ليه المنتدى حاط xxxx بالاحمر بعد وش اني كاتب ؟؟ اظاهر كاتب يتـميلحون !!

اقتباس :  المشاركة الأصلية كتبت بواسطة الايمان وصلت لحبر الحبار انت متأكد ؟ لا تقولين بعد عطوني من كيسهم اهم شيئ لا يصير شيء وسخ الحسين وقهوه الفيشاوي وناسة والقعدة وايد صغيره لكنها حلوة واكشن القوارب بالنيل روعه المهم يكون الجو حلو انا رايي من راي المدام النوم نخليه في ديرتنا بالسفر مافي نوم

شكلك من عشاق مصر

اقتباس :  المشاركة الأصلية كتبت بواسطة سارة محمد ما شاء الله أبو محمد زرتم الأهرامات. والله أتمنى لو كنت بشجاعتكم أنا قرأت تحذيرات كثيرة وأن الزائر بالسيارة لا يجب أن يقف إلا عند بوابة قطع التذاكر مهما حاولوا خداعك. على أي حال الحمدلله جت سليمة ونعيمة زي ما بيقولوا خبرة لقادم الأيام. فندق كمبنسكي قرأت من عدة أشخاص أنه هادئ وينصحون به العوائل ولكن لم أجربه. المهم الحمدلله أنه أعجبكم لكن حكاية الكارت الذي لا يفتح مملة وجربتها في أحد الفنادق وكنت أضطر أنزل للاستقبال. وبالنسبة لحضور أمسيات أقترح عليكم المرة القادمة الذهاب إلى دار الأوبرا أو ساقية الصاوي. هناك تعرض فنون راقية ولا يوجد إزعاج أو دخان وشيشة. والآن في انتظار تفاصيل يومكم الأخير في القاهرة.

يابنت الحلال يومني هناك شفت بنات لحالهم جايين خليجيين بعباياتهم بس واضحه معالم وجههم توحي لك انهم كانوا مبسووطين مره بالجوله
بس على قولتك خبره واقلها اني شفت على الواقع ولعل وعسى احد يستفيد من تجربتي

عاد دار الاوبرا كان قريب من سكننا بس مدري ليه ماتحمست اقراء عنه كثير قبل السفره

اقتباس :  المشاركة الأصلية كتبت بواسطة maglibya السلام عليكم تقرير مميز وبسيط ، بس لو كان مدعوم بالصور الله يعطيك العافية مستمرين معك

الله يعافيك، ايه للاسف وش نسوي في الجوال ماله حق ما تجمل له كم يوم على ما انزل الصور في الجهاز ثم يخرب ..

اقتباس :  المشاركة الأصلية كتبت بواسطة q8ya metnaqla ما شاءالله يووووم حااافل ومزدحم بصراحه حلو التغير بالفنادق و الحمدلله كمبنسكي عجبكم في اعتقد العضو نجم السياحة كاتب تقريره عن مصر نفس الموقف بالضبط اللي صار معاكم كان صاير معاه في الاهرامات بصراحه لو انا منك ما امشي معاهم و اخليهم واعطيهم ظهري و من الاول يتفق على السعر او ما اتعامل معاهم خير شر ١٠٠٠ جنية على لفه والله حراااام ويقول معاملة المصري يبا عاملني معاملة الأجنبي ولما يقول خلاص خليها علي لو انا بقول اوك وامشي خله يتحسف على الكلمه اللي قالها انت وااايد وااااااايد اكرمتهم واهم بالأساس ناصبين بالسعر والفيرمونت عوايل وهذا ستايله عيل لو مو عوايل شلون راح يكون اخ ام الدنيا يبيلها قلب ما يتعب اتوقع لو ازورها راح اتهاوش وما أتحمل بس مستمعين معاك فيها و في المواقف

واضح اصلا انهم متعودين على هالحركه وكل سؤال مولمين له اجابه وتمثليه
بس ان شاء الله يوم عن يوم يجونهم ناس ينشبون لهم زيي واكثر بعد شوي شوي الى ان يتعدلون او تحس السياحه عندهم ويقننونها ويخلون كل شئ رسمي وموثق بفواتير لانه يعتبر المعلم السياحي الاول لمصر

تبين الجد كل من قلت له الموقف وهو قد راح لمصر ما يقول اني اكرمتهم ويقولون لا تصير كذا وسع صدرتك تراها ماتسوى شئ يقارنها بالعمله حقتنا ... مابي اكرر كلامي لكن انا لوهم حاطين لوحه مبلغ الرحله ب2000 جنيه ابدفعها ولانيب قايل شئ بس ما احب فكرة عشانه خليجي فلوسه كثير خل نزيد عليه ويحاول يلعب على سالفة اننا اخوان وعرب واكرمنا

جد والله الفيرمنت مدري كيف الناس حكمة عليه انه عائلي لو قارنته بالسوفتيل والناس الي فيه على وقتي زيارتي اعتبره محافظ مع ان كلام الناس عن سوفتيل انه يصلح للعوائل وصدقوا يصلح.. بس ودي اشوف وشو الفندق الي موب عائلي كيف جوه بيصير

ايه مصر يبي لها واحد يوسعد صدره ولا يدقق مع اني حاط هالجمله في راسي من قبل اوصل لهم لكن ماش ماقدرت


شكراً لكم جميعاً

آخر مواضيع ATL

- لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023 - اشتراطات الدخول لالمانيا

توقيع : ATL

اللهم لا تجعل في قلوبنا غلاً للذين آمنوا

صراحه تلخبطت عندي الايام لكني اظاهر كاني منيب واهم اليوم الي الاخير الي قبل السفره عقب مارجعنا من الاهرامات وتغدينا رحنا لخان الخليل مره ثانيه عشان نشتري مجسمات فرقة ام كلثوم المره الي راحت شرينا ام كلثوم لحالها ونسينا فرقتها فقالت لازم الفرقه اذا تبون حفله وعلى الطريق خذنا للصغيرين جلابيات المصاريه الي فيها هلل او قروش حقت البنات وشوي خذنا لوليدنا جلابيه مالقينا مقاسه ذيك المره
وعلى الطريق شافت ام محمد جلابيه جازت لها وخذت وشوي على الطريق ذكرنا في كل سفره لنا لازم نشتري مغناطيس الثلاجه وفيه معالم البلد الي رحنا لها او المدينة وشوي على الطريق لا لا خلاص يكفي

اغلب وقتنا راح عند حقت جلابيات البنات الصغار كل شوي هذا اللون حلو لا هذا هذا مقاسه زين لا هذا لا رجعي هذا وعطينا هذا لا هاتي الثنتين كلهم وش رايك نجيب لفلانه يالله هاتي لون ثالث
فطلعنا من خان الخليل على الفندق ثم رحنا لفيرمنت...



ووصلنا لليوم الاخير من يومياتنا في القاهرة في مصر ام الدنيا مصر دي امنا
بعد مارجعنا امس وانا دايخين انا فيني طبع لازم قبل يوم السفره ارتب الشطن عشان ماتحوسني ولازم ارتبها زين عشان تتقفل بسهوله
مع اني دايخ بس احس اريح لي نفسيا اقوم وانا مروق كل شئ جاهز، وارتب الي قدرت عليه

وخذ لك نومه حلوه الحمد لله ومع اشراقة يوم جديد ماقومت العائله الكريمه قلت خلني ارتب كل شئ وهم خلهم يشبعون نوم

شوي الا تجيني المدام تقول وراك ما صحيتني قلت خلك ترتاحين قالت ابروش حمود <-- قلت في نفسي يوووه ما احب سوالف التاخير خاصه المطار
خلاص انتي خلصي بس اغراضك وقفلي شنطتك يبي لك وقت وحمودي بدبره وادخل انا وياه الشور وشف الحفله انا الي تروشت موب هو

وابلش الحين اشلون تنشف ملابسك الي امتلت مويه ... وعلقها ووشي استشوره ... نسابق الزمن الى ان تقريبا خلصنا جلست اتفقد الغرفه قبل لا نروح لا يصير ناسين شئ ولا حمود ناطل شئ

الا احصل ملابسي عقب الشور نسيتها معلقها في الحمام وانتو بكرامه
وش بينشفها ذي واشغل الاستشوار وشوي الا يدق التلفون التشيك اوت الساعه 12 وانتوا لين الحين ماطلعتوا قلت انا عندي ليت تشيك اوت الى الساعه 2 واصلا طالب احد يجي ياخذ اللكج الشنط ولا جاني احد قالت اوكي اوكي الحين نرسل لك

ويوم شفت الوضع كذا خذت لي كيسه وربطتها بقوه عشان لاتخيس الشنطه
والحمد لله خلصنا قبل الساعه 2

رحلتنا زي ماقلت لكم الساعه 7:55 م الاقلاع
فقلنا نخلي الاغراض ونروح ناكل لنا شئ ثم نرجع ناخذ الشنط وعلى المطار
والمدام تقول لا وش رايك ناخذ الشنط معنا ونروح مباشره للمطار .. قلت وين نجلس نشحب هالشنط معنا خليها ونرجع وناخذها

وقلنا وين نروح بس الحين نتغداء عشان ما نتاخر .. المعزبه جايز لها فيرمنت قالت خل نروح له قلت يالله
وخاصه انه قريب منا ورحنا وجلسنا في اللوبي قلنا بنجرب اكلهم وطلبنا ما طاب ولذ الحمد لله
الى الان الامور تمام الا انهم تاخروا في تقديم الطلبات يمكن مرتين او ثلاث نسالهم وين الطلب ورانا رحله منب فاضين

تقريبا نزل لنا الطلب الساعه 5 او خلصنا الساعه 5 المهم يوم خلصنا رحت وقلت لهم جبوا الفاتوره يوم تاخروا قمت وحاسبت وانا واقف وطلبنا اوبر وتاخر طلع واحد فاهي تاخر علينا
ولا ودي الغي ويتاخر الثاني خلاص دامني صبرت ونركب واقوله فيرمنت واوصف له واضح انه من جنبها وبغى يجيب بنا العيد ويصدمنا واحد مع الابواب

وكل شوي اناظر الوقت واناظر سواقته من التوتر بغيت اقوله حول انا بسوق عنك سواقته زي وجهه ويسرع سرعة واحد عليمي .. فكنا الله

المهم نزلنا عند الفندق وخذت الشنط ويالله على المطار ولهيت عن اللوكيشن الا انتبه ان الرجال ماي يدل وبيضيع وقتنا وقمت اوصف له خطوه خطوه ولازم اقون دقيقه عشان ما يتعدى ونمشي ونص الطريق قالي لازم نعبي بنزين مووب وقته المهم قلت ما يوصل ويمشي شوي وانا ابحث في الجوال عن شئ الا جاء مفرقين لطريق واحد وراح يسار يسار يزيد علي 15 د من الوقت وثم قال البنزين خلاص ما يوصل قلت يالله عب بس انا متاخرين ومفروض تعبي من اول بس عجل علينا

ويوقف يعبي وينطلق واوصف له خطوه خطوه لا يتعدى بعد منب ناقصين بق 20 ساعه وتصير الساعه 6م طبعا انا ما اعرف اجراءات المطارات مثلا قبل رحلتنا في الرياض جلسنا عند الشنط بس تقريبا 40 دقيقه مع انه معي البوردينج

يوم قربنا عند المطار الا فيه كمين قلت يليل الحين بعد بياخرونا منب ناقصين
والحمد لله مشت الى ان وصلنا ونزلنا وتونا نمشي الا الرجال نازل يناديني يقولي الحساب خلاص ؟؟ طلع اول مره يشتغل شكله او اول يوم الفاهي

وادخل المطار خوينا نفسه الي طلعنا منه الصاله رقم 2 الا اشوف المسارات وادخل من مسار مع الناس يوم وصلنا نهاية المسار خلاص اشوف اجهزة التفتيش الا فيه واحد الي يقول رح يمين يسار الا يجي واحد ثاني من ورى ويقول رايحين فيه قلت الرياض قال الرياض خلاص هاتوا شنطكم خذ يا فلان ودها على هالسير
وانا اناظره توقعته يعني بيدخلنا على الصاله على طول بيسوي شئ

والله العظيم المسافه تقريبا اقل من 5 متر بعدنا عن جهاز تفتيش الشنط يعني خلاص الدور علينا
وانا معلميني قبل تراهم يسوون هالحركه في المطار ويتصيدون للجواز الاخضر اصلا واضح من اشكالنا والعبايه والصاله هذي لرحلات الخطوط الاسعوديه ومصر للطيران

المهم خذ شنطنا وقال ماعليكم بمشيكم وحط شنطنا في جهاز التفتيش الي مليان اصلا وفسخنا الشوزات الله يكرمكم وفيه عسكري بعد الباب يفتش يدوي ويتاكد من التذكره اذا رحلتك باقي عليه بس 3 ساعات اذا ازود بيرجعك فيه واحد رحلته الساعه 9م قال له ارجع مع ان شنطته دخلت ورجعه

ويوم حط شنطي في الجهاز الا يقولي انا مدير الشباب اكرمنا الله يكرمك قلت مامعي شئ قال اي حاقه قلت له شكرا الله يعطيك العافيه وراح

المهم بعد التفتيش فيه حقين عربيات على طول يلقطون شنطتك ويحطونها في العربيه ويقولون اي خطوط الشنط معي تندف بس مع الحوسه خلاص قفلت ولا قلت شئ بس ما احب هالحركه الي يجي يشيل ولا يشاور المهم شوي الا وحده معه فواتير تشق وتعطيك مكتوب عليها تذكرة نقل عفش او سله نسيت وش مكتوب بس مسجل انها ب 20 جنيه

هنا انا انصدمت
لا لاء فيه شئ غلط اشلون في مصر وشغالين نظامي ومرتبين الشغله صراحه وسعوا صدري وانبسطت طلع منهم رجاء فيه امل يتنظمون هههههههه

وخلصنا وشحنا الشنط وفي الطريق للدخول لصالات الا نقابل بحرينيه كبيره شوي في السن يوم شافتنا جلست تتشكى من هالعسكر تقول عيا العسكري يدخلني من البوابه يقول معك معسل قلت له لولدي موب لي قال مايدخل الا ذا دفعتي وقال يبي 100 جنيه وعطيته

والمهم الحين معي اغراض كثيره اخاف ما يدخلونها الطياره تاخذون كيسه وتعطوني اياها داخل المدام الله يهديها رحمتها وعلى طول قالت ايه وخذتها كيسه فيها صينيه ولوحه هدايا

في المطار يحذرون لا تاخذ اي شيء ولا تنقل اي شئ من غريب
المهم قالت لها ترى رحلتنا الساعه 7 وبنروح للرياض هي رحلتها 8
المفروض تعبي بيانات الجوازات الكرت قبل الدخول وتلحقنا وجلسنا في السرى شوي شوي وصلنا للموظفه وذيك لين الحين جالسه تترجى الناس يشيلون معها اغراض ويوم جينا عند الموظفه قالت المدام ارجع لها قلت له ممنوع وسالت الموظفه قالت لا ممنوع اذا دخلت خلاص

ودخلنا نسحب رجولنا وخلاص بيفتحون باب الطياره وذي ما جت .. وقلت الحين روحي انتي اجلسي عند البوابه وانا بروح اذا سمعت اعلان البوابه بجي ركض

ورجعت لمدخل التفتيش ولا شفتها من بعيد ولفيت في السوق الحره ماها اثر ورحت لبوابة رحلتها لين الحين ما فتحوها ورحلتنا فتحوا البوابه
وش السوات الحين سالت الموظفه الي جالسه على البوابه قلت عادي اخلي هذي معك فيه راكبه كبيره في السن بتجي تاخذها قالت لا مالي علاقة ... رجعت للتفتيش اتشوف لها ماشفتها والوقت خلاص

رحت لقيت عائله بحرينيه جالسه شايب وحرمته جيته وقلت له فيه وحده كيت كيت اذا جت تعطونها اياها ؟؟
اشايب نفسه في خشمه تحسفت اني سالته حتى يوم تفاعلت حرمته معي اشر بيده عليها زي الي اسكتي بس قلت له ادري هالشئ غلط بس وش اسوي ... كان يقدر يرفض باسلوب

المهم اظاهر فيه وحده مدري بنتهم او سمعتني وش فيك قلت كيت كيت كيت قالت اووه لا صعبه حطها عند المقهى الي عند البوابه

جيت للمقهى وسلمت وقلت لهم كيت وكيت وكيت تقدرون تخلونها عندكم انا ما اعرفها ولا تعرفني وانا بسافر دوله وهي دوله قال خلاص حطها هنا على الكرسي قلت له الحرمه شعرها اشكر وسمينه شوي ولابسه قميص عليه الوان كثيره اذا جت عطها قالي الله يجزاك خير ورحت اركض لبوابتي

الا اشوف مافيه الا يمكن 8 في الصف بيركبون واتشوف لحرمتي مالقيتها ؟؟ قلت ركبت ونست ان معها البوردينج ولا راحت بوابه ثانيه ؟؟ واروح واجي كاني منسبه يمكن اربع مرات اروح واجي ادور
والمشكله جوالي طفى علي اليوم الصباح وماعاد يشتغل فاشلون اكلمها او اتفاهم معها

ثم لقيت واحد سعودي قلت له معك جوال يدق قال ايه قلت ابكلم المدام ابشوف وينها وادق عليها الا جوالها مغلق ياذي البلشه
وقلت ابسال الي على البوابه اذا يطلع عنده اسامي الي ركبوا الطياره او لا الا اشوفها ترض من القزازه وراي والتفت الا هي جايه ركض تضحك وانا كذا

ودخلنا بسلام للطياره وزي ماجينا الطياره كبيره وفل الرجعه نفس الشئ فل
طبعا طول ما ركبنا في الطياره وانا مانبنا ضميرنا على الحرمه ونقول عسى وصلت اغراضها ثم نقول هي الغلطانه والي ضيق صدورنا ان الطياره تاخرت ماقفلت الباب يعني لونا منتظرينها اكثر كان امدانا نعطيها ونركب طيارتنا بس ان شاء الله انها وصلت لها .. ولو احد يوم من الايام شاف هالحرمه او سمع سالفة هالحرمه يقولها اننا حرصنا ندورها واننا ماسرقناها حطيناها لها عند بوابة طيراتها

والحمد لله على سلامتنا .. وان شاء الله ما اكون طولت عليكم وحتى وان طولت ان شاء الله ما اكون ضيعت وقتكم على الفاضي


وسعدت جداً بمروركم وطلتكم الجميلة
شكراً لكم، وإلى لقاء جديد إن شاء الله مع سفرة جديدة

آخر مواضيع ATL

- لندن - وندر مير- نهاية شهر مايو 2025 - التقديم على شينغن اسبانيا ؟؟ - لندن ووندرمير منطقة البحيرات مع طفلين - المالديف مايو 2023 - اشتراطات الدخول لالمانيا

توقيع : ATL

اللهم لا تجعل في قلوبنا غلاً للذين آمنوا

قواك الله يا بومحمد امتعتنا في رحلة مصر

عليكم بالعافيه السوق اليوم اللي قبل الأخير

واليوم الأخير اكشن صراحة
من الصبح مع محمد الله يحفظه و بعدين غداكم و بعدين السايق

واخر شي المسافره البحرينية بس بصراحه انتوا غلطانين خذيتوا منها و انتوا عارفين ما يصير وكل مره ينبهون على الشي ما اختلف ان صح و دنا نساعد بعض بس الوضع اختلف الحين و المطارات صارت شديده يعني دربالكم مره ثانية لا تاخذون شي ..

وان شاءالله نقرا تقارير قادمة لك استمتعنا معاكم في رحلة مصر

ذكرتني أخي أبو محمد بالتوتر الذي يصيبني عادة قبل رحلة العودة والمشاكل التي أتسبب بها لنفسي الحمدلله أنك وصلت البوابة في الوقت المناسب وإلا كان صار علوم هههههه بصراحة أنت والمصريين الذين قبلوا أن تضع الحقيبة أمام المقهى في غاية الطيبة ولا يضيع الله عمل الخير وإن شاء الله تكون الأخت المسافرة البحرينية وجدت حقيبتها.

كان تقريرك خفيف وجميل وحتى انطباعاتك عن القاهرة ليست قاسية كعادة من يسافر أول مرة وقد تصدمه الكثير من الأمور. لكن تحتاج إلى إلى إعادة التجربة وسترى كيف ستكون مختلفة عن المرة الأولى.

سعدت بقراءة تقريرك وأرجو لك التوفيق وللعائلة.

ههههه رحلتك كلها اكشن
وخاصه مع اوبر والنصابين واخرتها اغراض الحرمة البحرينيه

اهم شي استانستوا بالسفره
والفنادق اختياراتكم لها جميله بس الصور حسافه

بسأل عن الشهادة استلمتها والا ما عطوها صديقك

مره ثانيه احرص على الصور للتقرير لان في مسابقات بالمنتدى

الحمدلله على سلامتكم.

الحمدلله على السلامة

مصر حلوة بكل شي

تحياتي لك