تعالى للمعلم ويطلع لنا واحد اهلا وعاوز لفه كبيره ولا صغيره الكبيره حول الجزيرة والصغيره مدري وين الكبيره تسوى تشوف اشياء الصغيره الي فهمته رايح جاي
قلت طيب بكم قال مانختلف الي يجي بس انتا عاوز صغيره ولا كبيره
قلت الكبيرة بكم قال ب 800 جنية
انت لازم اي سعر يعطونك تسوي نفسك منصدم وتقول غالي لان فعلياً هم زايدين السعر لانك خليجي
لو ان هالسعر ثابت عليك وعلى غيرك واهل الديرة كان ماجادلتهم

المهم يمين يسار الى ان وصلنا ل 500 جنية
وانطلقنا قارب وش طوله ومافيه الا انا ويالله خذ لك مزيكا مصريه كلماتها حفله والسواق مكيف معها ومعلي الصوت شوي قلنا له قفلها صكت راسنا

شوي قال عندكم في الجوال اشغل لكم اي شئ .. قلنا لا <--- نفسيات
بس لاشغلتها في الجوال تطلع في التصوير اوضح

المهم كانت اللفه حلوه لكن التوقيت ماوفقنا فيه المفروض ماخرينا شوي لين تخف الشمس قبل المغرب بشوي بس حلوه تستاهلالواحد ياخذ لفه وكل ماكثر عددكم كل ماطلعت احلا واونس

واظاهر تقدري تركب مثل هالمراكب مشتركه تطلع على الشخص ب 5 جنية <-- هالمعلومة قالها لي ولد يسوق حنطور من اهل البلد
وانا في القارب مرينا مطعم ساكويا خوينا يوم اقولكم مريناه ولقيت فيه ناس جالسين ومرينا منطقه لقينا شباب يتسبحون في النيل ومعهم غنم ينطلونهم في النيل ويسبحونهم وبعدهم بشوي لقينا واحد جالس يسبح الحصان حقه وهو معه في النيل بقد حاقات قميلة وشفنا وحده ساكنه في قارب ومعها بنتها وجالسه تنشر ملابسها طبعاً غير المقاهي والمطاعم والمباني على اطراف النيل بس ركزت على الاشياء الملفته

ووصلنا بالسلامه ورجعنا للفندق رجليه لانه قريب الا فيه ناس باسطين يبيعون كل شئ
حاقه ساعه بارده ولا ترمس شئ زي الفصفص عندهم ولا مدري وشو كل شئ يبيعونه وانا في الطريق شفنا عروس جالسه تتصور في الحديقه كثيره مناسبات الاعراس الي شفتها خلال هالاسبوع الي جلسته تقريبا بشكل يومي الله يوفقهم

ورجعنا للفندق عشان نتجدد ونتنظف ونصلي ونتنشط <-- بدون نوم
انا ماعندي مشكله في السفر اطلع الصباح بدري بس اقدر ارجع اريح واخذ لي غطه والمدام لا تكره شيئ اسمه نوم في السفر نطلع من الصبح مانرجع الا الليل عشان مافيه وقت وعسانا نلحق كل الاماكن

المهم تنشطنا ثم قررنا نطلع فقلنا خلنا نروح ناكل لنا شئ
ورحنا لمطعم صراحه لقيتهم مادحينه في تويتر وقريت عنه في قوقل واعجبني ديكوره The Republic
جوه هادي وذوق انصح فيه صراحه .. شفنا المنيو وقلنا مالنا الا مكرونات ومالنا الا خضار ولا سي فود
وحصلنا سي فود وطلبناها ويوم وصل طلبنا الا انصدمنا انا بالنسبه لي كنت جوعان وماكان عندي مشكله اجرب الطبق لكن المدام ارتاعت وزياده على سمعت مصر ان اكلهم وسخ قالت وش ذا وراها كذا ؟؟؟
جتنا اسبغتي لونها اسود
واناديه اساله هذا طلبنا انا طالبين اسبغتي سي فود عاديه ليه كذا سودا قال هي تجي كذا لان مخلوط معها حبر الحبار وصدقوني طعمها حلو بيعجبكم وان ما اعجبتكم ما عليكم ابدلها لكم
والله واحط عليها شوي ليمون واسمي طلعت مضبوطه زي ما قال ولو رحت مره ثانيه بطلبها افضل وجبه كلتها في مصر
ويوم خلصنا وشبعنا الوقت قبل المغرب بشوي قلنا خل نروح لخان الخليل وقالت المدام عشان نجرب قهوة الفيشاوي المدام متحمسه اكثر مني لهالمنطقة
يالله خل نشوف يقولون شعبي وعندهم هدايا والخ
طبعاً من ضمن التوجيهات انتبه من الشحاذين في هذه المنطقة بالذات واساليب النشل وتجمع الاطفال ومنطقة شعبية جداً وتراها ميب صالحه لك

حطيت في اللوكيشن لاوبر ووصل لنا وكان منفس مدري وش فيه الشاهد ويوم قربنا قال ترى ابنزلكم على اليمين لان ما اقدر ارجع للوكيشن الي انتو حاطينه هنا اقرب شئ ما اقدر ادخل جوا قلت طيب قال فيه سلم تحت الارض نفق عشان توصل للجهه الثانية وكانوا حاطين شبك بين الشارعين عشان محد يقطع الشارع عقب الجسر ومع ذلك شاقين الشبك ويقطعون

المهم نزلنا الا بدينا نشوف العينات وعلى طول المدام هونت وخافت من المنطقة قلت لها هذي مصر صدق الي نسمع عنها
طبعا نزلنا تحت الارض وانا نازلين الا اشوف عائلة خليجيين قلت لها شوفي ربعنا هناك لعلها تطمنت شوي وقالت اجل خل نروح معهم قلت تعالي بس مايكون الا كل خير - طبعاً انا قبل لا نوصل وانا كنت متوتر وموب جايز لي المكان وزدت يوم نزلت بس دامنا وصلنا ونزلنا خلاص خل نشوفه ونطلع- والله ونطلع من الجهه الثانيه وندخل المنطقة على طول ذكرتني بسكك وشوارع مكة المكرمة ايام اول قبل التوسعات الشبيكة وطقتها
شارع ضيق ومحلات يمين يسار وباسطين على الشارع ويبيعون ذكريات ولا اقمشه وجلابيات والي عصيرات

فكنت مستغرب .. ونمشي ونتفرج وخذنا لنا شئ كنا ندوره من هالتحف والذكريات هنا ارخص من باقي الاماكن في مصر بفرق كبير
وثم جلسنا نبحث عن قهوة الفيشاوي طبعاً قوقل عطاني طريق عجيب دخلني في سكك ضيقه تكفي شخصين بس هو حلو خلاني استكشف مع انها تخوف شوي لان معي حرمتي وبزر

وياسلام على الفيشاوي
انا كنت متخيلها زي المسلسلات المصريه تكون قهوه على زاويه ومفتوحه من الجهتين شغل نظيف
انسدمت انها عباره عن ممر وطاولات صغيره متلاصقه في بعض وغيمه حوله من الشيشه والدخان

المهم دامني وصلت قلت اجلسي واطلب كبايت شاهي وحده عن قولت دامني تعنيت له
ويقول بس طيب الولد اسمه ايه موش عايش شيشه
وشوي يجيك واحد معه عود يقول عايز تقسيمات وعقبه واحد اكواب تبي نكتب اسمك عليها شوي واحد معه سلاسل يقول عاوز اي اسم لو حتى اسم حماتك الي بتكرهها
شوي يجون بزران معهم بلونات ويحطون البلونه في يد ولدي عشان يصيح ويقول ابيها
وشوي يمر واحد معه مجموعة كتب اسرار الحب ومدري وشو وما لقى الا انا يجيني

شوي ووصل الشاهي واشربه بسرعه ونطلع الحساب 20 جنيه كباية شاهي بنعناع وقارورة مويه
الشاهي ب 15 جنيه والمويه ب 5 جنية
بعدها كملنا لفه على المحلات ثم طلبنا اوبر وطلعنا

طحت في اوبر ساكت لكن اوقات احب اسالهم شوي عشان اغير جو الطريق الا ينطلق ويسولف لي عن الاكل وشوي خشيت به على السياسه
يحبون هالسوالف
الى ان وصلنا الفندق بحمد الله ونطلت راسي عقب هاليوم الحافل ونمت من غير رايي


احس اني الهث من سرعة الكتابة
ان شاء الله تكونون استمتعتوا هالمره وما اكون طولت عليكم

آخر مواضيع ATL

- استفسار هولندا مع الأطفال؟؟ - لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023

توقيع : ATL

اللهم لا تجعل في قلوبنا غلاً للذين آمنوا